‘OPUS Film Awards’ ni ibihembo bitangirwa mu Bwongereza, bigamije kumenyekanisha impano z’abakora filime bifashishije AI. 

Biteganyijwe ko umuhango wo gutanga ibihembo bya mbere uzabera muri London Film School ku wa 14 Ugushyingo 2026.

‘Xenos – Run Doctor’ iri guhatanira igihembo mu cyiciro cya filime mbarankuru ‘Documentary’ nziza zakozwe hifashishijwe ubwenge buhangano ‘AI’ yakozwe na Kagorora Benjamin wamenyekanye nka Benjah muri TBB binyuze muri sosiyete ‘Creative Collab’ ahuriyemo n’abarimo MC Fabu na Ezra Kwizera.

Kwisanga kw'iyi filime mu zihatanira ibi bihembo ni amahirwe yo kugeza ku rwego mpuzamahanga ibihangano by’abakora sinema nyarwanda, mu gihe ikoranabuhanga rikomeje guhindura uburyo filime zikorwa n’uko inkuru zigezwa ku bazireba.

Aya marushanwa afite ibyiciro bitandukanye birimo filime ngufi, filime ndende, animasiyo, amashusho y’indirimbo, documentaire, amatangazo yamamaza n’amashusho yamamaza filime. 

Harimo kandi igihembo cy’abagore bitwaye neza mu gukora filime zikoresha AI, ndetse n’icyatoranywa n’abaturage binyuze mu matora yo kuri internet.

Abatsinze bazatoranywa n’akanama nkemurampaka gafite ubunararibonye mu bijyanye na filime, umusaruro wazo n’ikoranabuhanga. 

Mu gusuzuma ibihangano, harebwa umwimerere, ubuhanga mu gukoresha ikoranabuhanga, uburyo inkuru iteye n’ingaruka igira ku bayireba.

Umuhango wo gutanga ibihembo uteganyijwe ku wa 14 Ugushyingo 2026, muri ‘London Film School’ mu Bwongereza, ahazahurira abakora filime, inzobere mu ikoranabuhanga n’abandi bafite aho bahuriye na sinema.