00:00:00 IGIHE NETWORK KN KINYARWANDA EN ENGLISH FR FRANCAIS

Nta kindi gihugu kigeze cyitegura CHOGM neza nk’u Rwanda- Patricia Scotland

Yanditswe na Akayezu Jean de Dieu
Kuya 12 March 2021 saa 10:22
Yasuwe :

Umunyamabanga Mukuru w’Umuryango uhuza Ibihugu bikoresha ururimi rw’Icyongereza, [Commonwealth], Patricia Scotland, yashimangiye ko nta kabuza, inama ihuza abakuru b’ibihugu na za guverinoma zo muri uyu muryango izabera i Kigali muri Kamena 2021.

Iyi nama izwi nka CHOGM [The Commonwealth Heads of Government Meeting], isanzwe iba nyuma ya buri myaka ibiri, yagombaga kuba yarabereye mu Rwanda ku wa 22–27 Kamena 2020, iza gusubikwa ku mpamvu z’icyorezo cya COVID-19, cyatumye inama n’ibindi bikorwa bikomeye bisubikwa.

Nyuma yo gusuzuma imiterere y’icyorezo cya COVID-19, Ubunyamabanga Bukuru bwa Commonwealth, bwaje kwanzura ko iyi nama igomba gusubukurwa ikaba mu Cyumweru cya 21 Kamena 2021, ndetse kuri ubu ibijyanye n’imiteguro irimo za site zizaberaho iyi nama, amahoteli azakira abazayitabira, imihanda ndetse n’ibindi bikorwa remezo irarimbanyije.

Umunyamabanga Mukuru wa Commonwealth, Patricia Scotland, ari mu ruzinduko rw’iminsi itatu mu Rwanda, rugamije kurushaho kurebera hamwe aho imyiteguro ya CHOGM igeze.

Kuri uyu wa Kane, Patricia Scotland yakiriwe n’Umukuru w’Igihugu, Paul Kagame ndetse mbere yari yabanje guhura na Minisitiri w’Ububanyi n’Amahanga n’Ubutwererane w’u Rwanda, Dr. Vincent Biruta, bifatanya mu birori byo kwizihiza Umunsi Mpuzamahanga wa Commonwealth.

Mu kiganiro yagiranye na RBA, Patricia Scotland yashimangiye ko iyi nama izabera mu Rwanda muri Kamena 2021.

Yagize ati “Dufite ubushake bwo gukorera iyi nama ya CHOGM i Kigali kandi muri Kamena 2021. Isi yanyuze mu bihe bikomeye cyane, igihe twateguraga iyi nama muri Werurwe umwaka ushize dutekereza ko izaba muri Kamena 2020, ntabwo twari tuzi ko COVID-19 izagera kuri uru rwego, niyo mpamvu twayisubitse kuko twari dufite icyizere ko icyorezo cyagombaga kuba cyararangiye muri Kamena ariko ntabwo ariko byagenze.”

Yakomeje agira ati “Dufite intego yo gukora uko dushoboye kose kugira ngo tuzahurire aha ngaha i Kigali tariki 21 Kamena uyu mwaka, turashaka kuba hamwe nk’Umuryango tumaze igihe dukora inama zacu dukoresheje ikoranabuhanga. Inama za mbere zabaye hifashishijwe ikoranabuhanga ariko hari abantu benshi bafite icyizere cy’uko twahura nk’uko twicaye ubu tukaganira imbonankubone.”

Patricia Scotland ari mu Rwanda nyuma y’iminsi mike itsinda ry’intumwa za Commonwealth rihavuye, aho bishimiye aho igihugu kigeze imyiteguro yo kwakira inama ya CHOGM. Icyo gihe Umuyobozi Mukuru Ushinzwe Imiyoborere n’Amahoro muri Commonwealth, Luis G Franceschi, yavuze ko imyiteguro ikomeje kugenda neza.

Patricia Scotland nawe yagaragaje ko uburyo yasanze u Rwanda rwiteguye kwakira CHOGM ari nta kindi gihugu barabona kirageza kuri urwo rwego.

Ati “U Rwanda ruriteguye neza! Iyo utekereje uko aho inama izabera hubatswe ,itsinda ririmo gutegura CHOGM ririmo gukurikirana iki gikorwa umunsi ku munsi, barimo gukurikirana ikintu ku kindi. Ntabwo turabona igihugu kiteguye gutya CHOGM nk’u Rwanda.”

Yakomeje agira ati “Dufite ibyishimo, ni ibintu bishimishije kubona abantu bitanga, barakora ibyo bishimiye kandi bakorana n’umwete.”

Ubunyamabanga Bukuru bwa Commonwealth, butangaza ko iyi nama iteganyijwe kwitabirwa n’ababarirwa hagati ya 7000 na 10 000, barimo abakuru b’ibihugu na za guverinoma, abayobora ibigo bikomeye, abahagarariye inzego zirimo urubyiruko, abagore n’abandi.

Mu ngingo zizaganirwaho harimo ingamba zo guhangana n’icyorezo cya COVID-19, ikibazo cy’imihindagurikire y’ibihe, uburinganire no guteza imbere ubucuruzi mu bihugu bihuriye muri Commonwealth.

Iyi nama imara Icyumweru, ntabwo abakuru b’ibihugu baza ngo bateranire hamwe, ahubwo habanza inama z’amahuriro ane; iy’ubucuruzi, urubyiruko, abagore n’ihuriro rya za sosiyete sivile.

Aya mahuriro aba ari manini afite abantu 1500 cyangwa1000, ku buryo inama zayo zimara iminsi ibiri cyangwa itatu ziganira ku ngingo zizireba. Imyanzuro yazo igezwa ku nama y’abakuru b’ibihugu itangira kuwa Kane kugeza kuwa Gatandatu.

Imyiteguro ya CHOGM i Kigali

U Rwanda rwemerewe kwakira Commonwealth mu mwaka wa 2018, kuva icyo gihe rutangira imyiteguro ikomeye yo kwitegura iyo nama, yaranzwe no kubaka ndetse no kwagura ibikorwa remezo birimo imihanda n’ibindi bitandukanye.

Kugira ngo igihugu cyemererwe kwakira CHOGM bisaba ko cyerekana ubushake hakabaho kureba ko igihugu gifite ubushobozi. Mu kureba ubwo bushobozi harebwa ibintu bitandukanye, birimo aho inama izakirirwa, indege zigana aho hantu, uko bantu babona Visa, umutekano, imiyoborere n’ibindi.

Kwakira neza Inama Mpuzamahanga ziri ku rwego rwo hejuru, ku Rwanda ni ibintu ruhora rushimirwa n’amahanga ndetse na raporo zitandukanye zigenda zibigaragaza.

By’umwihariko CHOGM, ibikorwa byo kuyitegura byatangiye mu mpera za 2019, [cyane ko yagombaga kuba mu 2020], icyo gihe Guverinoma yari yemeje ingengo y’imari ya miliyari 20.1 Frw zigenewe ibikorwa bibanziriza CHOGM, harimo miliyari 10.87 Frw zari zagenewe kwagura aho indege ziparika ku Kibuga Mpuzamahanga cya Kigali i Kanombe n’ibindi bikorwa ku kibuga.

Ibindi bikorwa bijyanye no kwitegura iyi nama birimo kubaka ibikorwa remezo birimo imihanda biri gukorwa amanywa n’ijoro, imihanda mishya ikubakwa ndetse iyari isanzwe nayo ikagurwa.

Mu gihe habura amezi atatu gusa kugira ngo abakuru b’ibihugu na za Guverinoma 54 zigize Commonwealth bahurire i Kigali kandi amatsinda ya Commonwealth akomeje gusimburanwa mu Rwanda areba aho imyiteguro igeze.

Site zizaberaho iyi nama zikomeje gutegurwa, ibikorwa bikurikiranwa n’itsinda ryashyizweho n’uyu muryango rishinzwe gutegura Commwealth ndetse kuri uyu wa Kane, abakozi bo mu mahoteri azakira iyi nama bakingiwe icyorezo cya COVID-19, mu rwego rwo gukomeza kwitegura.

Biteganyijwe ko inama nkuru izabera muri Kigali Convention Centre naho izindi zigende zibera yaba muri Kigali Conference & Exhibition Village, Marriot Hotel na Serena Hotel. Nyuma yo kwakira iyi nama Perezida Kagame azaba Umuyobozi wa Commonwealth imyaka ibiri ikurikira.

Umuryango w’Ibihugu bikoresha ururimi rw’Icyongereza, Commonwealth ubarizwamo ibihugu 54 birimo n’u Rwanda. Byose hamwe bifite abaturage miliyari 2.4, barimo urubyiruko ruri hasi y’imyaka 30 rungana na 60%.

Perezida Kagame yakiriye mu Biro bye Umunyamabanga Mukuru w’Umuryango uhuza Ibihugu bikoresha Ururimi rw’Icyongereza, Commonwealth, Patricia Scotland, bagirana ibiganiro byihariye
Perezida Kagame yagiranye ibiganiro na Scotland washimye imyiteguro y'u Rwanda yo kwakira CHOGM
Patricia Scotland (ibumoso) ubwo yakirwaga na Minisitiri Biruta kuri uyu wa Kane
Patricia Scotland na Dr Biruta baganiriye ku ngingo zitandukanye z'ibibazo byugarije isi
Scotland na Dr Biruta baganiriye ku myiteguro ya CHOGM no ku bindi bibazo bihangayikishije isi
Patricia Scotland yavuze ko yasobanuriwe aho u Rwanda rugeze imyiteguro y'inama ya CHOGM iteganyijwe muri Kamena 2021

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .