Gare ya Nyabugogo yabaye yimuriwemo isoko rirangurizwamo ibiribwa ryabaga kwa Mutangana

Yanditswe na Twarabanye Venuste
Kuya 1 Mata 2020 saa 03:20
Yasuwe :
0 0

Akarere ka Nyarugenge kakuye ibikorwa byo kurangura no kuranguza ibiribwa mu isoko rizwi nko kwa Mutangana, byimurirwa muri gare ya Nyabugogo by’agateganyo mu rwego rwo gukuraho umuvundo w’abantu n’imodoka byashoboraga kubangamira guhana intera hagati y’umuntu n’undi, hirindwa Coronavirus.

Umuyobozi Nshingwabikorwa w’Akarere ka Nyarugenge , Ngabonziza Emmy yabwiye IGIHE ko ari icyemezo bafashe muri ibi bihe bya Coronavirus bagamije kugabanya ubwinshi bw’abantu bagaragara mu masoko atandukanye ya Nyabugogo cyane cyane ahazwi nko kwa Mutangana.

Ni isoko ryabagamo imodoka nyinshi zidafite aho ziparika, abantu baje kurangura, kuranguza n’abaguzi basanzwe kuburyo cyane cyane mu masaha ya mu gitondo nta mahitamo umuntu yabaga afite kuburyo atakora kuri mugenzi we.

Gare ya Nyubugogo yamaze kugirwa isangano ry’imodoka zizana ibiribwa i Kigali. Bisobanuye ko muri iyo Gare hazajya hakorerwa ibikorwa byo kurangura no kuranguza naho kwa Mutangana n’andi masoko ya Nyabugogo hakajyayo abaguzi gusa.

Yagabanyijwemo ibice bibiri. Winjiriye mu muryango usanzwe winjira muri gare ya Nyabugogo, igice cy’iburyo gisanzwe giparikamo imodoka z’ibigo bitwara abagenzi bajya mu Ntara kirajya gikoreshwa n’imodoka ziza kuranguza ibiribwa.

Ikindi gice cy’ibumoso ahamenyerewe guparika imodoka za Ritco n’izitwara abantu mu mahanga na zimwe mu zitwara abantu mujyi wa Kigali, kizajya giparikamo imodoka zije kurangura.

Ngaboniza yavuze ko babikoze kugira ngo batange ubwisanzure mu masoko bityo no kwirinda bishoboke.

Ati “Icyo twakoze ni uburyo bwo gutanga umwanya no kwagura aho twashyira bimwe mu bikorwa cyane cyane ibijyanye no kurangura imyaka izanwe n’imodoka no kuranguza imyaka ije gutwarwa n’imodoka muri iki gihe.”

Abatwara ibicuruzwa mu Ntara no mu mujyi wa Kigali, n’abarangura IGIHE yasanze Nyabugogo bavuze ko bishimiye icyo cyemezo kuko ari ahantu habafasha gukomeza akazi kandi banashyira mu bikorwa ingamba zo kwirinda no kurinda imiryango yabo.

Ndimubakunzi Pierre yabwiye IGIHE ko mu rukerera yari ageze i Kigali azanye imbuto yari akuye mu Karere ka Rusizi. Yavuze ko ku ruhande rw’abashoferi ari icyemezo gituma bapakururira ahantu hisanzuye.

Ati “Nageze i Kigali nsanga hari ingamba bafashe zikaba zanatunejeje ku ruhande rwacu kuko urabona nk’aha Nyabugogo nta bantu begeranye, n’ukuntu turi gupakuruza imodoka turabona ari icyemezo cyiza.”

Mpagazehe Eric usanzwe atwara moto itwara imizigo kwa Mutangana yavuze icy’ingenzi ari amagara mazima ku baturage.

Ati “Kutuzana hano ni byiza kubera ko hagize uyandura akayijyana mu muryango wose aba awanduje. Kutuzana hano nta kibazo igihe twabonera umuntu twamutwara ariko icy’ingenzi ni amagara mazima.

Byari biteganyijwe ko izi ngamba zizashyirwa mu bikorwa ku wa 2 Mata 2020 ariko ngo abaturage babyumvise kare batangira kubikurikiza.

Ngaboniza Emmy yavuze ko ingamba ziri gufatwa zigamije ko u Rwanda rwakwirinda ubwandu bushya asaba abacururiza mu masoko kuvugana n’abakiliya babo b’imena bakabamenyesha izo mpinduka kugira ngo ibikorwa bikomeze ntawe ubangamiwe.

Abibwiraga ko bararangura bagacururiza ku mihanda bibukijwe ko bitemewe
Muri Gare ya Nyabugogo ahari hasanzwe haparika imodoka z'ibigo bitwara abagenzi mu Ntara niho hazajya haparika imodoka zigiye kuranguza
Gare ya Nyabugogo irakoreshwa mu bikorwa byo kurangura no kuranguza. Iyi ni foto yo mu ma saa tatu zo ku wa 1 Mata 2020
Ibi byatumye kwa Mutangana abantu basa n'abagabanyuka
Inyanya ni kimwe mu byo IGIHE yasanze abacuruzi bakirangura
Izi ngamba zizafasha abakarani kwiha gahunda kuburyo bapakurura imodoka birinda Coronavirus
Abafite imodoka zizana ibiribwa bishimiye ko babonye ahantu hagutse
Muri Gare ya Nyabugogo nta muvundi uhari nk'uwagaragaraga kwa Mutangana
Uyu ni umwe mu bari baje kurangura inyanya Nyabugogo
Moto zitwara imizigo ziri guparika muri Gare ya Nyabugogo
Ndimubakunzi Pierre yashimye gahunda ya Leta yo kuba bimuye isoko ryo kwa Mutangana
Umucuruzi azajya arangurira muri Gare ubundi ibicuruzwa abitware aho akorera
Umwe mu bashoferi yabwiye IGIHE ko amakara ari kugura Frw 9000 ku mufuka

Amafoto: Moise Niyonzima


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .