Padiri Ubald Rugirangoga umaze igihe arwaye Covid-19 yifurije abantu Noheli nziza

Yanditswe na Muhonzire Sylvine
Kuya 26 Ukuboza 2020 saa 04:06
Yasuwe :
0 0

Padiri Ubald Rugirangoga uzwi mu bikorwa byo gusengera abarwayi,yifurije abantu Noheli Nziza nyuma y’amezi abiri arwaye Coronavirus mu bitaro byo muri Leta Zunze Ubumwe za Amerika.

Mu mpera z’Ukwakira nibwo hatangajwe ko Padiri Ubald Rugirangonga yanduye Coronavirus ndetse ari kwitabwaho n’abaganga. Kuri uyu wa Gatanu ku nshuro ya mbere nibwo yagaragaye ku mashusho yifuriza abantu Noheli nziza, bitanga icyizere ko arimo koroherwa.

Amashusho yagaragaye ya Padiri Ubald Rugirangoga yari aryamye ku gitanda cy’abarwayi, hagaragara umutwe n’igice gito k’igihimba, yambaye ingofero ikozwe mu budodo y’amabara y’umutuku n’icyatsi, gusa ubona ko arwaye, ari kwifuriza abantu Noheli nziza ndetse anabashimira ku masengesho yabo .

Mu magambo make yavuze, yagize ati “ Ubald uri mu bitaro arabifuriza Noheli nziza, mwarakoze kunsengera ndi koroherwa, mwarakoze cyane ndabashimira ku bw’amasengesho yanyu.”

Padiri Rugirangonga kandi akeneye, inkunga y’amafaranga angana n’ibihumbi 150$ ni ukuvuga miliyoni 148.5 Frw, kugira ngo ahabwe ubuvuzi buzamufaha kongera gukira neza kuko abaganga bavuze ko agowe no guhumeka mu gihe atari ku byuma bimwongerera umwuka.

Kugeza ubu Ubald arwariye muri Leta Zunze Ubumwe za Amerika mu bitaro bya Kaminuza ya Utah Hospital mu mujyi wa Salt Lake.

Bikekwa ko Padiri Ubald yarwaye Covid-19 ayikuye mu mujyi wa Green Bay muri Leta ya Wisconsin aho yari yagiye gukora ibikorwa by’isanamitima mu ntangiriro z’Ukwakira.

Katsey Long, Inshuti ye yanamusuye ubwo yari arwariye mu bitaro bya St. John’s Health muri Jackson, avuga ko nubwo Padiri Rugirangonga ibipimo bigaragaza ko atakirwaye Coronavirus, ariko iyi ndwara yamusigiye ubundi burwayi bwamuzahaje.
Long avuga ko mu burwayi afite harimo kuvura kw’amaraso, ndetse mu bihaha bye harimo amazi ndetse n’udukoko, byose byatewe na Covid-19.

Padiri Rugirangoga Ubald yamenyekanye cyane kubera ibikorwa by’isanamitima n’ibindi byiganjemo ibyo gusengera abarwayi bagakira. Amaze imyaka irenga 32 yarihaye Imana.

Mu mwaka wa 2015 Padiri Ubald yagizwe umurinzi w’igihango kubera uruhare yagize mu gutangiza gahunda y’Ubumwe n’Ubwiyunge muri Paruwasi ya Mushaka, ikaba yarabyaye imbuto nyinshi mu baturage ndetse inarenga imbibi igera no mu zindi Paruwasi.

Padiri Ubald yifurije abantu Noheli Nziza, abasaba gukomeza kumusengera

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .