Ibyo wamenya kuri Karako, uri inyuma y’ikorwa ry’urukingo rwa Covid-19 rwa Pfizer-BioNTech

Yanditswe na Ntabareshya Jean de Dieu
Kuya 19 Ukuboza 2020 saa 02:00
Yasuwe :
0 0

Katalin Karako w’imyaka 65 akomoka muri Hongrie, ni umushakashatsi w’umuhanga uri mu bari mu rugendo rugamije kurokora Isi icyorezo cya COVID-19 kuko ari inyuma y’ikorwa ry’urukingo rw’iki cyorezo rwa Pfizer-BioNTech.

Hashize imyaka myinshi Katalin akora ubushakashatsi bujyane n’utunyangingo tuboneka mu mubiri w’umuntu. Yihebeye ibyo gushakashaka ku mikorere ya Ribonucleic Acid, RNA. RNA umuntu yayisobanura nk’intima nto zihuza mu mubiri w’umuntu kugira ngo zikore igikorwa runaka.

Urugero, ihuriro rya RNA ni zo zihura kugira ngo zikore ibyubaka umubiri (protéine) bifasha ingingo zawo gukura. Uyu mugore rero, ni umushakashatsi ukomeye ku Isi ku bijyanye Ribonucleic Acid.

Ubushakashatsi bwe yabutangiriye aho avuka ahagana mu 1970 ubwo gushakashaka kuri RNA byari bikiri bishya ku Isi. Icyo gihe yakoraga muri Kaminuza ya Szeged aho yanaboneye Impamyabumenyi y’Ikirenga.

Laboratoire y’iryo shuri yaje kubura ubushobozi, hanyuma mu 1985 arirukanwa. Yatangiye gushakisha akazi mu bihugu byo hanze aza kukabona muri Leta Zunze Ubumwe za Amerika muri Leta ya Philadelphia muri Kaminuza yitwa Temple. Byamusabye kugurisha imodoka y’umuryango we kugira ngo abone amafaranga y’itike.

Kuko Abanya-Hongrie batari bemerewe gusohokana amafaranga mu gihugu, byabaye ngombwa ko ayo yakuye muri iyo modoka ayahisha mu gipupe cy’umwana we w’imyaka ibiri asohoka mu gihugu atyo. Nta muntu n’umwe yari azi muri Amerika aho yari abonye akazi.

Ahagana mu 1980, hari hakenewe abantu bafite ubumenyi mu mikorere ya ADN bagombaga gufasha mu buvumbuzi bwagombaga kwifashishwa mu kuvura Cancer gusa Kariko yanze gukora ku bya ADN aguma kuri RNA.

Mu 1995 yaje kurwara Cancer anyura mu bihe bikomeye, dore ko yabaga wenyine muri Amerika kuko umugabo yari yarasigaye muri Hongrie ari kurwana no kubona ibyangombwa byatuma ajya muri Amerika.

Imyaka ye yose yayimaze mu bushakashatsi muri laboratoire, akandi kazi kose akakanga. Ngo umugabo we akunda kumubwira ko kuba muri laboratoire kwe ari nko kwidagadura.

Mu 1997 yaje guhura na Drew Weissman wakoraga ubushakashatsi ku rukingo rw’agakoko gatera SIDA. Biyemeje gukorana, batangira gukora ubushakashatsi ku buryo RNA ishobora kwifashishwa mu kurema ubushobozi bw’umubiri buyifasha kurwanya virus mu mubiri.

Ubwo bushakashatsi nibwo bwashingiweho mu gukora urukingo rwa Covid-19 aho Weissman na Kariko ari bamwe mu bantu bari gusabirwa guhabwa igihembo cy’amahoro cya Nobel. Weissman ubu ni Visi Perezida w’Ikigo cy’Abadage cya BioNTech cyakoze urukingo rwemejwe mbere y’izindi zose.

RNA ni nayo yifashishijwe mu gukora urukingo rwa Moderna rwakozwe n’Abanyamerika. Uru rushobora kongera ubudahangarwa bw’umubiri w’uruhawe ku kigero cya 95% mu gihe urwa Pfizer- BioNTech rwo ari ku kigero cya 90%.

Zombi umuntu azihabwa inshuro ebyiri, urwa Pfizer- BioNTech hacamo iminsi 21 kugira ngo umuntu ahabwe urwa kabiri naho urwa Moderna hacamo ibyumweru bine.

Katalin Karako amaze imyaka 40 akora ubushakashatsi. Ni umwe mu bantu Isi ikesha byinshi uyu munsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .