Abita ku bidukikije bahangayikishijwe nuko ingagi zishobora kwandura Coronavirus

Yanditswe na Twarabanye Venuste
Kuya 23 Werurwe 2020 saa 08:26
Yasuwe :
0 0

Abahanga mu bya Siyansi batanze umuburo ko ingagi zo mu misozi miremire nubundi zivugwaho gukendera ku Isi, ziri mu byago byo kuba zakwandura kandi zikicwa na Coronavirus.

Pariki y’Igihugu ya Virunga yo muri Repubulika Iharanira Demokarasi ya Congo, ituyemo 1/3 cy’ingangi zo mu misozi miremire yafashe icyemezo cyo guhagarika kuyisura kugeza ku wa 1 Kamena.

Byatangajwe ko ari inama abashinzwe iyo Pariki bagiriwe n’abahanga mu bya Siyansi ‘bavuze ko inyamanswa zirimo ingagi zo mu misozi miremire, zishobora kwandura Coronavirus’. N’ubusanzwe ingagi ni zimwe mu nyamaswa zishobora kwandura indwara z’ubuhumekero nk’izifata abantu.

Ikigega Mpuzamahanga cyo kwita ku Bidukikije (WWF) gitangaza ko n’ubukonje busanzwe buhagize mu kwica ingagi ari nayo mpamvu abakerarugendo batemererwa kwegera ingagi cyane. Guhagarika ibikorwa byo gusura Pariki ya Virunga ni icyemezo abashinzwe kwita ku bidukikije mu Karere ihereyemo bakiriye neza.

Umuyobozi w’ikigo cyita ku Bidukikije muri Kenya, Paula Kahumbu, yabwiye Dail Mail ko imbaraga zose zikenewe zikwiye gukoreshwa mu rwego rwo kurinda ingagi zo mu misozi miremire kubera ko zisigaye ari nkeya.

Ati “Turabizi ko ingagi zikorwaho cyane n’indwara zifata abantu. Iyo umuntu afite ubukonje cyangwa indwara z’ubuhumekero ntabwo yemererwa kujya kureba ingagi.”

Yavuze ko noneho ku bijyanye na Coronavirus igaragaza ibimenyetso bitinze yo iteye inkeke cyane kuri ibyo binyabuzima.

Yagize ati “Na Coronavirus ifata igihe kirekire itaragararaza ibimenyetso, bisobanuye ko dushobora gushira ziriya ngagi mu byago.”

Yongeyeho ko ingamba zo kwirinda zihari zidahagije ngo bizere ko zirinzwe.

Gladys Kalema-Zikusoka wita ku Bidukikije muri Uganda yavuze ko intera igomba kuba hagati y’ingagi na mukerarugendo itubahirijwe mu gihe cyose habaga hari itsinda ryagiye gusura ingagi muri icyo gihugu.

Yavuze ko ‘ubushakashatsi bwerekanye ko metero zirindwi zigomba kuba hagati y’usura n’ingagi ashaka kureba zitubahirijwe ku kigera cya 98% y’inshuro zo gusura ingagi zabayeho’.

Ati “Ariko igitangaje ni uko 60% ari abakerarugendo bangije iryo tegeko naho 40 % ari ingagi zaryangije.”

Yavuze ko niba izo metero zidashobora kubahirizwa ingamba ishoboka ari uko ba mukerarugendo basabwa kwambara udupfukamunwa igihe cyose.

Uganda ntiratangaza ibyo guhagarika ibikorwa byo gusura ingagi nubwo akenshi usanga Abanyaburayi bakiyigana. Ushaka gusura ingagi afatwa ibizamini by’umuriro ndetse akerekana icyangombwa ko avuye mu kato kugira ngo yemererwe kureba ingagi.

U Rwanda rwo rwamaze guhagarika by’agateganyo ibikorwa byo gusura no gukorera ubushakashatsi muri pariki eshatu z’igihugu zirimo iya Gishwati-Mukura, Nyungwe n’iy’Ibirunga. Mu gihe iy’Akagera yo yakomeje ibikorwa ariko abayisura bagakurikiza amabwiriza yo kwirinda atangwa na Minisiteri y’Ubuzima mu Rwanda.

Abahanga mu bya Siyansi batangaje ko ingagi zishobora kwandura kandi zikicwa na Coronavirus

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .