00:00:00 IGIHE NETWORK KN KINYARWANDA EN ENGLISH FR FRANCAIS

Tubive imuzi: Ni gute BK Group Plc izagaruza miliyari 7 Frw yashoye muri BK Arena?

Yanditswe na Ndahayo Emmanuel
Kuya 27 May 2022 saa 07:18
Yasuwe :

Kuva ku wa 24 Gicurasi 2022, inyubako yahoze izwi nka Kigali Arena yahindutse BK Arena, nyuma y’uko Banki ya Kigali ishoye arenga miliyari zirindwi z’amafaranga y’u Rwanda mu kugura uburenganzira bwo kwitirirwa iki gikorwaremezo, kiri mu bya mbere muri Afurika mu kwakira imikino ikinirwa ahantu hafunganye.

Ni inkuru yaje itunguranye ku bantu benshi ariko iyi Banki n’Ikigo cya QA Venue Solutions cyaguze uburenganzira bwo gucunga inyungu z’iyi nyubako, byari bimaze amezi bigenzura iby’aya masezerano, nyuma y’uko BK isoje ubufatanye yari ifitanye n’Ikipe y’Igihugu ya Basketball.

Mu mushinga wo kubaka BK Arena yatashye muri Kanama 2019, bisa n’aho Leta itari ifite gahunda ndende yo kuyicunga nk’uko bigenda ku bindi bibuga. Mu Ukwakira uwo mwaka, Leta yahise itangira gushaka abashoramari bagombaga gucunga iyi nyubako, igikorwa cyakomwe mu nkokora na Covid-19 ariko kikaza kuzuzwa mu Ukwakira 2020, nyuma y’uko QA Venue Solutions yemeye gushora miliyoni 2,4 z’amadolari mu gihe cy’imyaka irindwi.

Kuva Leta yakwiyambura inshingano zo kugenzura iyi nyubako, abareba kure bahise babona neza ko izina rya ‘Kigali Arena’ rishobora kuzahinduka, bitewe n’uko ishoramari rya QA Venue Solutions, ikigo kizobereye mu gutegura ibirori ku rwego rwa Afurika, ari ho hantu h’ibanze cyagombaga kugaruriza ayo mafaranga.

Mu masezerano y’imyaka irindwi bari basinyanye na Leta y’u Rwanda, QA Solutions yari yiyemeje kuzakora ishoramari mu bijyanye n’amajwi y’imbere muri iyi nyubako na cyane ko ishobora kwakira ibitaramo, gufasha Abanyarwanda kugira ubumenyi muri uru rwego n’ibindi bitandukanye.

Uretse guteza imbere imikino, Leta yubatse Kigali Arena ifite intego yo kuyibyaza umusaruro mu buryo bw’ubucuruzi, ibyo bikaba byarashobokaga ari uko iyishyize mu maboko y’abantu bafite ubushobozi bwo gutuma yakira ibikorwa byinshi, ari na byo byari bugire ingaruka nziza ku Banyarwanda binyuze mu kubona akazi n’ibindi.

Ubuyobozi bwa QA Venue Solutions bwatangiranye intego yo gutegura nibura ibikorwa biri hagati ya 50 na 100 ku mwaka mu minsi ya mbere, bikazagenda byongerwa bikagera no hejuru ya 200, kuko ubundi Arena z’ahandi zishobora kwakira ibikorwa birenga 400 ku mwaka.

Iyahoze ari Kigali Arena, ubu yabaye BK Arena, yatwaye miliyoni 104$ mu mezi umunani yubatswe

BK ntiyihanitse?

Kimwe mu byagarutsweho ubwo amasezerano hagati ya QA Venue Solutions na Banki ya Kigali yari amaze gusinywa, ni ukwibaza niba afite igisobanuro mu buryo bw’amafaranga. Mu yandi magambo, niba BK izungukira mu ishoramari rya miliyari 7 Frw ikoze mu gihe cy’imyaka itandatu iri imbere.

Hari abavuze ko ayo mafaranga yari gushorwa mu kongera amashami y’iyi Banki, abandi bati “Byari kuba byiza ashowe mu rubyiruko rufite imishinga y’iterambere,” cyangwa se agashyirwa mu bihembo by’ibitekerezo bidasanzwe, mbega ukumva kuyashora mu kugura uburenganzira bwo kwitirirwa iyi nyubako atari ibintu bifite agaciro cyane.

Icyakora icyo BK igamije mu buryo bw’ubucuruzi, ubona ko uyu mushinga ufite ishingiro, bitandukanye n’uko bamwe babifata.

Icya mbere gikwiriye kumvikana ni uko uburenganzira bwo kugurisha izina ry’ibibuga nka za Arena ari ikintu kiri kwamamara cyane muri iyi minsi, ku buryo atari igitangaza kuba QA Venue Solutions yafata iki cyemezo.

Iki kigo gifite uburyo bwinshi gishobora kubyaza umusaruro BK Arena, gusa uburyo bwa mbere bwagombaga kukizanira amafaranga atubutse ni ayagombaga guturuka mu kugurisha uburenganzira bw’izina.

Ntabwo ari mu Rwanda gusa kuko na Dubai Arena yafunguwe ukwezi kumwe mbere ya Kigali Arena, ikaba yakira abantu ibihumbi 17, yaje guhinduka Coca Cola Arena nyuma y’uko Meraas, Ikigo gishinzwe kuyicunga, kigurishije ubwo burenganzira kuri Coca Cola mu gihe cy’imyaka 10 kuva mu 2019.

Ku bakunzi b’umupira w’amaguru, cyane cyane aba FC Barcelona, mugomba kuba mubizi ko mu mwaka utaha w’imikino, Ikibuga cy’iyi Kipe kizatangira cyitwa ‘Spotify Camp Nou,’ nyuma y’uko uru rubuga ruguze uburenganzira bwo kwitirirwa iki kibuga mu gihe cy’imyaka ine izakurikiraho.

Abakunzi ba Arsenal namwe muzi ikibuga cyanyu nka ‘Emirates Stadium,’ nyamara si uko kitakwitwa ‘Arsène Wenger Stadium’ cyangwa irindi zina, ahubwo biterwa n’amasezerano ari hagati ya Arsenal na Fly Emirates. Mu gihe azarangira, ntimuzatungurwe n’uko cyanitwa ‘Visit Rwanda Stadium,’ kuko byose biterwa n’umufuka w’uhifuza.

Icyakora ku rundi ruhande, ntabwo BK ije gutera inkunga QA Venue Solutions kuko iri shoramari rigomba kuba rifite inyungu z’ubucuruzi zizarikurikira na cyane ko BK ari ikigo kigenga ariko kikanagira imigabane ku masoko y’imari by’umwihariko, ku buryo bidashoboka ko ishoramari ringana gutya ritaba rifite inyungu ziryihishe inyuma.

Inyungu ya mbere yumvikanira mu Ijambo Umuyobozi Mukuru wa BK Group Plc, Dr. Diane Karusisi, yavuze mu muhango wo gusinya aya masezerano.

Yaragize ati "Kigali Arena yakira ibikorwa bitandukanye bihuza urubyiruko, kandi nka BK turifuza kwegera urubyiruko, ni nayo mpamvu twazanye ikarita izajya yifashishwa no mu kugura amatike."

Iyi ni ingingo ikomeye kuko BK kimwe n’izindi banki z’ubucuruzi mu Rwanda, zishobora kwisanga mu mutego wo kutegerwa n’urubyiruko, bitewe ahanini n’ihangana rikomeye ryazanywe n’ibigo by’itumanaho, binyuze muri serivisi za ’mobile money.’

Mu bushakashatsi bwa Rwanda Finscope 2020, hagaragajwe ko umubare w’Abanyarwanda bagerwaho na serivisi z’imari uri kuri 93%, aho 77% bagerwaho na serivisi z’imari mu buryo buzwi (formally served). Muri abo, 36% bakoresha uburyo bwa banki mu gihe 87% bakoresha uburyo bwa mobile money.

Mu kiganiro IGIHE yagiranye na Dr. Karusisi mu 2021, yavuze ko ibigo by’itumanaho byuzuzanya na za banki mu gutuma Abanyarwanda benshi babona serivisi z’imari, aho guhanganira abakiliya.

Yaragize ati “Ni amahirwe, tubona ko twuzuzanya kuko iyo ureba mu myaka iri imbere, serivisi zose zizajya zitangwa kuri telefoni…uwo muyoboro wa telefoni tuwubonamo amahirwe ku buryo abakiliya bacu bose bafite telefoni bashobora kubona serivisi byihuse bufite n’umutekano kandi batagombye kujya ku ishami…natwe bizadufasha gucuruza.”

Iyi ngingo irumvikana kuko n’ubundi amafaranga y’ibigo by’itumanaho ajya kubitswa muri banki, ku buryo birangira nta kinini banki ihombye. Icyakora kuva ibigo nka MTN Rwanda byashyiraho ikigo cyihariye gishinzwe kugenzura serivisi za mobile money (MoMo Rwanda Ltd), byatumye benshi bibaza niba iri atari ihangana ryeruye ibigo by’itumanaho bishaka kurema ku bigo by’imari nka banki.

Impamvu ni uko bishobora kuzarangira iki kigo gihindutse banki kandi birashoboka urebeye ku bushobozi gifite, cyane cyane ku bakoresha serivisi zacyo z’imari, iturufu ishobora kugora izindi banki byaba bihanganye.

Ababikurikiranira hafi bazakubwira ko iyi ari yo ntego y’igihe kirekire MTN Rwanda ifite kuri MoMo Rwanda Ltd, ku buryo bikunze neza mu Rwanda bishobora no kwimurirwa mu bindi bihugu iki kigo gifitemo ishoramari, bityo urwego rwa banki rukiyongera ku zindi nzego z’ishoramari gifite.

Biramutse bigeze aha, birumvikana ko BK, n’izindi banki zo mu Rwanda, zaba zibonye ihangana rishya kandi rifite imbaraga, ndetse kugura uburenganzira bwo kwitirirwa BK Arena bikaba bishobora kureberwa mu murongo wo guhangana n’icyo kibazo.

Uretse imikino, ibindi bikorwa byiganjemo ibirori bizajya bibera muri BK Arena, kandi umubare munini w’ababyitabira ni urubyiruko. Uru rubyiruko rwiganje mu bantu boroherwa no gukoresha serivisi za mobile money kurusha iza banki, ku buryo bisaba ko banki zikoresha imbaraga zidasanzwe kugira ngo zibiyegereze.

BK yizeye ko aya masezerano ashobora kuzarushaho gutuma yigarurira urubyiruko, bityo igakomeza gushimangira ubukombe bwayo bitari uyu munsi gusa, ahubwo no mu myaka iri imbere. Mu bushakashatsi bwa Finscope, 18% by’urubyiruko ruri hagati y’imyaka 16 na 24 ntirukoresha serivisi z’imari, ikigero kiri hejuru y’icy’impuzandengo y’igihugu iri kuri 7%.

Benshi muri aba baba bakiri abana, abandi bataratangira gukenera serivisi z’imari, gusa mu isinywa ry’aya masezerano, Dr. Karusisi yavuze ko “Twifuza ko urubyiruko rumenya izina ryacu, rugatekereza BK igihe bifuza guhererekanya amafaranga, [no] gufungura konti, twizera ko nidushobora kwiharira igice kinini cy’isoko ry’urubyiruko [rukoresha serivisi z’imari], bizatugirira akamaro mu gihe kirekire.”

Muri icyo gihe kiri imbere, BK iramutse ishoboye kwigarurira urubyiruko rusa nk’urutitabira gukoresha banki muri iyi minsi, yaba ifite amahirwe yo gukomeza kuyobora urwego rw’imari mu Rwanda, kabone nubwo ihangana ry’ibigo by’itumanaho, byihariye urubyiruko rwinshi, ryarushaho gukaza umurego.

Umuyobozi Mukuru wa BK Group Plc, Dr. Diane Karusisi, yavuze ko BK Arena izabafasha kwigarurira urubyiruko rukunze kwitabira ibitaramo n'ibikorwa by'imyidagaduro

Ijisho ku isoko mpuzamahanga

Ku nyungu ya miliyari 51,9 Frw mu 2021, yazamutseho 35% ugereranyije na 2020, benshi bakunze kwibaza impamvu BK itaratangira kwinjira ku masoko yo mu Karere nka Repubulika Iharanira Demokarasi ya Congo, aho usanga banki zo muri Kenya ziri gusarura akayabo.

Mu kiganiro na IGIHE, Dr. Karusisi yavuze ko kwagukira ku masomo mpuzamahanga ari “Ibintu natwe dutekerezaho. Mu myaka ishize twarebaga uburyo twashyira izindi serivisi zitandukanye z’imari ariko mu Rwanda. Ariko no kureba niba twatwara ubucuruzi bwacu mu Karere, ni ibintu dutekereza ariko nk’uko mubizi u Rwanda ruri mu bihugu bya mbere muri Afurika byoroshya kwakira ishoramari riturutse mu mahanga…ntabwo ari ko bimeze mu bindi bihugu.”

Amasezerano ya BK na QA Avenue Solutions ashobora gufatwa nk’ikindi kimenyetso cy’uko BK iri kureba amasoko mpuzamahanga kuko urebye ibitaramo n’imikino BK Arena izakira, byinshi biri ku rwego mpuzamahanga, ku buryo nta gushidikanya ko bizatuma iyi Banki itangira kubaka izina hanze y’u Rwanda.

Nta kabuza ko iyi Banki igomba kuba iri kureba amasoko nka Centrafrique na Mozambique, aho Perezida Kagame aherutse guhamagarira abashoramari bo mu Rwanda kuhabyaza umusaruro. Kuba BK yajyanayo amashami yayo byakorohereza abashoramari bo mu Rwanda bigatuma batangira kwagukira kuri ayo masoko mbere y’abandi.

Nk’urugero, mu gihe BK yafungura ishami muri Centrafrique byakoroshya ihererekanya ry’amafaranga, ivunjisha, kubona inguzanyo hifashishijwe ingwate iri mu Rwanda bikaba byatekerezwaho, ku buryo ushobora gusanga abashoramari bo mu Rwanda bazamutse vuba muri ibyo bihugu, bikazamura ubukungu bwabo, ubwa BK n’ubw’ibihugu byombi muri rusange.

Ibi kandi binajyana n’uko BK izagurisha izina ryayo mu binyamakuru byo mu Rwanda no hanze yarwo mu gihe biri gukurikirana imikino ibera muri BK Arena, bikazajya bikoresha izina ryayo kandi bitabyishyuriye, nayo ikaba imwe mu nyungu z’igihe kirekire zitezwe na BK muri iri shoramari.

Ku rundi ruhande, nyuma y’igihe abantu bazatangira kumenyera izina BK Arena, bizakomeza gutyo mu gihe cy’imyaka itandatu iri imbere. Nubwo amasezerano atavugururwa nyuma yaho, iyo izina ryamaze gufatisha riguma mu mitwe y’abantu cyane, ku buryo intego ya BK yo kugira imbaraga mu rubyiruko ishobora gukomeza kugerwaho na nyuma y’aya masezerano, ari na yo mpamvu ishoramari ryo kugura uburenganzira ku izina rikunze guhenda kuko na byo inyungu zaryo ziraramba.

Ntabwo ari ibintu byakorwa umunsi umwe, gusa mu gukomeza kwaguka kwa BK, yaba imbere mu gihugu no hanze yacyo, biragaragara cyane ko BK Arena izabigiramo uruhare, ari na yo mpamvu iyi banki yemeye gushora aka kayabo.

Ubwo Perezida Kagame yafunguraga BK Arena mu 2019, icyo gihe yari Kigali Arena
Kigali Arena yahindutse BK Arena
Ibitaramo bikomeye bikunze kwitabirirwa n'urubyiruko biri mu byatumye Banki ya Kigali ishora mu kugura izina rya BK Arena
BK Arena ifite ubushobozi bwo kwakira abantu ibihumbi 10
BK Arena yakiriye imikino itandukanye irimo na Volleyball
BK Arena yakoreshejwe mu bindi bikorwa birimo gutanga inkingo za Covid-19
QA Venue Solutions yashoye mu birimo amatara n'amajwi ku buryo birushaho kurimbisha BK Arena no gukurura ibitaramo byinshi
Ishoramari ry'amatara atuma BK Arena igira isura idasanzwe, ni kimwe mu byo QA Venue Solutions yiyemeje
Ibikorwa bigari n'amahuriro bishobora gukorerwa muri BK Arena
BK Arena yakoreshejwe mu bindi bikorwa birimo gutanga inkingo za Covid-19
QA Venue Solutions yasinye amasezerano y'imyaka itandatu yo kugurisha uburenganzira bw'izina kuri BK

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .