00:00:00 IGIHE NETWORK KN KINYARWANDA EN ENGLISH FR FRANCAIS

Ifoto y’Umunsi: Ingwe iganje mu bwami bwayo muri Pariki y’Akagera

Yanditswe na Igirubuntu Darcy
Kuya 7 Mutarama 2023 saa 04:38
Yasuwe :

Ingwe ni imwe mu nyamaswa z’inkazi zibarizwa muri parike y’igihugu y’Akagera, zikundwa na ba mukerarugendo bitewe n’ibigwi zifite mu kwiruka, kurira ibiti n’ibindi.

Mu rugendo umufotozi wa IGIHE aherutse kugirira muri Pariki y’Akagera yagize amahirwe yo kubona iyi nyamaswa ndetse arayifotora.

Aya mafoto yafashwe ku wa 5 Mutarama 2023, iyi ngwe igaragara yuriye igiti isa n’iruhuka.

Mu kiganiro twagiranye na Ndagijimana Innocent ushinzwe kuyobora ba mukerarugendo muri iyi parike yavuze ko ingwe zikunze kugaragara ku manywa nubwo rimwe na rimwe zikunze kwihisha.

Ati “Muri Pariki y’Akagera, ingwe ziba ahantu hose gusa zikunda kwihisha uretse ko abajya gusura bakunze kuzibona mu gihe cy’amanywa iyo ziryamiye mu biti cyangwa zigendagenda no ku butaka, abandi bakazibona iyo bari gusura nijoro igihe ziba ziri guhiga.”

Yakomeje avuga ko “mu nyamaswa zikunda kurya harimo inyamugeri, imparage zikiri nto, imbogo z’ibyana, indonyi n’izindi.”

Ingwe ni inyamabere z’indyanyama, ibarirwa mu rwego rw’injangwe nini (big cats) mu bwoko bita Panthera. Muri uyu muryango niho abahanga mu by’ubushakashatsi ku nyamaswa, bashyize intare, Tijeri, Jaguar, ingwe zo muri Afurika n’izindi ngwe ziba ahantu hari urubura.

Iyo witegereje, izi njangwe, zigaragaza ibintu byinshi zihuriyeho harimo n’imyitwarire. Nyamara ariko abashakashatsi banagaragaje ko hari ibimenyetso byerekana ko yaba Jaguar cyagwa intare byegereye cyane ingwe.

Ingwe iranyaruka cyane, ikaba ifite ubwoya busa n’ibara ry’umuhondo burimo ubudomo bwirabura. Yurira ibiti ku buryo bwihuse cyane kandi igakoresha ubuhanga buhanitse kuko igenda inyonyomba bucece.

Ingwe ni inyamaswa igira ubuhanga buhanitse mu kwihisha, dore ko zo zinashobora kuba mu duce bigaragara ko izindi ndyanyama nini bibarizwa mu muryango umwe zashizemo. Hari aho usanga ingwe ziba kandi ahantu haba abantu gusa zikagira uko zihaba ndetse zikabihisha bigakunda.

Urugero rw’ibi ni ingwe zikunze kuba mu Mujyi wa wa Nairobi muri Kenya ndetse n’indi mijyi imwe n’imwe yo muri Afurika.

Ingwe y’ingabo yakuze neza ishobora gupima ibiro bigera kuri 60, ikagira igihagararo kireshya na santimetero 65 uhereye ku ntugu.

Ingore ikuze neza akenshi iba ari ntoya ku buryo usanga ari nka bitatu bya kane by’ingabo ikuze neza, kuko usanga zifite nk’ibiro 40, zigapima santimetero 50 z’igihagararo, ufatiye ku intugu.

Ugereranyije na za Jaguar, Puma na za Tijeri, ingwe usanga zifite umubyimba utandukanye bitewe n’aho ziba ndetse n’ibyo kurya zihabona. Muri rusange ingwe ziba ahantu hafunguye (open areas), zikunze kuba nini ugereranyije n’iziba mu mashyamba. Ingwe ziba mu mashyamba, ziba zirabura (zijimye) ugereranyije n’iziba mu mikenke cyangwa ahantu hafunguye.

Mu myaka myinshi ishize, ingwe na Panteri zafatwaga nk’amoko abiri atandukanye, nyamara mu kinyejana cya 20, abahanga mu by’ubushakashatsi, bemeje ko izi ari inyamaswa zidatandukanywa kubera ko zihuje imiterere y’ubuzima, izina Panteri rikurwaho rityo, ku buryo uyu munsi, izi nyamaswa zombi zitwa ingwe.

Gusa kugeza uyu munsi, abantu bamwe baracyita ingwe z’umukara ko ari Panteri kandi ko zitandukanye n’ingwe nyirizina basanzwe bazi.

Nk’izindi njangwe zose, zaba inini cyangwa intoya, ingwe zifite ubuhanga budasanzwe bwo kurira ibiti mu kanya gato byaba ibifite umubyimba munini cyangwa ibito, ubundi bugenge zigira ni uko zinashobora kumanuka kandi umutwe ureba hasi zitagize impungenge izo arizo zose zo kuba zagwa hasi, ibi bikazigira injangwe zifite uyu mwihariko, kubera igikonjo kinini kizishoboza gukora ibi.

Muri rusange ingwe ntizikunda kujya mu mazi, nyamara rimwe na rimwe hari ubwo uzisanga zoga dore ko zizi koga neza cyane.

Kugeza ubu nta gihe kizwi ingwe imara mu cyanya kamere, gusa hari ingwe y’ingore yakurikiranywe igihe kirekire ku buryo yamaze imyaka igera kuri 16.

Ingwe irahiga kandi ikagenda yonyine, nyamara hari ubwo igaragara iri kumwe n’ingore yayo cyane igihe biri mu gusenzanya cyangwa ikagaragara iri kumwe n’ibibwana na nyina. Ni gake cyane ushobora kubona ingwe y’ingabo iri kumwe na ngenzi yayo.

Ingwe zihanahana amakuru hagati yazo zikoresheje amaso yazo cyangwa kurebana, ziharagata ibiti, zibyanduza mu rwego rwo gushyiraho ibimenyetso, zikoresheje amaguru y’inyuma. Ikindi ni uko ingwe zisohora ijwi rimeze nk’urukero rukera kandi iri jwi rikaba rishobora kumvikanira mu birometero hagati ya 2 na 3.

Ingwe zihiga nijoro, icyakora zishobora guhiga ku manywa iyo nta banzi benshi bari mu gace ihigiramo nk’intare. Ingwe ikunda guhiga nijoro kubera ko inyamaswa zihigwa akenshi zidakora n’ijoro kuko nibwo ziba zibyagiye, iki ni cyo gihe cyazo zihigiramo.

Ahanini ingwe zikunda gutegera ahantu zumva zitekanye nko mu biti cyangwa ahantu h’ibitare, ubundi zigategerereza ahantu inyamaswa zikunze kujya kunywera cyangwa kurishiriza. Ingwe izi kwihisha, aho yifashisha ibihuru, ibitare n’ahandi, aho igenda yomboka kugira ngo ibashe kwegera cyane ahari umuhigo.

Intera ibadukiramo ikurikiye umuhigo, ni ukuvuga hagati yayo n’icyo igiye gufata, iba ari ngufi ku buryo iba iri munsi ya metero 10. Nyuma yo gucakiza ibikonjo by’imbere. Yica inyamaswa nini iyifashe umuhogo, mu gihe iyo ifashe inyamaswa ntoya, iyiruma hejuru ku ijosi.

Hari nubwo ingwe zagiye zigaragara zihiga ibikururanda n’intubutubu, ndetse rimwe na rimwe hari nubwo ingwe zirya ibyatsi . Hafi y’aho abantu batuye, ingwe ni kenshi zica amatungo yabo nk’ihene, intama, n’ingurube. Ingwe kandi hari igihe zihiga imbwa zo mu rugo, imbwebwe, amasega, n’izindi.

Ingwe ishobora kubwagura bwa mbere ifite imyaka ibiri n’igice, mu gihe ingabo ishobora kwimya igeze ku myaka ibiri. Nyuma y’amezi abiri kugera kuri atatu ibibwana bivutse bitangira kugendana na za nyina, aha biba bipima ibiro biri hagati ya 3 na 4.

Aha kandi ninaho bitangira kurya inyama bihereye ku bihore n’imiserebanya kuko nta mikaka biba bifite. Imikaka biyimera uhereye ku mezi umunani bivutse. Ikibwana gifite hagati y’amezi mezi 12 na 18, kiba gishobora kwigenga kikava kuri nyina.

Amafoto: Igirubuntu Darcy


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .