00:00:00 IGIHE NETWORK KN KINYARWANDA EN ENGLISH FR FRANCAIS

Kirehe: Imishinga igamije guhangana n’ingaruka z’imihindagurikire y’ibihe yatangiye kubyara umusaruro

Yanditswe na Kanamugire Emmanuel
Kuya 8 Ugushyingo 2022 saa 09:35
Yasuwe :

Mu gihe ingaruka z’imihindagurikire y’ibihe by’umwihariko ku bikorwa by’ubuhinzi mu Karere ka Kirehe zirushaho kugira ubukana, imishinga mito ibyara inyungu yatangijwe ku bufatanye bwa Minisiteri y’Ibidukikije n’izindi nzego iratanga icyizere cyo kugoboka abagenerwabikorwa.

Imiterere y’Akarere ka Kirehe ituma katagusha imvura nyinshi ariko iyo iguye iteza isuri mu duce tumwe na tumwe twako ikangiza byinshi birimo n’ibihingwa.

Magingo aya mu mirenge itandukanye bagushije imvura nke mu ntangiriro za Nzeri gusa, ku buryo imbuto bahinze zanze kumera izindi zibaburwa n’izuba.

Ntakirutimana Jean Nepomuscene wo mu Kagari ka Gasarabwayi mu Murenge wa Musaza, yavuze ko ubusanzwe mu Ugushyingo bajyaga baba bafite ibigori bimeze neza ariko ubu ibyo bateye byanze kumera none bifashe mapfubyi.

Mugenzi we, Manirareba ELizaphan yavuze ko bashobora kugarizwa n’inzara dore ko nta bushobozi bwo kubona indi mbuto ngo babe bakongera guhinga mu gihe imvura yaba yongeye kuboneka. Uretse ibyo kandi ngo igihembwe cy’ihinga kigeze kure.

Si umwihariko w’uyu murenge ahubwo ingaruka z’izuba ryinshi ziboneka hirya no hino muri Kirehe mu Karere katagira amashyamba ashobora gukurura ubuhehere. Aho bagerageje gutera ibiti ngo ntibimera n’ibihonotse ubushyuhe bwinshi biribwa n’umuswa nk’uko Ntakirutimana yakomeje abisobanura.

Izuba ryabaye rirerire bituma ntacyo abaturage biteze gusarura
Mu duce twinshi tw'Umurenge wa Musaza muri Kirehe, imyaka yahinzwe ntiyigeze imera
Imyaka yatewe yrameze ariko ikubitwa n'ubushyuhe irangirika yose

Ibikorwa by’umushinga wo kugabanya ingaruka z’imihindagurikire y’ibihe babibonamo igisubizo

Umushinga wo kugabanya ingaruka ziterwa n’imihindagurikire y’ibihe mu kibaya cy’Ikiyaga cya Victoria (Adaptating to Climate Change in Lake Victoria Basin: ACC) ushyirwa mu bikorwa na Komisiyo y’Ikibaya cy’Ikiyaga cya Victoria (Lake Victoria Basin Commission: LVBC), ku ruhande rw’u Rwanda, ibikorwa byawo biri mu Karere ka Kirehe mu mirenge ya Gatore, Musaza na Gahara.

Washowemo ibihumbi 520 by’amadolari ya Amerika ni ukuvuga agera kuri miliyoni 520 z’amafaranga y’u Rwanda nk’uko Umuhuzabikorwa wawo, Muhawenimana Seth yabisobanuye.

Mu Murenge wa Gatore ingo 160 zasaniwe inzu zinahabwa ibigega bifata amazi y’ibisenge mu rwego rwo gukemura ikibazo cy’isuri yatwaraga ubutaka akanangiza igishanga cya Kijumbura gihingwamo umuceri.

Kuba abaturage barahawe ibigega bifata aamzi byanakemuye ikibazo cy’ibura ryayo kuko yavaga kure bikagora imiryango kubona ayo ikoresha imirimo yo mu rugo n’igihe bakeneye kuhira amatungo nk’uko byatangajwe na Munyaneza Eliab wo mu Kagari ka Rwantonde, umwe mu bagenerwabikorwa.

Yagize ati “Aya mazi ntibyari kunshobokera kuyabona iyo hatabaho guterwa inkunga. Aho twavomaga hari kure; ni mu birometero nka bitanu. Abana bajyaga kuvoma saa kumi z’igitondo bagakererwa kujya ku ishuri cyangwa bakicwa n’izuba kubera urugendo rurerure; ubu izo ngorane ntizigihari.”

Mu Murenge wa Musaza hatewe inkunga imishinga iciriritse ibyara inyungu irimo iy’ubuhinzi bw’urusenda, ubworozi bw’ingurube n’ihene, ubukorikori burimo ububoshyi n’ubudozi bw’imyenda no gutunganya umusatsi by’umwihariko ku bakoreraga ubuhinzi mu nkengero z’Umugezi w’Akagera bwangizaga amazi yawo.

Muhayimana Aurea, umuyobozi w’itsinda ry’abakora ubudozi n’ububoshyi bw’imyenda ryatewe inkunga ya miliyoni indwi z’amafaranga y’u Rwanda, yavuze ko uretse no kuba ibikorwa byabo byaragiraga uruhare mu kwangiza amazi y’Akagera na bo ubwabo bari babayeho nabi.

Ubu ngo hari impinduka mu miryango yabo; abana bariga, bakabona uko bishyura ubwisungane mu kwivuza babihawe n’amafaranga binjiza avuye mu budozi.

Ati “Twari dufite ikibazo ko habagaho ikirere kibi tukajya mu gishanga cy’Akagera tukangiza ibidukikije ariko ubu ntitukijyayo, turadoda tukiteza imbere. Mu gihe kizaza turashaka kuzafasha n’abo mu Murenge wa Gatore na bo bakiga kudoda kugira ngo na bo babashe kuzamuka n’abana babo batere imbere.”

Ubudozi buri mu mishinga iciriritse ibyara inyungu yatangiye gufasha abahinzi muri iki gihe izuba rikomeje gutuma badakomeza imirimo yabo

Ngendahayo Etienne uhagarariye itsinda ry’abahinzi b’urusenda mu Murenge wa Musaza, yavuze ko bahisemo uyu mushinga kuko urusenda rushobora kuvana umuntu mu bukene vuba bitewe n’uko rwera kabiri mu mwaka kandi rukagira umusaruro mwinshi.

Ikilo ntikijya munsi y’amafaranga 1000. Ngo rutanga umusaruro uruta uw’ibindi bihingwa kandi ntirujya rubura isoko.

Ngendahayo yakomeje agira ati “Mbere imyaka yacu yarangirikaga kubera izuba ryinshi ariko ubu umushinga waduteye inkunga tugura imashini zo kuhira.”

Mu nyungu bamaze kubona bishyuriye abanyamuryango iby’ibanze bakeneye harimo ubwisungane mu kwivuza banagurirwa amatungo magufi. Baguye ubutaka bahingagaho bugera kuri hegitari eshatu zivuye kuri imwe n’igice bakaba bafite gahunda yo gukomeza kongera ibikorwa kugeza ubwo buri munyamuryango azagurirwa inka.

Ngendaho Etienne ari mu mirima y'urusenda rukiri ruto afatanyije n'abo bahuriye mu itsinda

Mukagasana Marie Gorethi, uhagarariye itsinda ry’aborozi b’ingurube za kijyambere mu Kagari ka Gasarabwayi, Umurenge wa Musaza, we yavuze ko bafite icyizere ko umushinga wabo uzabateza imbere vuba.

Ati “Iwacu hava izuba rikabije, icyo twashimye ni uko baduteye inkunga tworora ingurube. Dufite ingurube 15, indwi muri zo zimaze kubwagura [urumva ni amafaranga zibyara] kuri ubu zifite ibibwana 35, turishimye cyane kubera ko mu gihe abandi bari mu bwigunge kubera izuba ryangije imyaka yabo, twe tuzagurisha izo ngurube tubone amafaranga avamo ibyo dukeneye.”

Usibye guteza imbere abagize iri tsinda, biteganyijwe ko ubu bworozi buzagera no ku bandi kuko hari gahunda yo kuboroza nk’uko Mukagasana yabivuze.

Mu gikorwa cyahariwe abagenerwabikorwa b’uyu mushinga wa LVBC cyo gusurana no gusangira amakuru ku byo umushinga wagezeho cyabaye mu cyumweru gishize mu Murenge wa Gatore, Umuyobozi w’ishami ry’ubuhinzi n’umutungo kamere mu Karere ka Kirehe, Janvier Nsengimana, yavuze ko Akarere kishimira ibikorwa byakozwe.

Ati “Kirehe ni Akarere gakunda kwibasirwa n’ingaruka z’imihindagurikire y’ibihe harimo amapfa n’isuri iyo imvura yaguye. Niyo mpmvu dushima ibi bikorwa byo gutanga ibigega by’amazi kuko hafi hano hari igishanga cyitwa Kijumbura gihingwamo umuceri mbere y’umushinga hari hegitari zirenga 10 ibigo by’ubwishingizi bitemeraga kwishingira, kubera kutizera ko aho hantu hatanga umusaruro ariko ubu hari hegitari 18 zihingwa zirishingirwa kandi zitanga umusaruro kubera ko isuri yagabanyijwe.”

Umujyanama mu bya tekiniki muri uyu mushinga, Peter Kamau, yavuze ko intego y’uyu mushinga ni ugufasha abaturage kubona ibibunganira mu mibereho yabo bitewe n’uko ikirere kigenda kigaragaza ko badakwiye gutega amakiriro ku bikorwa by’ubuhinzi gusa.

Ati “Hanenewe inyunganizi ku bakora ubuhinzi kugira ngo uburemere bw’ingaruka z’imihindagurikire y’ibihe bugabanuke babashe kubaho badashingiye ku kirere.”

“Ikirere kizakomeza guhinduka, izuba ry’igihe kirekire rizakomeza kubaho, imvura nyinshi ziteza umwuzure na zo zizabaho, ni byiza rero ko abantu batekereza ibyunganira ubuhinzi bishobora gutuma abantu babaho igihe kirekire. Intego y’iki gikorwa ni ukugira ngo abashoboye bagezweho n’ibikorwa by’uyu mushinga bashobore kwigiranaho, gusangira ubumenyi.”

Umushinga wo kugabanya ingaruka ziterwa n’imihindagurikire y’ibihe mu kibaya cy’Ikiyaga cya Victoria ushyirwa mu bikorwa mu bihugu birimo u Rwanda, u Burundi, Kenya, Tanzania na Uganda.

Mu mishinga yatewe inkunga harimo n'iy'ubworozi bw'amatungo magufi
Munyaneza Eliab asobanura uburyo ikigega cy'amazi yahawe cyafashije mu kubona amazi hafi mu gihe cy'imvura

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .