Iri rushanwa rifite umwihariko wo guha amahirwe amatsinda atandukanye yo guhangana, buri rimwe rikagaragaza ibyo rishoboye mu bijyanye n’imbyino, mu gihe urugendo rugana ku ntsinzi ruzagenda rugorana uko ibyiciro bizagenda bikurikirana.

Amatsinda 10 yatangiye iri rushanwa ni Black Evils, Famous Academy, AfroHit, Indaro, KTY Dance Crew, The Ninjaz, Revolution, The Warriors, Dynamic na MVB Foundation.

Nyuma y'icyiciro cya mbere cyabaye ku wa 7 Ugushyingo 2026, amatsinda ane yasezerewe arimo Black Evils, Famous Academy, Revolution na Dynamic, asiga andi atandatu akomeje urugamba rwo guhatanira igikombe.

Buri tsinda ryasezerewe ryahawe impamba y’ibihumbi 100Frw byo kubashimira ko bitabiriye mu gihe amatsinda yakomeje ari AfroHit, Indaro, KTY Dance Crew, The Ninjaz, The Warriors na MVB Foundation.

Iri rushanwa rigeze mu mahina kuko ku wa 21 Ugushyingo 2026, hateganyijwe ikindi cyiciro cyo gusezerera amatsinda atatu muri atandatu yari asigaye bisobanuye ko bazasigara andi atatu azaba abonye itike yo kujya mu cyiciro cya nyuma.

Aya matsinda atatu azagera ku munsi wa nyuma azahurira mu ihatana riteganyijwe ku wa 5 Ukuboza 2026, ari na bwo hazamenyekana itsinda rizegukana intsinzi muri iri rushanwa rigahita rihabwa miliyoni 2Frw, irya kabiri rigahabwa miliyoni 1Frw naho irya gatatu rihabwe ibihumbi 500Frw.

Ku rundi ruhande ariko atatu nayo azasezererwa ku wa 21 Ugushyingo 2026, buri rimwe rizahabwa ibihumbi 100Frw by’impamba.