00:00:00 IGIHE NETWORK KN KINYARWANDA EN ENGLISH FR FRANCAIS

Ingwate zavugishije impunzi zo mu Rwanda zagenewe inguzanyo

Yanditswe na Kanamugire Emmanuel
Kuya 10 June 2022 saa 10:41
Yasuwe :

Bamwe mu mpunzi ziri mu Rwanda barasaba ko bakoroherezwa kubona inguzanyo zidasabwe ingwate binyuze mu mushinga ‘Jya Mbere’ kuko zitahunganye imitungo itimukanwa.

Ibikorwa by’umushinga ‘Jya mbere’ wari ugenewe kwegereza ibikorwa by’ibanze impunzi n’abaturage baturanye nazo mu turere dutandatu twazakiriye, byatangijwe ku mugaragaro ku wa 4 Ukuboza 2020 mu Karere ka Gisagara.

Banki Itsura Amajyambere y’u Rwanda, BRD na Banki y’Isi byasinyanye amasezerano yo gucunga miliyoni zigera ku 10 z’amadolari muri Kanama 2019 yagombaga gutera inkunga ibikorwa by’uyu mushinga.

Izo mpunzi zirimo izituye mu bice by’imijyi nka Kigali, Huye, Bugesera no mu nkambi za Gihembe muri Gicumbi, Kiziba muri Karongi, Kigeme muri Nyamagabe, Nyabiheke muri Gatsibo, Mahama muri Kirehe na Mugombwa muri Gisagara nk’uko inyandiko isobanura iby’uwo mushinga ibigaragaza.

Amafaranga agenewe uwo mushinga Banki Itsura Amajyambere yashyikirijwe na Banki y’Isi, yayanyujije mu mabanki n’ibigo by’imari iciriritse byegereye aho izi mpunzi zibarizwa kugira ngo abe ari byo bitanga inguzanyo yunganirwa kuri izo mpunzi.

Byari biteganyijwe ko uzahabwa munsi ya miliyoni eshanu z’amafaranga y’u Rwanda, yagombaga kwishyura 50% by’inguzanyo andi akamubera inyunganizi.

Uwahawe hagati ya miliyoni eshanu na 25 yagombaga kwishyura 60% naho urengeje miliyoni 25 akishyura 70% by’inguzanyo.

Mu masezerano BRD na Banki y’Isi byashyizeho umukono byari biteganyijwe ko inyunganizi ari yo yagombaga kuba ingwate y’inguzanyo kugira ngo impunzi zibashe kwibeshaho aho gukomeza gutega amaramuko kuri HCR.

Umwe mu bagenerwabikorwa akaba n’impunzi ikomoka mu Burundi, Masabo Thaddée, yavuze ko Minisitiri muri Minisiteri y’Ibikorwa by’ubutabazi, amaze gutanga amabwiriza ko amafaranga agomba gutangira gutangwa impunzi zateguye imishinga zijya kuyasaba muri banki ariko bamwe imishinga yabo ntiyakirwa kubera ko nta ngwate zagaragaje.

Ati “Amabanki yavuze ko impunzi zigomba gutanga ingwate nyamara ntizihungana imitungo itimukanwa. Banki y’Isi isinyana amasezerano na BRD nta by’ingwate bigeze bashyiramo, bari babizi ko impunzi itagira ingwate.”

“Bavuga ko impunzi zigomba gufatwa nk’abandi baturage bagana amabanki bashaka inguzanyo. Bibagirwa ko ari inguzanyo yihariye. Aya mafaranga si ay’amabanki, ni ay’impunzi. Bashobora gufataho inyungu ya serivisi batanze ariko amafaranga batayita ayabo.Turifuza ko bemera kwakira imishinga yacu bakareka kudusaba ingwate.”

Mugenzi we utashatse ko amazina ye atangazwa, na we yavuze ko abaturage begeranye n’inkambi z’impunzi na bo bari bemerewe guhabwa inguzanyo muri uyu mushinga ariko impunzi zatunguwe no gusabwa ingwate.

Yavuze ko iki kibazo bakigejeje mu nzego zitandukanye ariko kugeza n’ubu batarabona igisubizo. Imishinga bakoze ngo banki zanze kuyakira kubera ko nta ngwate babashije kubona, icyo yita ko ari akarengane kuko ntaho impunzi yakura ingwate.

Undi yagize ati "Nta wuhungana ingwate n’aho waba ufite ibintu bingana bite. Kuva twajyana umushinga muri banki bakawanga twabonye ko ayo mafaranga atari iy’impunzi."

Perezida wa komite ihagarariye impunzi z’Abarundi mu Rwanda, Patrice Ntadohoka, yavuze bashyizeho komisiyo irimo kugirana ibiganiro n’inzego zibishinzwe kugira ngo iki kibazo gishakirwe ibisubizo.

Ku rundi ruhande, Banki Itsura Amajyambere y’u Rwanda (BRD) ivuga ko inguzanyo zitangwa n’ibigo by’imari hashingiwe ku mabwiriza n’amategeko bigenderaho.

Umuyobozi ushinzwe gukurikirana iby’umushinga ’Jya Mbere’, muri BRD, Mukarukaka Gloriose, yavuze ko bashishikariza ibigo by’imari kuba byagabanya ingwate zisabwa ariko ikigo cy’imari kikaba ari cyo cyiga inguzanyo ndetse kikanirengera kuzishyurwa kwazo n’aho ziba zizunganiwe.

Yavuze ko hari ibigo bimwe by’imari bidasaba ingwate harimo Inkomoko/AEC kandi ko hari n’ubwo ubucuruzi ubwabwo buba ingwate ku nguzanyo iba isabwa mu kigo cy’imari.

Ati “Byaba byiza kuganira n’ibigo by’imari baba bakoreramo bakumvikana ku by’ingwate. Bashobora no gusaba ingwate banyuze mu baterankunga batandukanye mu gihugu cyangwa bakihuza n’abenegihugu (Abanyarwanda) bashobora gutanga ingwate. Na none bashobora kwibumbira mu makoperative n’amatsinda aho bakoresha ubwisungane magirirane hagati y’Abanyamuryango bakabasha kubona inguzanyo mu bigo by’imari.”

BRD ivuga ko kuva iyi gahunda yatangira hamaze gutanwa inyunganizi ku bantu 1266 barimo impunzi 565.

Amafaranga yose hamwe amaze gutangwa ni miliyari 1,7 mu gihe ateganyijwe yose ari miliyari 10,7 z’amafaranga y’u Rwanda.

Umushinga ‘Jya Mbere’ uzarangira mu Ukwakira 2026 aho biteganyijwe ko kunganira ibikorwa bibyara inyungu by’abagenerwabikorwa mu turere ducumbikiye impunzi no ku mpunzi zibarizwa mu mijyi bizaba byararangiye.

Impunzi zo mu Nkambi ya Mugombwa n'Abanyarwanda baturanye na zo ubwo hatangizwaga ibikorwa by'umushinga 'Jya Mbere'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .