Kigali yarimbishijwe bidasanzwe mu myiteguro y’iminsi mikuru isoza 2019 (Amafoto na Video)

Yanditswe na Niyonzima Moïse , Twarabanye Venuste
Kuya 23 Ukuboza 2019 saa 11:51
Yasuwe :
0 0

Noheli irakomanga ndetse na 2020 turayitashye! Ibi birori by’impurirane byizihiye Abanya-Kigali maze si ukurimbisha umujyi bakora iyo bwabaga ku buryo aho wagera hose ubona ko koko twiteguye ibirori by’iminsi mikuru itwinjiza muri wa mwaka bavuze.

Ubu Kigali yagizwe urwererane mu mitako y’amabara atandukanye mu rwego rwo kwizihiza iminsi mikuru isoza 2019. Kuva ku nyubako z’ibigo bya Leta n’iby’igenga kugeza ku mihanda mito n’iminini, harimbishijwe imitako itandukanye inogeye ijisho.

Bimaze kuba umuco ko mu gihe hitegurwa iminsi mikuru ya Noheli n’Ubunani, Umujyi wa Kigali utakwa bihebuje mu kwishimira intambwe abawutuye bateye no kugana mu mushya bahimbawe. Uyu mwaka wo byabaye akarusho.

Umwaka wa 2019 wo usa n’udasanzwe kuko ni wo uhinguka neza ku irembo ry’icyerekezo 2020, benshi bafataga nk’inzozi none bakaba bagihanga amaso mu ntambwe nke cyane.

Mu kwizihiza urwo ruhurirane, Kigali yakenkemuwe! Imihanda n’amasangano yayo, inyubako za leta n’iz’abikorera, amasoko, amahoteli, amabanki n’ahandi hahurira abantu benshi hose harimbishijwe amatara ahandi hubatswe ibirugu nk’ikimenyetso cy’imyiteguro cyo kwizihiza ivuka rya Yezu /Yesu Kirisitu ku bamwemera ndetse no gusoza umwaka mu birori by’Ubunani.

Tariki ya 25 Ukuboza buri mwaka, ni umunsi abemera Yezu /Yesu Kirisitu bahimbaza ivuka rye. Urangwa n’imyiteguro yihariye haba mu ngo z’abantu, inyubako za leta n’iz’abikorera, mu nsengero, mu mihanda, aho abantu basohokera bizihiza uwo munsi.

Hirya no hino ku Isi usanga iyo myiteguro iri mu ruvange rw’amabara n’imitako ishimishije by’umwihariko ishimisha abana cyane ko ufatwa nk’umunsi wabo, ababyeyi bakawubageneraho impano zitandukanye.

Iyo myiteguro yorohereza abana n’ababyeyi n’abandi basohoka bagatembera kuri uwo munsi, kumva ari umunsi udasanzwe. Hari aho usanga hateguwe ibirori usanga hari umuntu wigize nk’umusaza abana bakunda cyane uzwi nka “Père Noël” cyangwa “Santa”.

Mbere y’umunsi umwe cyangwa ibiri kandi usanga abantu ari urujya n’uruza ahategerwa imodoka zijya mu ntara zitandukanye z’u Rwanda, bajya kwizihiza iminsi mikuru isoza umwaka bari hamwe n’imiryango yabo.

Mu gihe habura amasaha make ngo umunsi wa Noheli ugere ndetse n’umwaka ugane ku ndunduro yawo, IGIHE yatembereje camera y’umufotozi wayo afata amafoto y’ubwiza bwa Kigali iteye amabengeza mu kugaragaza uko imyiteguro imeze mu Murwa w’u Rwanda.

Muri rond point yo mu Mujyi wa Kigali rwagati ni uku hameze...
Ifoto igaragaza amazi yo muri rond point yo mu Mujyi wa Kigali rwagati, hagati yayo hatatswemo inyenyeri. Abemeramana bahamya ko inyenyeri ariyo yayoboye abanyabwenge aho Yesu/Yezu yavukiye mu Mujyi wa Bethlehem
Rond point nini yo mu mujyi rwagati yashyizwemo umutako ushushanya inyubako ya Kigali Convention Centre
Roind Point y'Umujyi wa Kigali uyirebeye aho usa n'uyitaruye ni uku igaragara mu ijoro
Isura y'Umujyi wa Kigali yahindutse ndetse warimbishijwe bidasanzwe
Mu masaha y’ijoro, Kigali iri kurara ishashagirana mu ruvange rw’amatara atatse mu masangano y’imihanda
Umujyi wa Kigali warimbishijwe bidasanzwe mu myiteguro ya Noheli n’Ubunani
Bank of Kigali Plc yatatswe bidasanzwe mu kwifuriza abakiliya bayo n'Abanyarwanda muri rusange iminsi mikuru myiza
Kigali Marriott Hotel iri mu mahoteli y'inyenyeri eshanu u Rwanda rufite na yo yatatswe bihebuje. Uyirebeye inyuma hateye amabengeza
Uruzitiro rw'Ikigo cy'Ubwishingizi cya SONARWA rwashyizweho amatara arara amyasa ijoro ryose
Mu mihanda yose hatatswe bidasanzwe mu kwizihiza iminsi mikuru
Iminsi isoza umwaka ifatwa nk'idasanzwe ndetse bigaragarira mu myiteguro yayo
Rond point iri imbere ya Kigali Convention Centre na yo yatatswe amatara menshi atandukanye
Imihanda myinshi yo mu Mujyi wa Kigali ni urwererane
Akarere ka Gasabo karimbishijwe bidasanzwe ku nshuro yako ya mbere kagiye kwizihirizwamo iminsi mikuru kuva katahwa ku mugaragaro
Inyubako y'Ikigo cy'Igihugu cy'Iterambere (RDB) na yo yatatswe. Usibye amatara adasanzwe, iracyanafite amagambo ashishikariza abantu gusura igihugu muri gahunda ya "Visit Rwanda''
Banki y'Ubucuruzi ya Cogebanque na yo yatatse inyubako yayo iri mu Mujyi wa Kigali rwagati
Banki y'Ubucuruzi ya Cogebanque yongeye gutaka rond point yo ku Kisimenti i Remera
I&M yakoze umuteguro udasanzwe mu kwinjiza abakiliya bayo mu minsi mikuru ya Noheli n'umwaka mushya wa 2020
I&M Bank yahaye Abanyarwanda ikaze mu 2020
Umuteguro wayo ku gasongero ufite ijambo 2020 mu kugaragaza umwaka twerekezamo
Inyubako y'Umujyi wa Kigali yatatswe amabara menshi uhereye mu nkengero zawo
Umujyi wa Kigali wanashyizeho ibirugu bigaragaza ibyishimo ku munsi mukuru wa Noheli
Sosiyete y'Ubwishingizi ya Sanlam [yahoze yitwa Soras] ni uko isa mu ijoro
Rond point iri imbere y’inyubako ya Centenary House na yo yashyizwemo amatara n’ubutumwa bw’ibigo byifuriza ineza Abanyarwanda n’abakiliya babyo
Rond point iri mu Kanogo aho imihanda irimo uwa Kicukiro, uva Rugunga n'uwo mu Mujyi ihurira
Ubusitani bugezweho bwubatswe imbere y’Ibiro by'Umujyi wa Kigali nabwo burara bwaka
Ubu busitani bugezweho bwubatswe ku muhanda imbere y’Ibiro by’Umujyi wa Kigali, ahateganye n’icyicaro gikuru cya I&M Bank. Bwubatswe ku nyubako yo hejuru, kuko munsi yabwo harimo inzu yagenewe ishyinguranyandiko ry’Umujyi wa Kigali
Imihanda iri mu byerekezo bitandukanye irara ishashagirana

Amafoto: Niyonzima Moïse

Video: Hakizimana Alain


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza