00:00:00 IGIHE NETWORK KN KINYARWANDA EN ENGLISH FR FRANCAIS

Inyubako zikorerwamo na za Minisiteri i Kigali (Amafoto)

Yanditswe na Igirubuntu Darcy
Kuya 22 January 2022 saa 07:46
Yasuwe :

Guverinoma y’u Rwanda igizwe na Minisiteri 20, zose muri rusange zikorera mu nyubako z’imiturirwa 13 ziherereye mu Mujyi wa Kigali.

Izi nyubako ziri mu bice bitandukanye ni zo zicumbikiye abaminisitiri bacu kuva ku w’Ingabo kugera ku wa Siporo.

Muri rusange zikorerwamo n’abaminisitiri 20 n’abanyamabanga ba Leta 10, aho ujanishiije usanga abagore bangana na 55% mu gihe abagabo ari 45%.

Urebye mu mateka y’imyubakire mu Rwanda by’umwihariko muri Kigali, nibura mu myaka isaga 10 ishize, inyubako y’ahazwi nko kwa Rubangura ni yo yari mu zigezweho muri uyu Mujyi.

Yari izwi ku bawutemberamo kuko uwashakaga kurangira undi yayiheragaho kandi bikorohera impande zombi kuko yari izwi. Iyi nyubako yatangiye kubakwa mu 1987, irangira mu 1989.

Mu myaka yo hambere kandi ni ko byabaga bimeze kuko uwavugaga kuri ‘Minisiteri’, abanyamujyi n’abawugenda bahitaga bumva Kacyiru.

Aha hari inyubako nyinshi zikoreramo za Minisiteri zitandukanye zirimo iy’Uburezi, iy’Ubutegetsi bw’Igihugu, iy’Ubuhinzi n’Ubworozi n’iy’Abakozi ba Leta n’Umurimo. Izi ziyongeraho iy’Ibikorwaremezo n’iy’Umutekano mu Gihugu na zo zahahoze ariko zikaza kwimurirwa mu nyubako y’Ibiro bya Minisitiri w’Intebe ku Kimihurura.

Dufashe nk’urugero kuri Minisiteri y’Ibikorwaremezo, yimukiye ku Kimihurura mu nyubako nshya mu 2019 nyuma y’imyaka isaga 40 yari imaze ku Kacyiru ahazwi nka Minisiteri.

Mu 2010 ni bwo i Kigali huzuye inyubako ndende kurusha izindi ari yo Kigali City Tower (KCT). Uyu muturirwa ufite amagorofa 20 wafunguwe ku mugaragaro mu 2011 nyuma y’uko watangiye kubakwa mu 2006 na China Civil Engineering Construction. Icyo gihe washoweho miliyoni 20$, ni ukuvuga agera kuri miliyari 20 z’amafaranga y’u Rwanda. KCT ifite metero 90 ugana hejuru ni yo iyoboye izindi nyubako urebeye mu burebure bwazo.

Umwaka wa 2010 ufatwa nk’intangiriro y’izamurwa ry’imiturirwa yihagazeho muri Kigali. Iri terambere ntiryasize n’inyubako zikoreramo za Minisiteri zitandukanye kuko hari izamaze gutaha inshya zikoreramo, izindi zirasanwa.

Muri iyi nkuru turagaruka ku mafoto agaragaza inyubako Minisiteri 20 ziri mu gihugu zikoreramo muri Kigali. Izi ziyongeraho iya Village Urugwiro ahabarizwa Minisitiri muri Perezidansi ya Repubulika.

  Inyubako y’Ibiro bya Minisitiri w’Intebe: Ku wa 22 Mata 2019, ni bwo yatashywe, nyuma y’amezi 33 yubakwa ku nkunga ya miliyoni 27$ yatanzwe n’u Bushinwa. Nta mafaranga na make u Rwanda rwigeze rutanga ku iyubakwa ryayo kuko ni impano y’iki gihugu 100%.

Iyi nyubako iherereye ku Kimihurura. Ni yo ikoreramo Minisiteri nyinshi mu Rwanda kuko irimo Ibiro bya Minisitiri w’Intebe n’ibya Minisitiri ushinzwe Imirimo y’Inama y’Abaminisitiri (MINICAAF); Minisiteri y’Ibikorwaremezo n’iy’Ubutabera.

  Inyubako ya Minisiteri y’Ububanyi n’Amahanga n’Ubutwererane: Yatashywe ku wa 14 Mutarama 2009, yubatswe ku nkunga y’Abashinwa, hifashishijwe miliyoni 8,9$. Iyi nyubako iherereye ku Kimihurura iruhande n’Ikigo cy’Igihugu cy’Imisoro n’Amahoro (RRA) inakoreramo Minisiteri y’Ubucuruzi n’Inganda.

  Nyarugenge Pension Plaza: Iyi nyubako iherereye ahazwi nko mu Kanogo yuzuye mu 2011. Icumbikiye Minisiteri eshatu zirimo iy’Ikoranabuhanga mu Itumanaho na Inovasiyo, iy’Ibikorwa by’Ubutabazi n’iy’Ibidukikije.

  Minisiteri y’Ingabo: Ikorera mu nyubako iherereye ku Kimihurura mu Mujyi wa Kigali.

  Minisiteri y’Ubuzima: Iyi nyubako ikoreramo Minisiteri y’Ubuzima iherereye ku muhanda wa Sonatubes mu Karere ka Kicukiro.

  Minisiteri y’Urubyiruko n’Umuco: Inyubako ikoreramo Minisiteri y’Urubyiruko n’Umuco iherereye ku Kacyiru muri Gasabo. Ni iruhande rw’Ibiro by’Umuryango w’Ubumwe bw’u Burayi (EU). Inabarizwamo Minisiteri y’Uburinganire n’Iterambere ry’Umuryango.

  Stade Amahoro: Muri iyi stade ni ho habarizwa ibiro bya Minisiteri ya Siporo. Ukinjira mu marembo magari ya Stade Amahoro ni ho hari inyubako ikoreramo iyi minisiteri.

  Minisiteri y’Ubutegetsi bw’Igihugu: Inyubako yayo iherereye ku Kacyiru mu Karere ka Gasabo.

  Minisiteri y’Ubuhinzi n’Ubworozi: Ikorera mu nyubako iherereye ku Kacyiru. Izina ryayo ryatumye agace ikoreramo bamwe bakita Kacyiru Minagri.

  Minisiteri y’Uburezi: Inyubako ikoreramo iherereye ku Kacyiru ho mu Mujyi wa Kigali.

  Minisiteri y’Abakozi ba Leta n’Umurimo: Iyi Minisiteri na yo iherereye ku Kacyiru.

  Minisiteri y’Ubumwe bw’Abanyarwanda n’Inshingano Mboneragihugu: Ikorera mu nyubako nshya iherereye ku Kacyiru munsi y’Ikigo cy’Igihugu cy’Itangazamakuru, RBA.

  Minisiteri y’Imari n’Igenamigambi: Inyubako ikoreramo iherereye mu Mujyi wa Kigali rwagati imbere y’Ibiro by’Umujyi wa Kigali.

Village Urugwiro ni imwe mu nyubako zifite amateka akomeye mu Rwanda. Yubatswe mu 1975 n’Umuryango wahuzaga Ibihugu bya Afurika cyane cyane ibyakolonijwe n’u Bufaransa n’ibikoresha Igifaransa, Organization Commune Africaine et Malgache (OCAM)

Amafoto ya IGIHE: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .