00:00:00 IGIHE NETWORK KN KINYARWANDA EN ENGLISH FR FRANCAIS

Ubushakashatsi bwagaragaje ko toni miliyari 1.2 z’imyaka zisigara mu mirima mu gihe cy’isarura

Yanditswe na Muhonzire Sylvine
Kuya 28 Nyakanga 2021 saa 05:55
Yasuwe :
0 0

Ubushakashatsi bwakozwe n’Ikigo kitegamiye kuri Leta cya World Wildlife Fund cyita ku Bidukikije n’icya Tesco Plc gikorera mu Bwongereza, bwagaragaje ko imyaka zingana na toni miliyari 1.2 ku Isi hose zisigara mu mirima igihe cyo gusarura na nyuma yacyo.

Ubu bushakashatsi bwiswe “Driven to waste” bwerekanye ko izi toni z’imyaka ziyongera kuri toni miliyari 1.3 zatakazwaga buri mwaka. Bivuze ko ku Isi hose habarwa toni miliyari 2.5 zitaribwa ahubwo zangirika ndetse na toni miliyoni 931 zitakarira mu bucuruzi bwabyo, byose bingana na 40% by’ibiba byahinzwe.

Kugeza ubu ku Isi habarirwa abantu bangana na miliyari ebyiri batabona ibiryo bihagije. Iyi mibare ishobora kugabanuka mu gihe ibihugu bishyize ingufu mu kurwanya iyangirika ry’ibiribwa ndetse n’iry’ikirere.

Byonyine ibi bisigara mu mirima birenga miliyari, ubu bushakashatsi bwerekana ko bibarirwa agaciro ka miliyoni 370$ kandi bikagira uruhare mu kohereza gaz mu kirere ingana na 2% yiyongera ku 8% yari isanzwe iva mu biryo byangiritse igateza ihindagurika ridasanzwe ry’ibihe.

Ibihugu bikize by’i Burayi, Amerika na bimwe byo muri Aziya ni byo byangiza ibiryo byinshi bingana 58% y’ibipfa ubusa byose.

Ubu bushakashatsi bugaragaza ko kugira ngo iki kibazo gikemuke bisaba ibihugu byose gushora imari mu bikorwa by’ikoranabuhanga bigamije guhangana n’iki kibazo ndetse no guhugura abahinzi uko bakwiriye gusarura.

Guverinoma y’u Rwanda byumwihariko yihaye gahunda y’imyaka irindwi kuva mu 2018 kugeza mu 2024 yo kugabanya ibiribwa bipfa ubusa nyuma yo gusarura.

Imboga zipfa ubusa nyuma yo gusarurwa biteganyijwe ko zizava kuri 45.5% mu 2018 zikagera kuri 22.8% mu 2024, imbuto zizava kuri 40% zigere kuri 28%, ibigori bive kuri 26.5% bigere kuri 13.3% mu gihe umuceri wo biteganyijwe ko uzava kuri 17.7% ukagera ku 8.9%

Ingano zo zizava kuri 25% zigere kuri 12.5%, amasaka yo ave kuri 26.5% agere kuri 13.3%, ibishyimbo byo bizava kuri 15% bigere kuri 7.5%, ibijumba bive kuri 45% bigere kuri 22.8%, ibitoki byo guteka byo bizava kuri 15% kugeza 9% mu gihe imyumbati yo izava kuri 43% igere kuri 21.5%.

Ubushakashatsi bwagaragaje ko toni miliyoni 1.2 z'ibiribwa bipfa ubusa nyuma yo gusarurwa

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .