00:00:00 IGIHE NETWORK KN KINYARWANDA EN ENGLISH FR FRANCAIS

Icyerekezo cy’u Rwanda mu kubyaza umusaruro imyanda ikusanywa mu baturage

Yanditswe na Muyisenge Jean Felix
Kuya 20 July 2022 saa 08:47
Yasuwe :

U Rwanda kimwe n’ibindi bihugu ku Isi rwahagurukiye kurengera ibidukikije. Kugira ngo ibi bigerweho kimwe mu byihutirwa gukorwa ni ukunoza gahunda yo gukusanya imyanda ituruka mu bikoresho biba byakoreshejwe n’abaturage mu buzima bwa buri munsi.

U Rwanda rwagiye rwiga imishinga itandukanye izafasha gukusanya no gutunganya iyi myanda ikabyazwa umusaruro havanwamo ibindi bikoresho byifashishwa n’abaturage, nk’imyambaro, intebe, ifumbire n’ibindi bitandukanye.

Kurobanura imyanda ikusanywa mu Mujyi wa Kigali

Imwe muri iyo mishinga harimo uwatangijwe n’Umujyi wa Kigali wo kurobanura imyanda itandukanyijwe ku buryo ibora ishyirwa ahayo n’itabora bikaba uko. Ni nyuma y’uko bigaragaye ko muri uyu mujyi 70% by’imyanda iri muri Kigali ibora ku buryo irobanuwe neza yabwazwa ifumbire igakoreshwa mu buhinzi ndetse ikaba yanakoreshwa kugira ngo dukomeze tugire umujyi utoshye mu buryo bwo gufumbira ubusitani.

Birateganywa ko hazajya hifashishwa imifuka ituruka mu Rwanda kandi itandukanye n’iyari isanzwe ikoreshwa mu gukusanya imyanda bitewe n’ubwoko bwayo.

Ikimoteri kigezweho cya Nduba kigiye gutangira kubakwa

Hari na gahunda yo kubaka ikimoteri kigezweho i Nduba kizaba gifite ibisabwa byose ku buryo kizajya cyifashishwa n’abagiye kubyaza umusaruro imyanda kuko izaba irobanuye.

Umukozi ushinzwe imitunganyirize y’imyanda mu Mujyi wa Kigali, John Bagabo, yatangaje ko kugeza ubu hamaze gutangwa isoko kugira ngo abashoramari batangire umushinga wo kucyubaka bityo ko mu bihe bya vuba imirimo izaba yanzitse.

Ni ikimoteri kizaba cyubatse hafi y’aho igisanzwe gikoreshwa cyubatse ndetse kikazaba cyubakanywe ikoranabuhanga riranga ibimoteri bigezweho.

Yavuze ko imyanda ibora izajya ihita yoherezwa mu ruganda rutunganya ifumbire mu gihe bateganya no kugira imashini ishobora kuzajya itunganya ibitabora bikaba byabyazwamo izindi ngufu (aho gukoresha inkwi) zanifashishwa mu nganda zikoresha umuriro mwinshi nk’urwa CIMERWA cyangwa Ruliba.

Uruganda rutunganya imyanda yo mu bwiherero

Muri Kamena mu 2022, ubuyobozi bw’Ikigo cy’Igihugu gishinzwe amazi, isuku n’isukura, WASAC, bwasinyanye amasezerano na Komisiyo y’Icyogogo cy’Ikiyaga cya Victoria yo kubaka uruganda mu Karere ka Kicukiro, ahazajya hahurizwa imyanda iturutse mu misarane igatunganywa ikabyazwamo ingufu zo gucana n’ifumbire yo gukoresha mu buhinzi.

Uru ruganda ruzarangira kubakwa muri 2025 rutwaye miliyoni 7,5 z’Amayero (asaga miliyari 7,5 z’amafaranga y’u Rwanda) yatanzwe na Banki yo mu Budage y’iterambere KFW.

Uru ruganda ruzaba rufite ubushobozi bwo kwakira metero kibe ziri hagati ya 500 na 600 z’imyanda ku munsi, itwawe n’imodoka zizaba zaviduye imisarane yo hirya no hino mu Mujyi wa Kigali iri ahantu hagoye kugerwa n’imiyoboro.

Umujyi wa Kigali urimo guturwa ku muvuduko uri hejuru, aho muri 2035 abahanga mu miturire bateganya ko abawutuye bazaba bageze kuri miliyoni imwe n’ibihumbi 800, ku buryo hakenewe uburyo bwo gukusanya no gutunganya imyanda ituruka mu ngo.

Abaturage basaga miliyoni 1,3 batuye mu Mujyi wa Kigali, 92% by’abo bafite ubwiherero bw’imyobo ku buryo yuzura bagasabwa gucukura indi, naho 7% by’abawutuye bo bafite uburyo bworoheje bwo kuvidura imisarane yabo.

Uruganda rutunganya imyanda y’ikoranabuhanga

Muri Mutarama u Rwanda rweguriye umushoramari ukomeye wo muri Leta Zunze Ubumwe z’Abarabu (UAE), uruganda rutunganya imyanda y’ibikoresho by’ikoranabuhanga rwa Enviroserve, rukorera mu Karere ka Bugesera.

Uruganda rwa Enviroserve Rwanda Green Park rwakira mudasobwa, firigo, scanner, batiri, imashini zimesa, iziteka, televiziyo, ibyuma bishyushya n’ibitanga umuyaga, telefoni n’ibindi bisigazwa bya pulasitike biba byarakwirakwiriye mu baturage.

Enviroserve Rwanda Green Park ifite intego yo gukusanya toni 200 z’imyanda ku kwezi. Kugira ngo bibashe kugerwaho vuba hazajya hifashisha uburyo butandukanye nko kugura iyo myanda mu baturage.

Mu myanda ikusanywa imwe ibyazwa umusaruro nk’aho kuri ubu hamaze gukurwamo mudasobwa 2500 ziri gukoreshwa.

Imyanda igezwa ku ruganda ikusanywa ivuye mu bigo bya leta n’ibyigenga, ku makusanyirizo arimo irya Kigali, Musanze na Rubavu ndetse n’itangwa na sosiyete zikusanya imyanda mu ngo.

Iyo igejejwe aho yakirirwa harebwa ibikoresho bishobora gukorwa bikongera kwifashishwa. Mu kubitunganya nta bishya uruganda rugura kuko rwifashisha ibisanzwe mu mashini rwakiriye.

Ibidafite igaruriro birashwanyaguzwa bigakurwamo uduce twifitemo ibinyabutabire bifite ingaruka ku buzima bw’umuntu. Ibyo uruganda rudafitiye ubushobozi bwo gutunganya nka zahabu, umuringa, batiri, ibirahuri n’ibindi, byoherezwa ku cyicaro cy’uruganda i Dubaï.

Ibihugu bimwe birakataje muri gahunda yo kubyaza umusaruro umwanda uturuka ku bidukikije

U Budage ni cyo gihugu kiza imbere mu kubyaza umusaruro imyanda iba yakoreshejwe. Statista igaragaza ko ubu 67% by’umwanda uva mu bikoresho mu Budage ubyazwa umusaruro.

Muri iki gihugu politiki yo kurobanura imyanda yateye imbere cyane aho ibishyirwamo imyanda biba bifite amabara atandukanye, buri bara rikagenerwa ubwoko bw’umwanda ushyirwamo.

U Budage kandi bufite poliyiki yiswe ‘Pfand’ aho hari amafaranga ameze nk’ingwate yiyongera kuri buri giciro cy’amacupa ya pulasitike amafaranga babasha gusubizwa iyo basubije imyanda y’aya macupa mu maduka bayaguzemo cyangwa bakayashyira mu mashini yabugenewe ikusanya aya macupa.

Hari n’izindi politiki zishyirwa mu bikorwa nko kugabanyiriza imisoro inganda zikoresha ibikoreho bivuye mu myanda yatunganyijwe no kongera imisoro ku bicuruzwa bipakiye muri pulasitiki.

Ibindi bihugu bihagaze neza mu kubyaza umusaruro imyanda harimo, Autriche iri ku kigero cya 58%, Wales 52,2%, u Busuwisi 49% na Koreya y’Epfo ifite 44,9% nk’uko Acrorecyling ibigaragaza.

Imibare ya World Index igaragaza ko buri mwaka ku Isi hajugunwa toni milayari 2,1 z’imyanda aho buri muntu nibura ajugunya ibiro 20 buri kwezi. Igera kuri 16% ni yo ibasha gutunganywa.

Leta Zunze Ubumwe za Amerika ni yo iza imbere mu bihugu bijugunya imyanda myinshi ku Isi.

Uruganda rwa EnviroServe Rwanda ruherereye mu Bugesera
I Nduba hagiye kubakwa ikimoteri kigezweho kizifashishwa mu gutunganya imyanda no kuyibyaza umusaruro birenze uko byakorwaga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .