Kwa muganga no kuri Banki: Serivisi zirakomeje i Kigali hirindwa coronavirus (Video)

Yanditswe na Twarabanye Venuste
Kuya 24 Werurwe 2020 saa 03:18
Yasuwe :
0 0

Mu gihe ubuzima bwahindutse ku Isi bitewe n’ingamba zo kwirinda coronavirus, mu Rwanda hari inzego zakomeje gutanga serivisi; zirimo kwa muganga, muri banki, sitasiyo za lisansi n’ahandi ndetse zose ugasanga zishyize imbere ingamba zo kwirinda zashyizweho na Minisiteri y’ubuzima.

Kuwa Gatandatu tariki 21 Werurwe 2020 saa 23:59, nibwo hasohotse amabwiriza avuga ko ingendo zitari ngombwa zihagaritswe mu Rwanda, abantu basabwa guhagarika gusohoka mu rugo nta mpamvu zihutirwa, uretse abajya gutanga no gushaka serivisi z’ingenzi zirimo kwivuza, guhaha, serivizi za banki n’izindi.

IGIHE yasuye amabanki, ibitaro bitandukanye, sitasiyo za lisanzi na mazutu ndetse iganira n’abantu batandukanye bari batwaye imizigo kuri moto bavuye guhaha. Hari mu rwego rwo kureba uko ibikorwa bimwe na bimwe bikomeje mu bihe bitoroshye byo kwitwararika hirindwa coronavirus.

Ku bitaro bya Kacyiru n’ibya Muhima umunyamakuru yagezeho, hari uburyo bwo gukaraba intoki umuntu akibyinjiramo, no gupima umuriro.

Nka kimwe mu bimenyetso byibanze bya coronavirus, iyo umuntu agaragaje ibipimo bigeze kuri dogere selisiyusi 38 abazwa ibindi bibazo bifasha kumva niba akeneye gusuzumwa agafashwa, yaba afite umuriro usanzwe agakomeza ajya gushaka serivisi imuzanye.

Umuyobozi w’ibitaro bya Muhima, CSP Dr. Nkubito Pascal yavuze ko umwihariko w’iyi minsi ari uwabajya kwa muganga bikekaho coronavirus. Muri abo ngo abo basanze bafite ibimenyetso bafatirwa ibizamini, abandi bagahumurizwa bagataha.

Ati “Turabakira ariko ni ngombwa kujonjora tukareba niba ibyo bimenyetso agaragaraza bifitanye isano na coronavirus.”

Amabwiriza ya Minisiteri y’Ubuzima avuga ko umuntu wikekaho coronavirus aguma mu rugo kandi akishyira mu kato ubundi agahamagara telefoni itishyurwa 114 ababishinzwe bakamufasha.

Mu bitaro bya Kacyiru, Mugisha Steven uvura indwara z’abagore, akaba ashinzwe indwara zanduza n’isuku muri ibyo bitaro, yavuze ko muri rusange serivisi zose zo kwa muganga zakomeje nkuko bisanzwe.

Icyakora kuri uyu wa Mbere abarwayi bagabanyutse, ndetse ngo amakuru bamenye ni uko hari ababuze uko bagera kwa muganga kubera kubura ibinyabiziga.

Ati “Kubera ingamba za leta zo kubaganya ingendo zitari ngombwa. Hari bamwe na bamwe bagiye batubwira ko kuza kwa muganga byagoranye.”

Mu ngamba ziherutse gufatwa harimo ivuga ko imodoka zitwara abagenzi mu mijyi zirakomeza gukora hubahirijwe intera ya mereto imwe hagati y’abagenzi. Ku munsi wakurikiyeho hakoze imodoka nkeya ariko kuri uyu wa mbere tariki 23 Werurwe 2020 ntabwo zakoze.

Abagore batwite bagomba kwipimisha ni bamwe mu babwiye IGIHE ko kugera kwa muganga byabagoye. Niyonsenga Hyacinthe yari yaturutse Karuruma mu Murenge wa Gatsata mu Karere ka Gasabo aherekeje umugore utwite. Yavuze ko bavuye mu rugo bazi ko bagera muri gare ya Nyabugogo.

Ati “Twavuye mu rugo saa kumi n’imwe (5h00) tugera Nyabugogo tuzi ko tubona ikitugeza hano tubona nta modoka ihari tuza n’amaguru, tugera hano tukaba tugiye gusubirayo n’andi.”

Mugenzi we, Ntawuhiganayo Claude yari yaherekeje umugore we kwipimisha inda baturutse ku Gisozi, yavuze ko nabo bagiye n’amaguru cyakora kuri bo urugendo ntirwari rurerure nk’urw’abavuye mu Gatsata.

Ati “Urugendo rwo kugera aha ngaha rwari rugoye cyane. Naje mperekeje umugore wanjye kuko twabuze icyo dutega, ariko twaje kugera ahangaha ntakibazo. No gusubirayo twiteguye kugenda gake gake.”

Ku bitaro uhasanga abakozi bacuruza Mobile Money bafasha abantu kubitsa kugira ngo babashe kwishyura bakoresheje ikoranabuhanga.

Serivisi za Banki nazo zakomeje

Muhawenimana Noel Ushinzwe Ubucuruzi muri Bank of Africa, yavuze ko iyo banki yakomeje ibikorwa byayo nkuko amabwiriza ya Minisitiri w’Intebe abiyemerera.

Ati “Ubuzima ntabwo bwahagaze twakoze hano ku cyicaro gikuru no ku mashami yacu mu mujyi wa Kigali no hanze ya Kigali ari kwakira abakiliya.”

Ibijyanye n’abacuruzi bazagirwaho ingaruka na coronavirus bakorana n’iyo Banki yavuze ko izabikora nkuko Banki Nkuru y’u Rwanda yabitangaje iborohereze kwishyura.

Iyi banki itanga ubutumwa ku bakiliya bayo bwo kwishyura, serivisi zitandukanye batavuye mu rugo ahubwo bagakoresha ikoranabuhanga. Hari ukwishyura amazi, umuriro, imisoro n’ibindi bitandukanye bijyanye no kwishyurana no guhererekanya amafaranga.

Abamotari bake umunyamakuru yahuye nabo bari bafite casque imwe bambaye batwaye ibyo bavuye guhaha. Abakora kuri sitasiyo za lisanzi nabo bavuze ko ubucuruzi bwagabanyutse kubera ibigo byinshi byahagaritse imirimo ariko ko bose bahuriza ko kwirinda no gutsinda icyorezo aribyo by’ingenzi. Icyizere ari cyose cyo gukomeza imirimo nyuma yacyo.

Mu bitaro bya Kacyiru, Mugisha Steven uvura indwara z’abagore, akaba ashinzwe indwara zanduza n’isuku muri ibyo bitaro, yavuze ko muri rusange serivisi zose zo kwa muganga zakomeje nkuko bisanzwe
Umwe mu basanzwe bakora akazi ko gutwara abagenzi kuri moto yari avuye guhaha
Abari basanzwe batwara abagenzi kuri moto , ibinyabiziga byabo bari kubikoresha bahaha
Niyonsenga Hyacinthe yari yaturutse Karuruma mu Murenge wa Gatsata mu Karere ka Gasabo aherekeje umugore utwite amuzanye ku bitaro bya Kacyiru
Umuyobozi w’ibitaro bya Muhima, CSP Dr. Nkubito Pascal yavuze ko umwihariko w’iyi minsi ari uwabajya kwa muganga bikekaho coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .