00:00:00 IGIHE NETWORK KN KINYARWANDA EN ENGLISH FR FRANCAIS

Iwacu yabaye umukobwa wa mbere ukoze akazi ko guha ikaze abakiliya muri Hotel y’i Abu Dhabi

Yanditswe na Muhonzire Sylvine
Kuya 2 Nzeri 2021 saa 08:52
Yasuwe :
0 0

Umunyarwanda w’imyaka 24, Iwacu Grace, niwe mukobwa wa mbere ukoze akazi ko kwakirira abakiliya ku muryango muri Hotel y’inyenyeri eshanu iherereye i Abu Dhabi, mu Murwa Mukuru wa Leta Zunze Ubumwe z’Abarabu [UAE].

Aka kazi benshi bazi ko gakorwa n’abagabo, Iwacu yatangaje ko yumva atewe ishema no kugakora aho asanganira abakiliya kuva bakiva mu modoka, akabakingurira umuryango, akita ku mizigo bafite ndetse akanabaherekeza kugeza aho bakirirwa (reception).

Aganira n’ikinyamakuru cyo muri iki gihugu cya Khaleej Times, Iwacu Grace, ukorera hotel ya Conrad Abu Dhabi Etihad Towers yagize ati“Birashimishije cyane gukora aka akazi ko guhagarara ku muryango muri hoteli ikomeye nk’iyi. Numva mpawe agaciro nk’umugore kuko byari bizwi ko ari akazi k’abagabo mu bijyanye n’amahoteli.”

Mu bintu yishimira avuga ko ari uguhura n’abantu benshi baturutse mu bihugu bitandukanye cyane ko iyi hoteli iri mu zikomeye muri UAE.

Mbere yo gutangira aka kazi muri Nyakanga 2021, Iwacu yakoreraga mu Rwanda nyuma aza kugira amahirwe yo kuba umwe mu batoranyijwe n’umuryango Evolvin Women ufasha abagore batuye mu bihugu biri mu nzira y’amajyambere kubona akazi ndetse n’amahugurwa mu bijyanye n’amahoteli muri UAE.

Hotel ya Conrad Abu Dhabi Etihad Towers niyo hotel ya mbere muri Abu Dhabi yakoranye n’uyu muryango mu guha amahirwe abagore n’abakobwa kwimenyereza umwuga no kwiga ibijyanye n’amahoteli mu gihe cy’imyaka ibiri. Ubu ifite abaturuka muri Zambia, Rwanda na Ghana.

Iwacu avuga ko ubumenyi azakura muri iki gihugu azabukoresha mu guteza imbere urwego rw’amahoteli mu Rwanda.

Ati “Kwimakaza uburinganire mu nzego zitandukanye z’ubuzima ni ingenzi. Nizeye neza ko nzakoresha aya mahirwe ndahura ubumenyi bwinshi mu bijyanye n’amahoteli hano muri UAE, nkabujyana mu gihugu cyanjye nyuma yo kurangiza akazi hano.”

Ndagijimana Isabella w’imyaka 25 nawe watoranyijwe mu bagiye gukora muri UAE avuga ko ubumenyi azahavana buzamufasha gukora akazi kanoze nagaruka mu Rwanda.

Umuyobozi wa Evolvin’ Women, Assia Riccio, avuga ko iyo abakobwa n’abagore barangije kwiga imyaka ibiri, bafashwa kubona akazi mu bihugu batuyemo. Ati “Tuba dushaka ko ubumenyi bahabwa babujyana mu bihugu byabo, bakigira ntihagire uwo basaba amafaranga ndetse bakita no ku miryango yabo.

Kuva mu 2017, uyu muryango umaze gufasha abakobwa 55 aho ubashakira aho bakora mu mirimo itandukanye yo muri Hotel ndetse bateganya ko mu mpera za Nzeri bazaba bamaze gufasha abagera kuri 80.

Iwacu Grace [ibumoso] na Ndagijimana Isabella [iburyo] bazamara imyaka ibiri muri UAE bahabwa ubumenyi mu bijyanye n'amahoteli nyuma bafashwe gushakirwa akazi nibagera mu Rwanda

Amafoto ya Iwacu ari mu kazi

Iwacu Grace atewe ishema n'akazi yabonye muri Leta Zunze Ubumwe z'Abarabu

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .