Nshimiyimana wari umuyobozi w’umutwe udasanzwe wa FDLR yafashwe mpiri n’ingabo za RDC

Yanditswe na Evariste Nsengimana
Kuya 4 Ukuboza 2019 saa 12:45
Yasuwe :
0 0

Ingabo za Repubulika Iharanira Demokarasi ya Congo (FARDC) zatangaje ko zafashe mpiri umuyobozi mukuru wungirije w’umutwe udasanzwe w’inyeshyamba za FDLR (FDLR-CRAP).

Uyu muyobozi uzwi ku izina rya Nshimiyimana Asifiwe Manudi yafatiwe i Goma mu gace ka Ndosho, ku wa Mbere taliki ya 2 Ukuboza 2019.

Ikinyamakuru L’Interview cyanditse ko Umuvugizi w’ibikorwa byo guhashya imitwe y’itwaje intwaro mu Burasirazuba bwa Congo, Major Guillaume Ndjike Kaiko, yahamije ko Nshimiyimana yafashwe, ashima inzego z’ubutasi n’abaturage bo muri Ndosho bagize uruhare muri icyo gikorwa.

Nyuma yo gutangaza ko yafashwe, Maj Guillaume yavuze ko amakuru yisumbuye aza kuyatanga nyuma.

Nshimiyimana afashwe nyuma y’ibikorwa ingabo za FARDC zimaze iminsi zikorwa byo guhiga bukware imitwe y’inyeshyamba ikambitse muri icyo gihugu, igira uruhare mu guteza umutekano mucye no mu Karere.

Ibyo bikorwa by’umwihariko umutwe wa FDLR ni umwe mu yahazaharijwe cyane cyane nyuma y’urupfu rw’uwari umuyobozi wawo, Gen Mudacumura Sylvestre.

Gen. Mudacumura yishwe nyuma y’uko mu 2016, Major Sabimana Iraguha uzwi ku mazina ya Mugisha Vainqueur wari ukuriye abamurindaga, yafashwe n’Ingabo za Repubulika Iharanira Demokarasi ya Congo (FARDC).

FDLR ni umwe mu mitwe y’iterabwoba n’inyeshyamba irwanira mu burasirazuba bwa RDC yakunze gushyirwa mu majwi guhungabanya umutekano w’Akarere. Ugizwe na bamwe mu bagize uruhare muri Jenoside yakorewe abatutsi.

Uretse FDRL, mu burasirazuba bwa Congo hari indi mitwe igira uruhare rukomeye mu guhungabanya umutekano irimo ADF, Mai-Mai Mazembe, Nyatura, NDC n’iyindi.

Nshimiyimana Asifiwe Manudi yafatiwe i Goma mu gace ka Ndosho, ku wa Mbere taliki ya 2 Ukuboza 2019.

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza