Ni muri urwo rwego mu nkuru yacu twagerageje kubakusanyiriza ahateguwe ibirori n’ibitaramo binyuranye mu rwego rwo gufasha abakunzi babyo kubona aho baryohereza iminsi yabo y’ikiruhuko nyuma y’icyumweru cy’akazi.

Israel Mbonyi agiye gutarama muri Gen-Z Comedy Show 

Abakunzi b’urwenya mu Mujyi wa Kigali bagiye kongera guhurira muri ‘Gen-Z Comedy Show Kigali’, igitaramo giteganyijwe kuri uyu wa 12 Ugushyingo 2026 muri Camp Kigali. 

Iki gitaramo kizayoborwa na Fally Merci, kikazagaragaramo abanyarwenya barimo Rumi, Umushumba, Pilote, Ndegeya, Kadudu, Clement, McKandi na Musa. Umunyamuziki Israel Mbonyi na we azaba ari umushyitsi wihariye muri iki gitaramo.

Abifuza kucyitabira bashobora kugura itike isanzwe ya 5000 Frw, iya VIP ya 10.000 Frw cyangwa iya VVIP ya 20.000 Frw. 

Ish Kevin agiye gusangira n’abakunzi be isabukuru y’amavuko 

Umuhanzi Ish Kevin agiye kwizihiza isabukuru y’amavuko mu birori yise ‘Birthday Bash Party’, bizaba tariki ya 14 Ugushyingo 2026, muri Atelier du Vin i Gikondo mu Mujyi wa Kigali. 

Iki gikorwa kizayoborwa na Marnaud, aho abakunzi b’uyu muhanzi bazahurira mu birori byo kwizihiza umunsi wihariye kuri we. 

Kigali Universe ikomeje gutanga ibirori mu imurikagurisha 

Kigali Universe yateguye imurikagurisha ryiswe ‘Kigali Bridge Expo’, ryatangiye ku wa 9 Ugushyingo rikazasozwa ku wa 15 Ugushyingo 2026. 

Ni igikorwa kigamije guhuza abacuruzi, abahanga mu byo gukora ibihangano bitandukanye n’abaguzi, kibaha umwanya wo kumurika no kumenyekanisha ibyo bakora. 

Gisa cy’Inganzo agiye kumurika album mu gitaramo cyihariye

Gisa cy’Inganzo agiye gukora igikorwa cyo kumurika no kumvikanisha album ye nshya mu gitaramo yise ‘Album Listening Party’, kizaba tariki ya 14 Ugushyingo 2026 muri Paddock Lounge iherereye mu Karere ka Kicukiro. 

Iki gitaramo kizaba umwanya wo kumva indirimbo zigize iyi album no gusabana n’abakunzi b’umuziki. Mu bazasusurutsa abazacyitabira harimo MC Galaxy, Assa Alain, Urban Deejay, DJ Inno, Deejay Kelly 250, Minkky Worldwide na Kevin The Drummer.

Chris Eazy agiye gukorera igitaramo i Burundi

Umuhanzi Chris Eazy agiye gutaramira abakunzi be mu Burundi mu gitaramo cyiswe ‘Sisi Wenyewе Event’, giteganyijwe ku wa 14 Ugushyingo 2026, guhera saa cyenda z’amanywa ahitwa Source du Nil. 

Iki gitaramo kizaba umwanya wo guhura n’abakunzi b’uyu muhanzi bakunda indirimbo ze, mu gihe abategura iki gikorwa bashyizeho ibyiciro bitandukanye by’amatike. Itike isanzwe ni 30.000 Frw, iya VIP ikaba 60.000 Frw, mu gihe iya VVIP igura 600.000 Frw. 

Iki gitaramo kandi kiri mu bikorwa bigaragaza uko abahanzi nyarwanda bakomeje kwagura ibikorwa byabo mu karere.

Logan Joe agiye gutaramira abakunzi be i Huye

Umuhanzi Logan Joe agiye gutaramira abakunzi b’umuziki mu Karere ka Huye mu gitaramo cyiswe ‘Extreme Fridays’, kizaba tariki ya 13 Ugushyingo 2026, muri City Snack Lounge. 

Iki gitaramo kizaba umwanya wo gusabana no kwidagadura ku bakunzi b’umuziki, by’umwihariko abatuye mu Mujyi wa Huye n’abawugana. 

Rotimi na Shifty bagiye gutaramira abakunzi babo muri Leta Zunze Ubumwe za Amerika

Abahanzi Rotimi na Shifty bagiye gukorera igitaramo mu Mujyi wa Boise, muri Leta ya Idaho muri Leta Zunze Ubumwe za Amerika, mu gikorwa cyateguwe na Mambaz Entertainment. 

Iki gitaramo kizaba tariki ya 13 Ugushyingo 2026, guhera saa kumi n’ebyiri z’umugoroba, kibere muri Knitting Factory i Boise. Aba bahanzi bazafatanya n’aba-DJ barimo DJ Habibi, DJ Unruly na DJ Rabeatz mu gususurutsa abazacyitabira.