Padiri Aloys Guillaume wabaye Umuyobozi w’amashuri Gatulika mu Rwanda yitabye Imana

Yanditswe na Prudence Kwizera
Kuya 13 Ukuboza 2020 saa 03:08
Yasuwe :
0 0

Padiri Aloys Guillaume wakoreraga umurimo w’Imana muri Diyoseze ya Butare yitabye Imana mu ijoro ryo kuri uyu wa Gatandatu tariki ya 12 Ukuboza 2020 azize impanuka y’imodoka.

Iyo mpanuka yayikoze avuye i Kigali ageze i Mwurire mu Murenge wa Mbazi mu Karere ka Huye. Yari ari kumwe n’abandi bantu babiri bakomeretse bikomeye, barimo umushoferi wari umutwaye wa Economat General ya Butare, bari kuvurirwa mu Bitaro bya CHUB.

Mu itangazo ryatanzwe na Musenyeri Philippe Rukamba, Umwepiskopi wa Diyosezi ya Butare, yavuze ko Padiri Aloys Guillaume yitabye Imana mu ijoro ryo kuri uyu wa Gatandatu azize impanuka y’imodoka, ko itariki yo kumushyingura bazayitangaza nyuma.

Padiri Aloys Guillaume yahawe ubusaseridoti ku wa 26 Nyakanga 1981 ahita ajya kuba Padiri wungirije muri Paruwasi ya Cyahinda mu Karere ka Nyaruguru kugera mu 1983.

Muri Nzeri 1983 yabaye umwarimu ashinzwe n’amasomo mu Iseminari Ntoya ya Karubanda (Petit séminaire Virgo Fidelis). Nyuma y’umwaka umwe muri Nzeri 1984 yashinzwe amashuri yisumbuye muri Diyoseze ya Butare.

Nyuma y’imyaka itatu muri Nzeri 1987 yagiye kwiga i Tours mu Bufaransa amarayo imyaka itatu, agarutse mu Ukuboza 1990 yabaye Aumonier mu yahoze ari Kaminuza Nkuru y’u Rwanda (UNR) ushinzwe gukurikirana ubuzima bwa roho, abifatanya no kwigisha mu Iseminari Nkuru i Nyakibanda.

Mu 1991 yabaye Padiri Mukuru wa Paruwasi Univestaire St Dominique, nyuma yaho mu Ukwakira 1994 yashinzwe amashuri Gatulika muri Diyoseze ya Butare. Mu 1997 yabaye Umuyobozi w’amashuri Gatulika mu Rwanda.

Mu 2006 yasubiye kwiga mu Bufaransa agaruka mu 2011 aba umwarimu mu Iseminari Nkuru ya Nyakibanda ari n’umuyobozi wungurije wayo.

Muri Kanama 2017 yabaye Padiri Mukuru wa Cathedrale ya Butare, nyuma y’umwaka umwe muri Kanama 2018 aba uhagarariye amashuri gatulika muri Diyoseze ya Butare.

Yitabye Imana yari Intumwa ya Musenyeri ishinzwe Ubuzima bw’Abihayimana muri Diyoseze ya Butare, umwanya yagiyeho mu Ugushyingo 2020.

Padiri Aloys Guillaume yarokotse Jenoside yakorewe Abatutsi muri Mata 1994. Abamuzi n’abababaye hafi ye bavuga ko ari umuntu wakundaga abantu kandi Abanyarwanda bose yababereye Umusaserodoti mwiza.

Yakundaga siporo ndetse akiri muto yabaye umukinnyi wa Mukura Victory Sports. Yakinaga na Volleyball.

Padiri Aloys Guillaume yitabye Imana azize impanuka y'imodoka
Padiri Aloys Guillaume yari Intumwa ya Musenyeri ishinzwe Ubuzima bw’Abihayimana muri Diyoseze ya Butare

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .