00:00:00 IGIHE NETWORK KN KINYARWANDA EN ENGLISH FR FRANCAIS

Rubavu: Urujijo ku ishuri rya TVET rimaze imyaka umunani ryubakwa ariko ritaruzura

Yanditswe na Ntabareshya Jean de Dieu
Kuya 19 April 2022 saa 07:54
Yasuwe :

Abaturage bo mu Karere ka Rubavu mu Murenge wa Nyamyumba bagaragaje ko batiyumvisha impamvu ishuri ry’imyuga n’ubumenyingiro rimaze imyaka umunani ryubakwa ariko rikaba ritaruzura.

Ubuyobozi bw’Akarere ka Rubavu busobanura ko impamvu imirimo yo kubaka iri shuri itakomeje ari uko umushoramari wari warahawe isoko hari ibyo atumvikanyeho na rwiyemezamirimo bituma imirimo iharagara.

Bamwe mu baturage bari baganiriye na RBA bavuze ko bifuza kubona iri shuri ryuzura rigakoreshwa kuko ryazatanga umusaruro ku rubyiruko rwa Nyamyumba ndetse n’Akarere muri rusange.

Ni ishuri ryatangiye kubakwa mu 2014, rikaba rifite ibyumba bigera kuri 22 byubatse mu buryo bugeretse.

Ubwo imirimo y’ubwubatsi yatangiraga, Uruganda rwa Bralirwa nirwo rwemeye gutanga ingengo y’imari izakoreshwa nk’umufatanyabikorwa w’Akarere, abaturage nabo batanga ubutaka rizubakwaho na cyane ko ryari ryitezweho guhindura imibereho y’urubyiruko rwa Nyamyumba n’abandi baturiye uyu Murenge.

Umuyobozi w’Akarere ka Rubavu, Kambogo Ildephonse, yabwiye IGIHE ko ikibazo cyabayeho ari uko Uruganda rwa Bralirwa rwagendaga rusimburanya ubuyobozi, biza gutuma imirimo ihagarara kubera kutuzuza amasezerano n’uwubakishaga.

Ati “ririya shuri ryubatswe ku nkunga y’Uruganda rwa Bralirwa, hanyuma uwarwubakaga aza kugira ikibazo ntiyarirangiza bitewe n’amasezerano bari bafitanye. Uko ubuyobozi bwagendaga busimburana n’Uruganda ntibabasha kuryubaka ngo baryuzuze.”

Kambogo yavuze ko Ubuyobozi bw’Akarere buheruka kugirana ibiganiro n’ubuyobozi bwa Bralirwa kugira ngo harebwe niba rushobora gukomeza imirimo yo kuryubaka.

Ati “Mu Ntangiriro z’uku kwezi twagiranye ibiganiro by’uko batubwira niba bagiye gukomeza kuryuzuza cyangwa niba batazakomeza natwe tukazabishyira mu ngengo y’imari y’Akarere. Baduhaye ko mu mpera z’ukwezi bazaba baduhaye igisubizo ariko ikigaragara cyo ni uko bari biteguye kurirangiza.”

Yavuze ko impamvu bari bifuje ko iri shuri rigirwa iryigisha imyuga n’ubumenyingiro ari uko muri aka Karere hari imirimo ikeneye gushyirwamo imbaraga kandi n’uruganda rukazabyungukiramo kuko rukenera abo bakozi.

Ati “Impamvu dushaka kurigira TVET ni uko hari imirimo myinshi ikenewe mu Karere kacu ndetse n’uruganda narwo rukenera abantu basudira, bakanika, mu mazi ubwato bukeneye gukanikwa na moteri zabwo zigakorwa kandi byari biri mu rwego rwo kugira ngo abantu bishakire akazi kandi bahange n’akazi.”

Yavuze ko mu gihe Bralirwa yagaragaza ko ititeguye gukomeza gutanga ingengo y’imari yazakoreshwa mu kubaka iryo shuri, Akarere ka Rubavu kabishyira mu ngengo y’Imari y’umwaka utaha cyane ko ryitezweho umusaruro mu iterambere ryako.

Amakuru avuga ko byari biteganyijwe ko rizuzura ritwaye miliyoni 150 Frw nubwo ihagarikwa ry’imirimo rishobora kuzagira ingaruka kuko zimwe mu nyubako zatangiye kwangirika.

Kuri ubu mu Rwanda habarurwa amashuri 453 ya TVET agizwe n’amashuri ya Leta n’afashwa nayo 260 n’ayigenga 193. Yose hamwe yigwamo n’abanyeshuri 93 485 bangana na 31,9% mu gihe intego y’igihugu ari uko nibura abanyeshuri bazaba bitabira ayo mashuri ku kigero cya 60% mu 2024.

Ishuri rimaze imyaka umunani ryubakwa ariko ritaruzura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .