Iki gikorwa cyabereye mu Mudugudu wa Barezi, Akagari ka Rubirizi, Umurenge wa Kanombe, mu Karere ka Kicukiro, ku wa 19 Ugushyingo 2026.

Umwihariko w'ubu buryo ni uko hifashishwa ibinyabuzima bito biba mu butaka, bifasha kongera intungamubiri n'ubushobozi bwo gufata amazi, bityo ingemwe zigakura neza.

Umuyobozi Mukuru wa RFA, Dr. Concorde Nsengumuremyi, yavuze ko gutera ibiti bidahagije igihe ubutaka biterewemo budafite uburumbuke.

Ati “Iyo duteye ibiti, tugomba no kureba ubutaka tubiteramo. Niba ubutaka butameze neza, ibiti bishobora kutabasha gukura uko bikwiye. Ni yo mpamvu gusana ubutaka no kongera amashyamba bigomba kugendana.”

Umushakashatsi Mukuru muri Oath Africa, Dr. Benjamin Bukombe, yavuze ko hatoranyijwe amoko atandatu y'ibiti kavukire, hakororwa ingemwe zibarirwa mu magana, zizakurikiranwa mu gihe cy'amezi ane kugira ngo harebwe uko ubu buryo buzifasha gukura.

Umuyobozi w'Ishami muri RFA, Dr. Ivan Gasangwa, yavuze ko u Rwanda rutera ibiti bigera kuri miliyoni 100 buri mwaka, ariko ko hakenewe gukomeza gukoresha ubushakashatsi n'ikoranabuhanga kugira ngo birusheho gukura neza.

Umuyobozi Mukuru wa Oath Africa, Bobby Pittman, yavuze ko uyu muryango umaze imyaka ine ukorera mu Rwanda, kandi ko iki gikorwa ari intangiriro y'ubufatanye bwagutse bugamije gusana amashyamba.

Umuyobozi wa Oath Africa mu Rwanda, Dr. Sunita Pitamber, yavuze ko u Rwanda ari rwo rwatoranyijwe nk'ahantu ho kugeragereza ibisubizo bishya byo gusana ubutaka, mbere yo kubigeza mu bindi bihugu bya Afurika.

Umuturage witwa Ishimwe Hategekimana yavuze ko kuva yagera muri ako gace mu 2021, yiboneye impinduka mu kongera ibiti no kubungabunga amashyamba, ashimira uruhare rwa RFA n'abafatanyabikorwa bayo.