00:00:00 IGIHE NETWORK KN KINYARWANDA EN ENGLISH FR FRANCAIS

Ibaruwa ifunguye yandikiwe Lt. Gen. Muhoozi Kainerugaba

Yanditswe na Kabagambe R. Ignatius
Kuya 7 May 2022 saa 10:51
Yasuwe :

Nshuti Lt. Gen. Muhoozi Kainerugaba, nkwandikiye ngira ngo ngire icyo ngusaba. Ni ikigendanye n’akazi ka Obed Katurebe ndetse n’Urukuta rwa RPF Gakwerere akoresha kuri paji ya Facebook.

Obed Katurebe asanzwe ari Umukozi w’Ikigo cy’Itangazamakuru muri Uganda (Uganda Media Centre), gishinzwe guhuza amakuru muri za Minisiteri n’ibigo bigize Guverinoma. Aha ni ho akora nk’umukozi wa Leta ushinzwe Itangazamakuru n’Itumanaho.

Kugeza ubu, tubwirwa ko ari ahantu muri Kampala, aho bivugwa ko arinzwe ibintu bishobora kumuhungabanya biturutse ku bantu runaka.

Gen. Muhoozi, Obed Katurebe yatawe muri yombi ku wa Mbere, tariki ya 2 Gicurasi 2022. Byaratangajwe cyane mu itangazamakuru ryo muri Uganda ndetse no ku mbuga nkoranyambaga.

Amakuru avuga ko yafashwe kubera ibirego yaregwaga n’Abanyarwanda, nanjye ndimo, by’uko Obed Katurebe ari we watangije, yandika ndetse agatanga umusanzu kuri paji ya Facebook ya RPF Gakwerere.

Iyi paji yakoreraga muri Uganda mu minsi ishize kubera umubano utari umeze neza n’u Rwanda, ariko n’ubu iracyakora. Ihora ishyiraho ibitutsi byibasira Perezida Kagame n’abandi bayobozi bakuru ba Guverinoma y’u Rwanda. Guhindanya isura y’abayobozi b’u Rwanda biracyari intego nyamukuru y’iyi paji ifite ifoto ya Patrick Karegeya

Mu bihe bishize igihe u Rwanda na Uganda byari bifitanye ibibazo, iyi myitwarire yari bwumvikane, ariko bitari uyu munsi ubwo turi kubona hashyirwamo imbaraga zigamije kuzahura umubano. Abantu babona bidasanzwe kandi biteye urujijo kuba Obed Katurebe ndetse na RPF Gakwerere ye akomeza ibikorwa bigamije gutuka so wanyu, ubu akaba asigaye ari inshuti yawe mukorana.

Mu kuzambya ibintu kurushaho, Obed Katurebe aherutse kongera izina ryawe ku rutonde rw’abantu paji ye igomba gukomeza gutuka. Atekereza ko warengereye ubwo watangazaga ko ibikorwa bya Rwanda National Congress bibujijwe ku butaka bwa Uganda.

Amakuru wamenya ni uko paji ya RPF Gakwerere yarushijeho gukora cyane nyuma y’ifungwa rya Obed Katurebe! Ibyo bisobanuye ko ashobora kuba ari kwemererwa cyangwa gufashwa kwandika no gushyira hanze ibyo yanditse biturutse aho afungiye, cyangwa se abafasha be bakaba bari kumukorera akazi.

Ibi bishoboka mu gihe muri CMI haba hagikora abantu bakoranaga na Obed Katurebe ubwo na Maj. Gen. Abel Kandiho yari akiyiyoboye. Bamwe muri bo bazwi nk’abashyigikiye RNC.

Ntabwo wagera ku ntego yawe yo kurandura impirimbanyi za RNC muri Uganda, mu gihe mu bakozi b’inzego z’umutekano bazashyira mu bikorwa iyo ntego, hakirimo abayishyigikiye.

Uko byaba bimeze kose, ndizera ko wumva neza ko nta kamaro ko gufunga Obed Katurebe ndetse no guhanirwa icyaha akomeje kwemererwa gukora. Ntekereza ko bitagoye cyane ibikorwa bye ndetse n’ikipe bakorana.

Niba utekereza ko guhagarika iriya paji byakwemeza u Rwanda n’Isi yose ko wari umushinga wa Leta ya Uganda, ukwiriye kumenya ko buri wese azi ko ari yo mpamvu. Ntabwo bishidikanywaho. Nta muntu wakora icengezamatwara riri ku rwego rw’iryakozwe na Katurebe adashyigikiwe na Guverinoma ya Uganda, ni ibintu bidashoboka.

Hari uburyo ibintu bishobora gukorwa neza mu bihe biri imbere. Aho gutsimbarara ku cyasha gishobora kubonekera [mu bikorwa byo gufunga iyi paji, kuko byakwerekana ko yakoreraga ku ruhande rwa Uganda] ni byiza gushyira imbaraga mu bintu byiza byagerwaho mu gihe iyi paji yaba ifunguwe. Gufunga iyi paji byagira uruhare rwiza mu nzira y’ubumwe [buri kubakwa hagati y’ibihugu byombi].

So wanyu ni umuntu ugira intumbero nk’uko ubizi. Wowe kora igikwiriye ibindi ubimurekere. Inzira yo kwiyunga yakwihuta cyane kandi ibintu byarushaho kugenda neza. Buri wese yabyungukiramo. Imana iguhe umugisha mu gihe ukomeje gutekereza ku cyifuzo cyanjye.

Yari Kabagambe Rwiyemaho Ignatius


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .