Uko byari byifashe mu gusoza umwaka wa 2020 uzira ibishashi i Kigali (Amafoto na Video)

Yanditswe na Igirubuntu Darcy
Kuya 1 Mutarama 2021 saa 01:28
Yasuwe :
0 0

Umwaka wa 2020 wasojwe mu bihe bidasanzwe! Hambere aha, wasangaga abenshi bagenderanirana n’inshuti n’abavandimwe, basabana, abandi bakarara mu bitaramo byo gushima Imana.

Kuri iyi nshuro, umugoroba n’ijoro ryo ku wa 31 Ukuboza 2020, ntiryari risanzwe. Bitewe n’ingamba zafashwe mu kwirinda ikwirakwira rya Coronavirus, buri wese saa Mbili zageze ari mu rugo kereka bake na bo babifitiye uburenganzira.

Mu mihanda ya Kigali nta bantu bari bayirimo ndetse insengero zose zakiraga abantu mu bitaramo by’amakesha zariho ingufuri, abataramye ni abifashishije ikoranabuhanga bifatanya n’abayoboke babo babinyujije kuri shene za YouTube n’ahandi.

Mu duce twose tuzwiho kuba dushyushye nka Nyabugogo no mu banyamujyi b’i Nyamirambo, hose hari hatuje, imihanda nta muntu n’umwe uyirimo.

Mu masaha ashyira iyashyiriweho kuba buri muntu yageze aho ataha wasanga benshi banyaruka basiganwa n’ibihe ndetse mu marembo yinjira muri Gare umutekano wakajijwe ndetse urubyiruko rw’abakorerabushake rwagenzuraga neza ko amabwiriza yo kwirinda ikwirakwira rya Coronavirus nko gukaraba intoki no guhana intera yubahirizwa bikwiye.

Kuri iyi nshuro kandi nta bishashi byo kurasa umwaka byaturikijwe bitewe n’ingamba zafashwe n’Umujyi wa Kigali mu kwirinda Coronavirus.

Isoko ryo kurasa umwaka ryari ryashyizwe mu maboko y’abikorera ariko Umujyi wa Kigali waje guhagarika iki gikorwa cyane ko isaha yo gusoza umwaka yageze, amasaha yo gutaha yarenze ku buryo bitari bworohe ko icyo gikorwa gishoboka.

Ubusanzwe ibishashi byaturikirizwaga ahantu hatandukanye harimo kuri Amahoro i Remera, Stade ya Kigali i Nyamirambo, Umusozi wa Bumbogo no kuri Kigali Convention Centre.

Muri Gare yo mu Mujyi wa Kigali rwagati abagenzi batangiye gutaha hakiri kare. Imodoka zari nke zitwara abagenzi hubahirijwe amabwiriza yo kwirinda Coronavirus
Mu marembo yinjira muri Gare yo mu Mujyi wa Kigali rwagati, umutekano wakajijwe ndetse urubyiruko rw'abakorerabushake rwagenzuraga neza ko amabwiriza yo kwirinda ikwirakwira rya Coronavirus nko gukaraba intoki no guhana intera yubahirizwa bikwiye
Abagenzi berekeza ku Gisozi bari benshi, aha binjiraga mu modoka ibacyura mbere y'amasaha make ngo saa Mbili zigere
Hari aho wasangaga imirongo ari miremire cyane
Mu masaha ashyira saa Mbili wasangaga abantu bamwe na bamwe batarabona imodoka zibacyura. Abagenzi ntibari benshi nkuko bisanzwe
Aha ni mu Mujyi wa Kigali rwagati imbere ya Hotel T2000, mu masaha asatira saa Mbili
Mu masaha ashyira saa Mbili abantu benshi bihutaga bataha kugira ngo badafatirwa mu nzira
Bamwe mu baturage batahanaga ihaho ry'Ubunani
Ku muhanda ugana muri Gare yo mu Mujyi wa Kigali rwagati abaturarwanda bagendaga bagabanuka umunota ku wundi
Imihanda itandukanye yo muri Kigali ntabwo yari ishyushye nkuko bisanzwe
Ishusho y'imwe mu mihanda ya Kigali mu masaha y'ijoro
Abava n'abajya guhahira muri T2000 Hotel n'uduce tuyikikije banyuranyuranagamo ubutitsa
Ahagana saa Mbili wabonaga ibinyabiziga bike cyane bigenda inkungugu ngo bitahe
Abafite ibinyabiziga babanje guparika bajya guhahira iminsi mikuru
Abanya-Kigali binjiye mu mwaka mushya batuje, kubera ingamba zo kwirinda ikwirakwira rya COVID-19 nta gusamara kwabayeho
Hanze y'Isoko rya Nyarugenge hari abantu bake biganjemo abapakira imodoka mu gihe abandi barimo bakotana bataha mu ngo zabo
I Nyabugogo abantu bihutaga bataha ubwo haburaga iminota mike ngo amasaha yo kuba bari mu ngo zabo agere
Ibinyabiziga byagendaga bigabanuka mu muhanda isegonda ku yindi. Buri wese yirindaga gufatwa akaba yarazwa muri stade akanacibwa amande
Mu bihe bisanzwe, muri Gare ya Nyabugogo habaga hari abantu batagira ingano barimo abava n'abajya mu ntara zitandukanye kwishimira iminsi mikuru
Inganda zenga ibinyobwa bisembuye n'ibidasembuye zo zakomeje gukora. Iyi modoka yari ipakiye ibinyobwa bigoboka abashaka gutsirika icyaka cyo ku Bunani bari mu ngo zabo
Ngiyo imodoka ya Skol itwaye amazi ya Virunga aherutse gushyirwa ku isoko
Abagenzi binjiraga mu modoka bubahirije ingamba zo kwirinda Coronavirus zirimo guhana intera
Mbere y'umwaduko wa Coronavirus, Nyabugogo yabaga yuzuye abantu ku buryo byari no kukugora kubona aho gukandagiza ikirenge
I Nyabugogo ahategerwa imodoka zigana mu bice bitandukanye by'Umujyi wa Kigali hari imirongo miremire
Umwaka wa 2020 watangiye neza ariko warangiye abantu bari mu buzima bubasaba kwigengesera no kubahiriza amabwiriza yagenwe
Abadafite amafaranga yo gutega moto n'imodoka barambika ibirenge mu muhanda bagataha
Umutekano wari ucunzwe neza mu bice bitandukanye by'Umujyi wa Kigali
Muri Gare ya Nyabugogo, hari abantu benshi babuze imodoka mu gihe amasaha yo gutaha yari yageze
Abenshi bari bafite imizigo igaragaza ko bari bakereye ingendo
Aha ni muri Gare ya Nyabugogo, ahantu ubusanzwe haba hari uruvunganzoka
Imodoka kuyibona byari bigoye, abagenzi bari benshi cyane nkuko bisanzwe bigenda mu bihe by'iminsi isoza umwaka
Aha abagenzi bagendaga bagabanuka i Nyabugogo
Abagenzi bari basigaye ahategerwa imodoka zigana mu bice bitandukanye by'Umujyi wa Kigali basohowe muri Gare barataha
Bati "Dushwekure amasaha atadufatira mu nzira''
Ahenshi mu masangano y'imihanda yo mu Mujyi wa Kigali haratatswe bibereye ijisho
Mu mihanda ya Kigali nyuma ya saa Mbili wasangaga yera bitandukanye nuko byahoze mbere
Imitako yo yashyizwe ahantu hatandukanye ku mihanda nkuko bisanzwe
Nta n'inyoni yahatambukaga
Niba ubyibuka neza, mu bihe nk'ibi wasangaga abantu ari benshi cyane bishimira ko umwaka urangiye n'undi ukaba utangiye bakiri amahoro
Uyu mubyeyi wasaga n'uvuye gushaka ihaho saa Mbili yamufatiye mu nzira, ahagaritswe na Polisi ahita atakamba ati 'Bana banjye mumbabarire', abana baramubwira bati 'komeza urugendo kandi ugire Umwaka mushya muhire'
Mu bihe nk'ibi umwaka ushize muri Kigali Arena habereyemo ibiriro byo gusoza umwaka. Icyo gihe hanategurwaga igitaramo gikomeye cya East African Party cyatumiwemo The Ben
Sitasiyo zo ziri muri serivisi zikomeza gutangwa amasaha 24 ku yandi
Gare ya Kimironko yari yashyizweho umuryango, nta muntu n'umwe wacaracaraga hafi yayo
Gare ya Giporoso i Remera no mu nkengero zayo heraga de
Imbere muri gare hashyizweho uburyo bufasha abayigana gukaraba neza ibiganza, nta modoka cyangwa umugenzi wari uyirimo
Rond point iri imbere ya Kigali Convention Centre yacaniwe bijyanye n'ibihe by'iminsi mikuru
Kigali Convention Centre yaraye icaniwe mu mabara agaragaza ibendera ry'u Rwanda. Ubusanzwe aha hari mu haturikirizwaga ibishashi byo kurasa umwaka
Ku nyubako y'ubucuruzi ya KBC hari hatuje bihebuje
Aha wakwemera ko ari kuri 40 i Nyamirambo? Ubusanzwe aka gace kabaga gashyushye, ababasha agacupa bakagasoma, abashobora The Vert bakicara bakayiganiriraho bishimira ko bagihumeka umwuka w'abazima
I Nyamirambo ahazwi nko kwa Nyiranuma hari hatuje cyane, aha mu bihe bisanzwe bakora amasaha 24 ku yandi mu gihe cy'iminsi irindwi
Umuhanda ugana ku Musigiti wa Onatracom na wo weraga, nta kinyabiziga cyangwa umuntu warimo
Dore i Nyamirambo, ahitirirwa icyicaro gikuru cy'Umujyi wa Kigali

Amafoto: Igirubuntu Darcy

Video: Mucyo Serge


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .