00:00:00 IGIHE NETWORK KN KINYARWANDA EN ENGLISH FR FRANCAIS

Filime 10 wareba zikagufasha kwiga amateka ya Jenoside yakorewe Abatutsi

Yanditswe na Uwase Divine
Kuya 15 April 2022 saa 08:17
Yasuwe :

Mu gihe tukiri mu bihe byo kwibuka Jenoside yakorewe Abatutsi mu 1994 bizamara iminsi 100, ni ngombwa ko Abanyarwanda barushaho kwiga amateka yaranze Jenoside, ibi bikaba umwihariko ku rubyiruko rurimo n’urutarabaye muri ayo mateka mabi, kuko ari byo bizarufasha mu rugamba rurimo guhangana n’abakwirakwiza ingengabitekerezo ya Jenoside.

Kuri uru rubyiruko, birashoboka ko hari abagorwa no gusoma ibitabo cyangwa gukoresha ubundi buryo bushobora kubahugura kuri aya mateka, amahirwe akaba ari uko u Rwanda rumaze gutera imbere ku buryo umuntu ashobora no kwifashisha filime mu kwiga amateka ya Jenoside yakorewe Abatutsi.

Muri iyi nkuru, tugiye kugaruka kuri filime 10 zishobora kukubera isoko y’ubumenyi bw’amateka ya Jenoside yakorewe Abatutsi mu 1994. Muri izi filime, ushobora kwigiramo uburyo ubwicanyi bwakozwe muri Jenoside bwagenze, ubuzima bw’abarokotse, uburyo amacakubiri yagize uruhare muri Jenoside, Inkiko Gacaca ndetse n’urugendo rwo kwiyubaka nyuma ya Jenoside yakorewe Abatutsi.

Ibi byose bigamije kugufasha guhangana n’abahakana n’abapfobya Jenoside yakorewe Abatutsi, kwigira ku mateka kugira ngo ibyabaye bitazongera no gukomeza urugendo rwo kwiyubaka.

The 600

‘The 600’ ni filime mbarankuru ivuga ku basirikare 600 bari ku nyubako ya CND ubwo indege ya Habyarimana yaraswaga, ikaba yarashyizwe mu zerekanwa kuri Amazon Prime muri Amerika y’Amajyaruguru.

Mbere y’uko Jenoside yakorewe Abatutsi mu 1994 itangira, kuwa 6 Mata 1994, hari abasirikare 600 bo muri Batayo ya Gatatu y’Ingabo za RPA boherejwe mu nyubako y’Inteko Ishinga Amategeko yahoze yitwa CND, mu rwego rwo kubahiriza amasezerano ya Arusha.

Iyi filime mbarankuru The 600’ ivuga ku rugendo rwabo mu rugamba rwo kubohora igihugu no guhagarika Jenoside. Yasohotse ku itariki ya 3 Nyakanga 2019, iyoborwa na Laurant Basset. Abayigaragayemo ni Lathifa Bantegeye, Muniru Habiyakare ndetse na Ntakirutimana Brahim.

he 600 ni filime igaruka ku basirikare 600 ba RPA bari bakambitse ku Inteko Ishinga Amategeko (CND) mu rwego rwo kubahiriza amasezerano ya Arusha

Sometimes in April

Ni filime yakunzwe cyane, aho ari imwe mu za mbere zatanze ishusho ngari ya Jenoside yakorewe Abatutsi mu 1994. Yasohotse muri Mata 2005, aho yayobowe n’Umunya-Haiti Raoul Peck, ikinwamo na Idris Ilba waje kuba icyamamare mu gukina filime ku Isi.

Ishingiye ku mugabo witwa Augustin Muganza ikagaruka ku buryo byari byifashe mbere ya Jenoside yakorewe Abatutsi, mu bihe bya Jenoside ndetse na nyuma yayo ubwo ubutabera bwarimo gutangwa ku bagize uruhare muri iki gikorwa.

Iyi filime kandi igaruka ku ruhare rw’amahanga yananiwe kugira icyo akora mu gukumira ubwacanyi bwarimo gukorerwa Abatutsi.

Filime 'Sometimes in April' yarakunzwe cyane, ni imwe muri folime zakinwe kuri Jenoside yakorewe Abatutsi zikagira izina rikomeye mu mahanga

94 Terror

Ni filime igaruka ku nkuru y’umukobwa witwa Keza warokotse Jenoside yakorewe abatutsi 1994, ikagaruka ku bibazo yahuye nabyo muri icyo gihe ndetse n’uko yabuze umuryango we wishwe muri Jenoside.

Iyi fillime kandi yerekana urugendo rwe n’inshuti ze, Mutesi na Shema bajya ku mugezi w’Akagera aho barimo kugerageza guhungira muri Uganda.

Yatsindiye ibihembo bitandukanye birimo icya ‘Best Viewers’ Choice Movie Award’ mu 2018, kivuye mu Iserukiramuco rya ‘Uganda Film Festival Awards’ nyuma y’icyumweru kimwe gusa isohotse. Yatsindiye kandi Igihembo cya ‘Best Costume Award’ mu Iserukiramuco rya ‘African Film Festival’ ryabereye muri Leta ya Texas mu 2019. Yanahataniye kandi Igihembo mu Irushanwa rya ‘Golden Movie Awards Africa’ ryabereye muri Ghana.

Yayobowe na Mulindwa Richard ikinwa na Joan Agaba, Doreen Nabbanja, Muyimbwa Phiona n’abandi, ikaba yarasohotse mu 2018.

Iyi filime igaruka ku rugendo rwakozwe na Keza na bagenzi ubwo bahungaga Jenoside banyuze ku mugezi w'Akagera

My Neighbor My Killer

Ni filime y’Abafaransa ndetse n’Abanyamerika yasohotse mu 2009, iyoborwa na Anne Aghion, ikaba yibanda cyane ku Nkiko Gacaca.

Muri iyi filime, hagaragaramo uburyo Inkiko Gacaca zagizwemo uruhare n’abaturage, aho imanza zayoborwaga n’abaturage babaga batoranyijwe n’abandi bari bazwi nk’Inyangamugayo. Ni filime nziza yagufasha gusobanukirwa ishusho ngari y’Inkiko Gacaca.

Amashusho y’iyi filime yafashwe mu gihe cy’imyaka 10, aho igaragaza uburyo Inkiko Gacaca zabaye umuyoboro wo kubaka ubumwe bw’Abanyarwanda, kuko zatumye Abanyarwanda bongera kubana bashyize hamwe.

Ni filime yatsindiye ibihembo bitandukanye nk’icya filime mbarankuru nziza mu Iserukiramuco rya ‘Montreal Black Festival’. Iyi filime kandi yahanganiye ibihembo mu Iserukiramuco rya ‘Gotham Best Documentary Award.’ Ni filime yerekanywe muri kaminuza nyinshi zo ku Isi yose.

My Neighbor, My Killer ni filime igaruka ku ruhare rw'Inkiko Gacaca mu kubaka ubumwe bw'Abanyarwanda

Keepers of Memories (2004)

Iyi filime yakozwe na Eric Kabera isohoka 2004 ikaba igaruka ku buryo abantu barenga miliyoni bishwe mu mezi atatu gusa muri Jenoside yakorwe Abatutsi mu 1994.

Muri rusange, iyi filime igaruka no ku ngaruka Jenoside yagize ku Banyarwanda ndetse no kubika amateka n’ubuhamya bw’ibyabaye muri Jenoside yakorewe Abatutsi mu 1994 mu rwego rwo kugira ngo bizakoreshwe n’ibisekuru bizakurikiraho.

Keepers of Memory ni filime igaruka ku buhamya bugamije kubika amateka ya Jenoside yakorewe Abatutsi kugira ngo buzifashishwe n'ibisekuru biri imbere

100 Days

Iyi filime yiswe Iminsi 100 kubera ko ari yo yakozwemo Jenoside yakorewe Abatutsi mu 1994, aho yatangiye kuwa 7 Mata 1994, igahagarikwa kuwa 4 Nyakanga mu 1994. Inkuru yayo igaruka ku baturanyi bakundanye bakiri bato, umwe ari Umuhutu undi ari Umututsi.

Yayobowe ndetse ikorwa na Nick Hughes afatanyije na Eric Kabera, ikaba yarakiniwe ahahoze ari ku Kibuye, ubu ni mu Karere ka Karongi, isohoka mu 2001. Igaragaramo abakinnyi nka Cleophas Kabasita, Mazimpaka Kennedy, Davis Kagenza n’abandi.

100 Days yakiniwe ku Kibuye, ubu ni mu Karere ka Karongi

Shake Hands with the devils

Ni filime yakinwemo inkuru ivuye mu Gitabo “Shake Hands with The Devil” cyanditswe na Romeo Dallaire. Yakiniwe muri Canada, ikaba yarasohotse mu 2007.

Dallaire yayoboye Ubutumwa bw’Umuryango w’Abibumbye bwari bugamije kubungabunga amahoro mu Rwanda mu bihe bya Jenoside yakorewe Abatutsi mu 1994, UNAMIR.

Uyu mugabo kandi akaba yarabaye senateri muri Canada, ndetse akaba umwanditsi w’ibitabo.

Shake Hands with the Devils ni filime ishingiye ku Gitabo cyanditswe na Romeo Dallaire

Shooting Dogs

Iyi filime yakozwe na Micheal Caton-Jones mu 2006 ikaba igaruka ku nkuru y’abagabo babiri barimo Christopher wari Padiri na Joe Conner wari umwarimu w’Umubiligi, aho bagize uruhare mu gufasha abantu bari bakeneye icumbi mu kigo cy’amashuri cya Ecole Technique Officielle (ETO) cyari i Kigali.

Iyi filime yakiniwe mu Rwanda ndetse bamwe mu barokotse Jenoside babonyemo akazi karimo ako gukina ibice bitagoranye ndetse n’izindi nshingano zitandukanye.

Izina ‘Shooting dogs’ (kurasa imbwa) ryaturutse ku buryo abasirikare bari mu butumwa bwo kugarura amahoro mu Rwanda mu bihe bya Jenoside yakorewe Abatutsi mu 1994 (UNAMIR) barasaga imbwa zaryaga imirambo y’abantu bari bishwe, dore ko batari bemerewe kurasa abarimo gushyira Jenoside mu bikorwa.

Shooting Dogs ni filime yakiniwe mu Rwanda

Munyurangabo

Munyurangabo ni filime ivuga kuri Munyurangabo w’Umututsi warufite inshuti ye y’Umuhutu, Sangwa, ariko ubucuti bwabo bwaje kugeragezwa ubwo ababyeyi babo bababwiraga ko Abahutu n’Abatutsi batagomba kubana.

Iyi filime yayobowe na Lee Isaac Chung yandikwa na Samuel Gray Anderson afatanyije na Lee Isaac Chung. Abakinnyi b’iyi filime barimo Jeff Rutagengwa ari we Munyurangabo, Eric Ndorunkundiye ari we Sangwa ndetse na Jean Mrie Vianney Nkurikiyinka. Iyi filime yasohotse mu 2007.

Iyi filime ifite umwihariko wo kuba yarakiniwe mu Rwanda ndetse igakinwa n’Abanyarwanda batari basanzwe ari abakinnyi ba filime mu buryo bw’umwuga.

Yatsindiye Igihembo Gikuru mu Iserukiramuco rya AFI Fest ryabaye mu 2007, ikaba yaranakunzwe cyane n’abasanzwe bakurikirana ibya filime. Aho bashimye uburyo yakinwemo, nubwo yanditswe ku mpapuro icyenda gusa ndetse igakinwa mu minsi 11 yonyine.

Munyurangabo ni filime igaruka ku buryo amacakubiri yagize ingaruka ku bucuti bw'Abanyarwanda, ikaba yarakinwe n'abakinnyi batabigize umwuga ariko ikundwa ku rwego mpuzamahanga

A Sunday in Kigali

Iyi filime yasohotse mu 2006 muri Canada, ikaba yarayobowe na Robert Favereau, yandikwa na Gil Courtemanche. Igaruka ku nkuru y’urukundo rw’ibanga uyu Munya-Canada yakunze Umututsikazi witwaga Gentille.

Muri Mata 1994, umunyamakuru w’Umunya-Canada, Bernard Valcourt, yakoraga icyegeranyo mu Mujyi wa Kigali kigaruka kuri Virus itera SIDA. Yaje gukunda Gentille watangaga amafunguro muri Hotel des Mille Collines.

Jenoside yakorewe Abatutsi mu 1994 itangiye, Bernard ntiyashoboye gucikana na Gentille ngo bajyane muri Canada. Nyuma ya Jenoside, yagarutse mu Rwanda muri Nyakanga 1994 kugira ngo amushake.

Iyi filime igaruka ku rukundo rw'umukozi ukomoka muri Canada wari mu kazi mu Rwanda ubwo Jenoside yabaga, akaza gukundana n'umukobwa w'Umunyarwandakazi

The Day God walked away

Iyi filime igaruka ku nkuru ya Jacqueline wari umukozi w’Umuryango w’Ababirigi akaba yari Umututsi. Mu gihe uyu muryango wahungishwaga, Jacqueline yahungiye mu gisenge ubwo abicanyi barimo gusahura inzu yarimo.

Nyuma yaje gutoroka asubira mu rugo rwe, aho yasanze abane be babiri bishwe. Aha yaje kuhava ajya kwihisha mu ishyamba, aho yahuriye n’umugabo wari wakomeretse witwa Karin aramufasha aramuvura.

Iyi filime yasohotse mu 2009 iyoborwa na Philipe Van Leeuw. Yagaragayemo Miss shanel (Nirere Shanel), wakinnye nka Jacqueline, Afazali Dewaele wakomeretse na Letitia Reva (Karin).

Filime 'The Day God Walked away'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .