Ishimwe rya Rwamukwaya winjiye mu itangazamakuru by’impanuka, imyaka 36 akayimara inyuma ya Camera (Video)

Yanditswe na Nkurunziza Ferdinand
Kuya 14 Kamena 2020 saa 04:54
Yasuwe :
0 0

Rwamukwaya Valens, umwe mu bantu bamenyekanye cyane mu mwuga wo gufata amashusho yerekeje mu za bukuru, asezerwaho mu cyubahiro amaze imyaka 38 mu itangazamakuru, irimo 36 yamaze akora akazi ko gufata amashusho.

Ni urugendo yatangiriye mu gihugu cy’u Burundi, aho umuryango we wahungiye afite imyaka itatu y’amavuko, arahakurira, ahigira amashuri abanza, ayisumbuye na kaminuza mbere yo kwerekeza mu itangazamakuru.

Mu kiganiro cyihariye yagiranye na IGIHE, Rwamukwaya yadusangije bimwe mu byaranze urugendo rwe mu mwuga wo gufata amashusho, aho igihe kinini yakimaze akorera televiziyo y’u Rwanda.

Rwamukwaya wavutse mu 1956 avuga ko ageze muri kaminuza yize ibijyanye n’imitekerereze ya muntu n’ubumenyi mu kwigisha (Psychologie et Science de l’Education), aho yamaze imyaka ibiri gusa, ahita yerekeza muri radiyo y’igihugu mu Burundi.

Irembo rimwinjiza mu itangazamakuru

Rwamukwaya avuga ko yakuze yifuza kuzaba umunyamakuru w’umwuga; gusa ngo akinjira muri kaminuza agatangira kwiga amasomo atandukanye n’amuganisha ku nzozi ze, ntibyatumye ata icyizeze.

Amahirwe yo kujya kuba umushyushya rugamba (Animateur) kuri Radio y’u Burundi yatumye ahagarika kwiga amasomo ya kaminuza kuko ngo yumvaga ari ahantu atishimiye, cyane ko amasomo yigaga atari ahuye n’icyifuzo yakuranye.

Ati “Kujya kwiga ayo masomo ntibyari mu bushake bwanjye […] nari nariyandikishije mu ishami ry’amategeko, byakwanga nkajya mu ishami ry’ubukungu; ariko nyuma y’ibyumweru bitatu nasanze babinkuyemo.”

Akomeza avuga ko yagerageje gusaba guhindurirwa amasomo ariko bikanga, yemera kwiga ayo yahitiwemo n’ubwo ku mutima hari hakiriho itangazamakuru.

Ubwo yari akiri ku ntebe y’ishuri, Rwamukwaya ngo yumvise kuri radiyo hanyuzeho itangazo rihamagarira abantu kujya gukora ikizami cy’akazi kuri iyo radiyo, yiyemeza kujya kugikora nubwo nta cyizere cyo gutsinda yari afite.

Ati “Byari bigoye kubona akazi muri radiyo, gusa maze kumva itangazo niyemeje kujyayo, ariko nta cyizere mfite […] naravuze nti ‘gutsindwa nta kibazo, ikibi ni ikofe’ kandi iryo kofe numvaga ntari burikubitwe.”

Nyuma y’imyaka ibiri akora kuri radiyo nk’umushyushyarugamba, Rwamukwaya yaje kugira amahirwe yo kuboneka mu bantu 18 ba mbere batangiranye na Televiziyo y’u Burundi mu 1984, ahabwa inshingano zo gufata amashusho.

Icyo gihe ngo abayobozi b’i Burundi bifuje gutangiza televiziyo, bihurirana nuko hari inama mpuzamahanga yari igiye kubera muri icyo gihugu hakenewe abakozi bo gukoresha muri iyo televiziyo nshya yari igiye gutangira.

Ati “Abayobozi basabye ko hashakwa abantu bari basanzwe bakora kuri radiyo, bakajyanwa muri televiziyo; ngira Imana bampitamo.”

Akomeza avuga ko gutangira akazi ko gufata amashusho byaturutse ku buhanga bwo gukoresha ‘camera’ yagaragaje mu mahugurwa we na bagenzi be babanje gukoreshwa, ariko ngo n’igihagararo cye gishobora kuba kiri mu byamwongereye amahirwe kuko icyo gihe yari muremure kuruta abandi bose bari kumwe.

Gusiba kwa mugenzi we byatumye ajya muri ‘Mission’ bwa mbere

Rwamukwaya yagiye mu butumwa bw’akazi hanze y’igihugu bwa mbere, biturutse ku gusiba kwa mugenzi bakoranaga kuri Televiziyo y’u Burundi. Icyo gihe yari agikoresha ibyangombwa by’impunzi ku buryo byari bigoye ko yakoherezwa hanze y’igihugu yahungiyemo.

Igihugu cya mbere Rwamukwaya yerekejemo kubera akazi ko gufata amashusho, kitari u Rwanda yavukiyemo cyangwa u Burundi yahungiyemo ni Gabon, aho yari yaherekeje ikipe y’umupira w’amaguru ya Vital’o.

Ati “Urwo rugendo rwarantunguye, rurananshimisha ku buryo ntabasha gusobanura. Byanyeretse ko buri kintu cyose gishoboka.”

Usibye uru rugendo rwa mbere rwamubereye isoko y’ibyishimo byahuje n’urukundo asanzwe afitiye umupira w’amaguru, umwuga wo gufata amashusho watumye Rwamukwaya yerekeza mu bihugu bitandukanye haba ku mugabane wa Afurika no hanze yawo.

Icyemezo cyo kugaruka mu Rwanda

Nyuma y’imyaka icumi akorera Televiziyo y’u Burundi, Rwamukwaya yafashe icyemezo cyo kugaruka mu gihugu cye ndetse ahita atangira gukorera Televiziyo Rwanda yari yarahagaritse ibikorwa byayo kubera Jenoside, akomereza ku mwuga wo gufata amashusho.

Rwamukwaya avuga ko kongera kubyutsa imikorere muri Televiziyo Rwanda byari bikomeye cyane kuko nta bikoresho bihagije byari bihari; ibyinshi byari byarangijwe ibindi byarasahuwe mu gihe cya Jenoside yakorewe Abatutsi.

Ati “Naje nje gukorera u Rwanda kuko aho rwari rugeze muri icyo gihe rwari rukeneye abantu bazarukorera; nkuko nari ndi mu itangazamakuru […] hari mugenzi wanjye wari usanzwe azi imikorere yanjye wambwiye ngo nze, ampuza n’abari abayobozi ba Radio Rwanda.”

Akomeza avuga ko ikintu cya mbere yahuye nacyo kikamushimisha muri ako kazi gashya, ngo ni abantu yasanze muri Radiyo Rwanda icyo gihe, bari bafite ubushake bwo gukorana n’abantu bashya.

Muri ibyo bihe ngo Televiziyo Rwanda yatangiranye ‘Camera’ nto ebyiri n’ibindi bikoresho bike cyane, ariko ngo umuhate w’abakozi yahasanze watumye akazi gakoreka n’ubushobozi bugenda burushaho gushakishwa.

Ati “Nta munsi mukuru wo kongera gutangiza televiziyo twakoze […] twatangiye dukora iminsi itatu gusa mu cyumweru (kuva ku wa Gatanu kugeza ku Cyumweru), nyuma uko ibiganiro n’amakuru byarushagaho kwiyongera, twageze aho dukora iminsi yose.”

Nyuma y’imyaka 26 akorera Ikigo cy’Igihugu cy’Itangazamakuru mu Rwanda (RBA), kuri uyu wa Gatanu, tariki ya 12 Kamena 2020 nibwo abakozi n’abayobozi ba RBA basezeye kuri Rwamukwaya mu buryo avuga ko bwamutunguye kandi bukamushimisha cyane.

Nyuma yo gutangira urugendo rw’izabukuru, Rwamukwaya avuga ko agiye kuruhuka byibura amezi abiri nta kindi akora, agafata umwanya wo gutekereza ikindi yakomerezamo ubuzima kijyanye n’imbaraga asigaranye kuko ngo atashobora gukomeza kwicara ntacyo akora.

Inama ku bakora umwuga wo gufata amashusho

Rwamukwaya nk’umuntu ufite ubunararibonye mu mwuga wo gufata amashusho, agira inama abakora aka kazi ko bagomba kugira ikinyabupfura mu mwuga wabo kuko kabasaba guhura n’abantu batandukanye barimo n’abakomeye.

Ati “Iyo witwaye neza imbere y’umuntu mwagiye gufata amashusho, na we akwakira neza, ariko iyo umwitwayeho nabi ukagaragaza imyitwarire mibi […] hari abanywa itabi, inzoga n’ibindi; iyo ubigejeje imbere ye agufata nabi.”

Yongeraho ko imyitwarire mibi y’umuntu ugiye gufata amashusho ishobora gutuma akazi kose gapfa, ibyo yari agiye gushaka ntabibone nkuko byari biteganyijwe.

Nyuma y'imyaka 36 akora umwuga wo gufata amashusho, Rwamukwaya Valens yerekeje mu za bukuru

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .