{Umuyobozi w’ibiro bya Loni byo Burasirazuba bwa Repubulika Iharanira Demukarasi ya Congo yatangarije i Goma ko abarwanyi ba FDLR basabye ingabo ziri mu butumwa bwa Loni ko “bashyira igitutu k’u Rwanda ngo bagaruke gukora politike iwabo”.}

Ray Virgilio Torres yavugiye ibi kuri Radio Kivu1 ati “Kuva tariki 30 Gicurasi 2014, Monusco imaze gukoresha arenga miliyoni y’amadolari ya Amerika ku barwanyi bemeye gushyira hasi intwaro. Iyo abarwanyi ba FDLR basabye Monusco kotsa igitutu u Rwanda ngo basubire iwabo bahite binjizwa muri politike, ntibiri mu nshingano zahawe Monusco.”

Torres yashimangiye ko Monusco itagirana ibiganiro n’imitwe yitwaje intwaro, ahubwo ko inshingano zayo ari ukwambura intwaro iyo mitwe.

Abakuru b’ibihugu bigize Inama nkuru y’ibihugu byo mu biyaga bigari (ICGLR) bahuye inshuro ebyiri i Luanda muri Angola (tariki 25 Werurwe na 14 Kanama 2014) bafashe icyemezo baha umunsi ntarengwa FDLR ko yaba yashyize intwaro hasi tariki 31 Ukuboza 2014, bitaba ibyo bakazamburwa ku ngufu.