00:00:00 IGIHE NETWORK KN KINYARWANDA EN ENGLISH FR FRANCAIS

Ubucuruzi n’ubuhemu mu rukundo rwa Diaspora! Akangononwa mu bakundana bakurikiye visa

Yanditswe na Ishimwe Deborah
Kuya 3 June 2022 saa 01:01
Yasuwe :

Ejo bundi, inshuti yanjye yambwiye ko yifuza kujya gushakira ubuzima ku Mugabane w’u Burayi. N’amatsiko menshi namubajije inzira azanyuramo cyane ko nzi neza ko nta na pasiporo agira.

Yansubije ko yaganiriye na mubyara we bemeranya ko azamusura mu Rwanda, bagakora ubukwe hanyuma bagasubirana iyo mu mahanga nk’umugabo n’umugore.

Sindi bwinjire ku nkuru z’ibyakurikiyeho gusa byarangiriye mu marira. Uru ni urugero rumwe rwerekana ko hari abakundana bakanashakana kubera ko bashaka ibyangombwa [visa] bibafasha kujya gutura mu bihugu byo hanze.

Muri iyi minsi hakomeje kumvikana inkundura y’inkundo ziri kugaragara hagati y’abasore n’abakobwa cyangwa abahungu bakundana n’abakuze bagamije kubakuraho visa.

Aha usanga abantu babiri biyemeza gukora ubukwe kandi batazabana. Usanga umwe ufite ubwenegihugu bw’igihugu runaka cyane cyane muri Leta Zunze Ubumwe za Amerika no ku yindi migabane itandukanye aba agamije kubera undi inzira yamugeza kuri ubwo butaka afata nk’ubwo yifuza guturaho.

Hari kandi abatuye mu bihugu byo hanze bagerayo bakifuza kubakana urugo n’ab’aho baturuka bakaba babwira inshuti zabo cyangwa imiryango kubashakira abakunzi mu Rwanda.

Uwo babwiye akenshi iyo yumvise harimo gushaka umukunzi kandi ari hanze mu bihugu by’u Burayi na Amerika, ahita abyemera atazuyaje cyangwa ngo agendere ku rukundo ahubwo usanga ashituwe no kuba yaharuriwe inzira yo kugerayo.

Hari igihe bamwe mu bagenda bajyanywe n’abakunzi babonye muri ubwo buryo cyangwa se ababatumije badashobora kubana cyane ko usanga bafite gahunda zitandukanye, umwe ashaka kugira umuryango undi ashaka inzira imugeza i Burayi gusa.

Uwitwa Tite Rutikanga aganira n’umunyamakuru wa IGIHE, yamusangije ubuhamya bw’uwo yigeze kubona byabayeho wari utuye mu Bufaransa.

Yagize ati “Hari umukobwa wari utuye Bruxelles mu Bubiligi afite umukunzi mu Rwanda yarabuze uko yamutwarayo. Nyuma uwo musore bakundanaga yamubwiye ko yabonye uburyo yamugeraho byoroshye, umukobwa amubajije amubwira ko yabonye uba mu Bufaransa ukeneye umugabo cyane ndetse ko yiteguye kumurihira ibintu byose akagera i Paris. Umukobwa yaraje aduhindaho ngo yabonye umukunzi i Kigali atwereka amafoto, yohereza impapuro zimutumira kuko yagombaga kuza bakazakorera ubukwe mu Bufaransa.”

Icyo gihe umusore yasigaranye impungenge ku buryo azava mu Bufaransa, agasanga umukunzi we wa nyawe mu Bubiligi.

Mu kuyobya uburari, aba bombi bemeranyije ko nagera mu Bufaransa, azahita afata gari ya moshi igana mu Bubiligi ndetse ni nako yabigenje.

Uyu musore wagombaga kunyura mu Bufaransa, umuryango w’umukobwa wamufashije gushaka ibyangombwa waramutegereje uramuheba.

Rutikanga yakomeje ati “Umusore yahise abwira wa mukunzi we uri mu Bubiligi ko yamaze kubona ibyangombwa byose bizamugeza mu Bufaransa ariko afite imbogamizi y’uko azahava kuko umukobwa [bemeranyije kurushinga] azaba amutegereje.

Icyo gihe umukobwa yahise asubiza umusore ko atazasohoka mu kibuga ko ahubwo azahita afata gari ya moshi izamugeza Bruxelles.

Yakomeje agira ati “Umunsi umusore aza twarahuruye tujya ku kibuga cy’indege kumwakira, umukobwa yiteguye yaguze inzoga zo kwakira abantu ngo umukunzi araza, kumbe umusore yarahageze ahita yigira Bruxelles umukobwa arategereza araheba. Inzoga twari bunywe twishimye byarangiye zibaye iz’akababaro. Byaje kumenyekana nyuma ko yasanze wa mukunzi we bahoze bakundana bakiga muri kaminuza i Kigali bashakishije baza kubwira n’ab’i Bruxelles ko yagezeyo.”

Rutikanga yasobanuye ko mu rukundo rw’abantu bataziranye, batari mu bihugu bimwe hashobora kuvuka ibibazo bishingiye ku buhemu.

Yagize ati “Nk’iyo umukobwa cyangwa umuhungu abeshye uri hanze ko amukunda kandi ashaka kumugenderaho ngo agere mu Burayi aba akerereje uwo agiye kubana kuko aba yamutakajeho ibintu byinshi birimo umwanya n’amafaranga.”

Byukusenge Aime we yagarutse ku buhamya bw’uwo babanaga mu Bushinwa wagiye ashakira abakobwa batandukanye amashuri muri icyo gihugu bahagera bakamwanga.

Yagize ati “Umusore yari ageze mu gushaka ariko kubera ko usanga gushakana n’abanyamahanga bigoye cyane ko baba badahuje imico, yifuza kubona umukunzi mu Rwanda. Yafashe gahunda yo gutereta umukobwa akamufasha gushaka ishuri yagera mu Bushinwa bakazabana ariko amaze kuhagera yasanze ashaje bitewe n’igihe yari amazeyo aramwanga.”

“Uwo musore yabigerageje inshuro irenze imwe ariko abakobwa bahagera bakamwanga cyangwa abandi basore bagahita babamutwara. Yaje kubireka ubwo yashakiraga umukobwa ibyangombwa byose amaze kubibona atungurwa no kubona bamwampitse impeta mu Rwanda.”

Izi ni zimwe mu ngero zerekana ko abakundana bashaka kujya hanze cyangwa bifuza visa, kenshi bishobora kutabahira uko babitekereje.

Igiteye inkeke kurusha ibindi ni uburyo muri iyi minsi, usanga hari ababihinduye nk’ubucuruzi.

Uwahaye IGIHE amakuru yavuze ko nk’uwifuza kujya kurongora umukobwa wo muri Canada cyangwa Amerika, asabwa kumuhonga.

Yavuze ko nibura bishobora kumusaba kumuha miliyoni zitari munsi ya 15 Frw, ubariyemo amatike y’indege, kumutunga ageze i Kigali n’indi myiteguro yose ijyanye n’ubukwe.

Ibi byose umusore ahitamo kubikora ku iturufu yo kubona visa imuganisha muri ibyo bihugu, aho yizera ko yashakira ubuzima bikagenda neza.

Ibi ni nako bigenda kuri bashiki babo ariko baba mu bihugu by’amahanga, aho usanga hari abajya kurushinga bagatekereza gusubira ku ivuko gushaka uwo bakubakana rukaramba cyane ko usanga badakunda gushakana n’abazungu.

Abahungu n’abakobwa basigaye bakundana bashaka visa zigana mu bihugu by'amahanga

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .