00:00:00 IGIHE NETWORK KN KINYARWANDA EN ENGLISH FR FRANCAIS

Amashyaka abiri yo mu Rwanda yasabye amahanga guhagurukira Jenoside iri gututumba muri Congo

Yanditswe na Ndahayo Emmanuel
Kuya 31 May 2022 saa 07:03
Yasuwe :

Amashyaka ya Democratic Union of Rwandan People (UDPR) na Rwandan Socialist Party (RSP), bashyize hanze itangazo ryamagana ibikorwa bya Guverinoma ya Repubulika Iharanira Demokarasi ya Congo, bavuga ko ibiri gukorwa muri icyo gihugu bishobora kuganisha kuri Jenoside yakorerwa Abatutsi bo muri Burasirazuba bwa Congo.

Mu itangazo bashyize hanze, banenze ibikorwa by’Ingabo za Congo (FARDC) ziri kwifatanya n’inyeshyamba z’umutwe w’iterabwoba wa FDLR. Banenze kandi ibikorwa by’ubushotoranyi bikorwa n’izo ngabo, aho ziherutse kurasa ku butaka bw’u Rwanda mu minsi ishize, ibisasu byazo bigakomeretsa abaturage ndetse bikangiza n’ibikorwaremezo.

Bongeyeho ko urebye neza ibikorwa biri kubera mu Burasirazuba bwa Congo, bisa nk’aho biri kwibasira abaturage bavuga Ikinyarwanda, by’umwihariko b’Abatutsi, bakavuga ko ibi bishobora kuzavamo Jenoside mu gihe bitahagurukirwa.

Mu kiganiro na IGIHE, Perezida w’Ishyaka rya UDPR, Depite Pie Nizeyimana, yavuze ko ibiri kubera mu Burasirazuba bwa Congo bishobora kuzavamo Jenoside yakorerwa Abatutsi bo muri icyo gihugu.

Mu minsi ishize, bamwe mu bayobozi b’inzego z’umutekano muri Congo bagaragaye basaba abaturage gushaka intwaro bakazarwanya umwanzi. Nyuma hasakaye amashusho yerekana abaturage bafite intwaro zirimo imihoro, bakavuga ko bagomba kurwanya umwanzi.

Perezida Nizeyimana yavuze ko ibyo bikorwa ari ibintu biteye ubwoba kandi biganisha ku itegurwa rya Jenoside, ati “Inshuro nyinshi iyo bavuga abanzi, baba bavuga abo muri M23 bavuga Ikinyarwanda, ariko ntabwo ari bo gusa, kuko abavuga Ikinyarwanda bose ntabwo bari kurwana, ahubwo ni Abatutsi…Iyo uvuga Ikinyarwanda ukongeraho ko uri Umututsi, bakwita umwanzi wa Congo.”

Uyu muyobozi yongeyeho ko ibyo bikorwa byose bigaragara “Nk’intandaro yo kuzakorera Jenoside abo Batutsi bitwa ngo ni abanzi ba Congo.”

Uyu muyobozi yavuze ko ibiri kuba bibangamiye intego z’ishyaka ryabo zo kubaka ubumwe na demokarasi mu Rwanda, ari nayo mpamvu bafashe icyemezo cyo kwamagana ibikorwa bya Repubulika Iharanira Demokarasi ya Congo.

Yagize ati “Ishyaka ryacu riharanira ubumwe bw’Abanyarwanda na demokarasi, twifuza ko tuba dufite u Rwanda rutekanye. Iyo tubonye igihugu runaka kidushotoye, ubumwe n’amahoro y’u Rwanda biba bihunganye. Nk’ishyaka ryacu turwanya buri kintu cyose gifite umugambi wo guhungabanya ubumwe bw’Abanyarwanda.”

Depite Nizeyimana yavuze ko umuryango mpuzamahanga wagaragaje uburangare budasanzwe ubwo mu Rwanda hakorwaga Jenoside yakorewe Abatutsi kandi wari wariyemeje kuyirandura, ukavuga ko itazongera kubaho ukundi.

Ashimangira ko kuri iyi nshuro bifuza ko “Imiryango mpuzamahanga itongera kurebera, aho tubona abapolisi batangiye gushishikariza abaturage kwitwaza imihoro n’izindi ntwaro gakondo, bajya kurwanya abo bita abanzi ba Congo, ari bo bagize M23 na ba Batutsi bavuga Ikinyarwanda, UDPR na PSR tubona ko ishobora kuba ari intangiriro yo kugira ngo batsembwe.”

Yashimangiye ikindi gituma aya mashyaka abona ibintu muri ubu buryo, ari ubufatanye buri hagati ya FARDC na FDLR, akavuga uyu mutwe w’iterabwoba wasize ukoze Jenoside mu Rwanda, ushobora gutiza umurindi ishyirwa mu bikorwa ry’iyi Jenoside muri Congo.

Yashimangiye ko impamvu bari gutinda kuri iyi ngingo, “Ni uko FARDC iri gufatanya n’abasize bakoze Jenoside mu Rwanda, kandi bakaba bari gutoza abaturage ngo barwanye abantu bafite icyo bahuriyeho cyo kuba bavuga Ikinyarwanda, ariko bakongera guhurira no kuba basangiye Ubwoko bw’Abatutsi.”

Perezida Nizeyimana yavuze ko UPDR “Ishyigikiye Guverinoma y’u Rwanda uburyo iri kwitwara muri iki kibazo. Impamvu ya mbere ni uko iri kwirinda guteza ibibazo, kuko mu mategeko mpuzamahanga, iyo warashweho uba ufite uburenganzira bwo kwirwanaho, ariko Leta irimo kwigengesera kugira ngo amahoro aboneke. Bashyize ibiganiro imbere, ntabwo twifuza intambara kuko irasenya, turabishyikiye ko bari gushyira ibiganiro imbere. Twizeye ko bitazarenga ngo [Congo] itume hafatwa izindi ngamba.”

Uyu muyobozi kandi yatanze ubutumwa ku banyamuryango b’ishyaka ayoboye n’Abanyarwanda muri rusange, ati “Mwirinde ibihuha biri gukwirakwizwa ku mbuga nkoranyambaga kuko bishobora gutuma abantu bakuka umutima. Ntibacike intege cyangwa ngo baterwe ubwoba. Byinshi biri ku mbuga nkoranyambaga ni ibihuha, nta byacitse ihari kandi inzego nkuru z’igihugu cyacu ziri gukurikirana ibi bikorwa kandi twizeye ko ibintu byose biri kugenzurwa neza. Abantu ntibagire impungenge kuko hari ubuyobozi bw’igihugu butureberera, bushinzwe gukurikirana umutekano wacu kandi urinzwe neza.”

Ishyaka UDPR ryashinzwe mu 1991 rifite intego yo gushyigikira urubyiruko rwari rwaravukijwe amahirwe yo kwiga. Kugeza ubu rifite abanyamuryango barenga ibihumbi 200 biganjemo abatuye mu Rwanda.

Perezida w’Ishyaka rya UDPR, Depite Pie Nizeyimana, yavuze ko ibiri kubera mu Burasirazuba bwa Congo bishobora kuzavamo Jenoside yakorerwa Abatutsi bo muri icyo gihugu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .