00:00:00 IGIHE NETWORK KN KINYARWANDA EN ENGLISH FR FRANCAIS

Ibidasanzwe kuri T-Cross ya Volkswagen iberanye n’imiterere y’u Rwanda (Amafoto)

Yanditswe na Ndahayo Emmanuel
Kuya 22 July 2022 saa 02:13
Yasuwe :

Mu mpera z’umwaka ushize, Uruganda rw’Abadage, Volkswagen, Ishami ry’u Rwanda, rwatangiye guteranyiriza mu Rwanda ubwoko bushya bw’imodoka buzwi nka T-Cross, bwatangiye guteranyirizwa mu Rwanda bukagira umwihariko wo gusanishwa n’imiterere y’igihugu.

Ubu bwoko burimo T-Cross Comfortline na T-Cross Highline zujuje ubwoko bwa munani bw’imodoka uru ruganda ruteranyiriza mu Rwanda, zikagira umwihariko n’ikoranabuhanga ridasanzwe ndetse ikaba inajyanye n’ikirere.

Ni imodoka ifite ikoranabuhanga rigezweho, ku buryo nko mu gihe amapine yagabanutsemo umwuka, bitewe n’impamvu zitandukanye, iyi modoka iba ishobora guhita ibyerekana ako kanya. Mu rwego rw’ubwirinzi, iyi modoka ifite ikoranabuhanga rishobora kuburira umushoferi mu gihe ari gutwara atambaye umukandara.

Ahagana hasi, iyi modoka ifite amatara ashobora kwaka igihe cyose, akaba yafasha umushoferi kugira urumuri ruhoraho no mu gihe ari gutwara ahantu hatameze neza. Mu gihe igipimo cy’amazi ari mu modoka kigabanutse, T-Cross ifite ubushobozi bwo kumenyesha umushoferi, kugira ngo abe yashyiramo andi bityo imodoka ikomeze ikore neza.

Aho umuntu ashyira umutwe mu gihe yicaye hakozwe mu buryo hashobora kwimurwa, bigatanga ubwisanzure mu rugendo. Iyi modoka kandi ifite camera ireba inyuma. Mu gihe imodoka iri nko kugenda mu bunyerere, ifite umushoferi aba afite ubushobozi bwo gufata feri imodoka igahita ihagarara aho iri, bikaba byakumira impanuka.

Ibikoresho bikoze iyi modoka na byo birahambaye kuko ifite uburyo bwo kuvanaho icyo hejuru, hagasigara ikirahuri gishobora gutanga umucyo mwinshi imbere mu modoka. Mu gihe hagize ikintu gikora kuri moteri y’iyi modoka, nk’igihe cy’impanuka, ifite uburyo ihita isohora ‘airbags’ ku myanya yombi y’imbere, zikaba zarinda umushoferi n’umugenzi.

Undi mwihariko wayo ni uko ari imodoka itangiza ibidukikije, kuko idakoresha lisansi nyinshi, ibi bigaterwa n’uko moteri yayo ari nto.

Umuyobozi Ushinzwe Ubucuruzi muri Volkswagen, Mugabo Jean Luc, yavuze ko “Ibi ntibiyigabanyiriza ubushobozi n’imbaraga zayo ahantu hazamuka, kuko agakoresho gaha imbaraga moteri yayo (computer) katahindutse.”

Uyu muyobozi kandi yakomeje avuga ko kugura imodoka zakorewe mu Rwanda ari ibintu byiza “Kuko natwe dukwiriye kugenda mu modoka nziza, zitangiza ikirere kandi zitanga ubwisanzure ku bazitwaye n’abazirimo.”

Iyi modoka ifite ikizwi nka ’Digital Cockpit’, cyangwa se ikoranabuhanga rya radio riri ku rwego rwo hejuru, aho amajwi aba asohoka mu buryo butagira ingaruka ku bantu bari mu modoka.

Mugabo yanagarutse ku buryo imodoka zikorerwa mu Rwanda ziba zijyanye n’ubutaka ndetse n’ikirere cy’u Rwanda, ku buryo bituma uyiguze yizera umutekano wayo by’igihe kirekire.

Volkswagen itanga garanti y’imyaka kuri iyi modoka, aho umuntu aba ashobora kuyisubiza ku ruganda mu gihe igize ikibazo ikaba yasanwa. Ku nshuro ya mbere, igaraje rya Volkswagen risana imodoka ku buntu.

Kugeza ubu ububiko bw’uru ruganda rurimo imodoka zihagije ku buryo uzifuje ashobora kujya kuri Volkswagen akaba yagura imodoka ndetse akanaba yayitwara akumva uko imeze. Umuntu wifuza iyi modoka kandi aba ashobora kuyitumiza bakayimushyira aho ari hose mu gihugu. Umwihariko w’izi modoka kandi ni uko ziri mu mabara atandukanye, ku buryo umuntu ashobora kugira amahitamo menshi.

T-Cross iba ifite garanti y'imyaka itatu
T-Cross iberanye n'imihanda y'u Rwanda
Ufunguye iyi modoka usanga sri uku hameze
T-Cross igira umwihariko wo kugira moteri nto, ku buryo itangiza ibidukikije, kandi ubushobozi bwayo ntibuhungabane
Izi modoka ziteranyirizwa mu Rwanda aho ziberanye n'imiterere y'igihugu
Mugabo yasobanuye uburyo iyi modoka iberanye n'imiterere y'u Rwanda, ku buryo kuyigura ari ukwiteganyiriza

Amafoto: Yuhi Augustin


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .