Imbogamizi ku bivuriza ubumuga i Gatagara bahabwa ubuvuzi bucagase kubera imiterere ya mituweli

Yanditswe na Prudence Kwizera
Kuya 7 Kanama 2020 saa 10:30
Yasuwe :
0 0

Abivuriza mu Bitaro bya Gatagara bivura indwara z’amagufwa n’ubugororangingo, bavuga ko hakwiye kugira igikorwa kuko iyo bafite ikarita y’ubwisungane mu kwivuza (mituweli) badahabwa serivisi zose bigatuma batavurwa ngo bakire.

Abagana ibyo bitaro biherereye mu Karere ka Nyanza baganiriye na IGIHE bavuga ko serivisi zitandukanye bahakenera, bisaba ko biyishyurira 100% kandi baratanze umusanzu w’ubwisungane mu kwivuza, bakibaza impamvu yabyo.

Munganyinka Goreth waje kuvuza umwana we wavunitse akaboko avuga ko atumva neza ukuntu asabwa kwishyura hatitawe ko yatanze umusanzu w’ubwisungane mu kwivuza.

Ati “Umwana wanjye yavunitse akaboko biba ngombwa ko bakabaga, ngeze hano barambwira ngo ‘ibyo tugukorera bindi ntabwo bikorana na mituweli’ bahita bambwira ngo urishyura ibihumbi 30. Ndabaza nti ‘ese ndishyura ibihumbi 30 gute kandi naratanze mituweli?’ ndavuga nti iyo menya ko ari uku bimeze ntabwo mba narishyuye mituweli.”

Akomeza avuga ko bamuhaye gahunda yo kugaruka nabwo ahageze bamuca ibihumbi 20 Frw batitaye ku kuba yatanze mituweli.

Undi mubyeyi witwa Katabogama Spéciose avuga ko yaje kwivuriza i Gatagara basanga akeneye inyunganirangingo ariko atungurwa no gusanga ikarita y’ubwisungane mu kwivuza ntacyo imumariye.

Ati “Naje nzi ko bakorana na mituweli neza ariko bakimara kumbaga uwo mwanya bahise bansha amafaranga agera mu bihumbi 100, kugeza ubu n’imiti hari iyo niguriye mbona mituweli ntacyo imariye kandi nari nzi ko igira icyo imfasha.”

Abivuriza mu Bitaro bya Gatagara baganiriye na IGIHE bifuza ko Leta y’u Rwanda yabafasha, kugira ngo mituweli ijye yitabwaho muri serivisi bahabwa.

-  Abaganga bibatera agahinda

Bamwe mu batanga serivisi z’ubuvuzi mu Bitaro bya Gatagara bavuga ko bababazwa no kubona umurwayi batangiye kwitaho atashye adahawe ubuvuzi bwose kubera ubushobozi, bakifuza ko Leta yagira icyo ibikoraho.

Byukusenge Béatrice uhagarariye serivisi y’ubugororangingo yavuze ko ikibazo gihari gikomereye abivuza bakoresheje ubwishingizi bwa mituweli ari uko batemererwa kugendera kuri gahunda ya muganga nk’uko bimeze ku bakoresha ubundi bwishingizi.

Yasobanuye ko ubusanzwe umuntu ukeneye ubugororangingo avurwa mu gihe cy’amezi abiri agataha, akazongera kugaruka nyuma y’amezi abiri bagakomerezaho, agasubira mu rugo gukomeza ibyo bamwigishije noneho akazongera kugaruka nyuma y’amezi abiri nanone.

Ati “Ibyo bishoboka ku bafite ubundi bwishingizi, ariko abishyurirwa na mituweli bemera kubishyurira rimwe mu mwaka ubwo ni ukuvuga ngo ni amezi abiri mu mwaka gusa bikaba birarangiye akazagaruka umwaka utaha. Imbogamizi nini irimo aho ni uko ibyo twakoze mu mezi abiri, iyo hashize undi mwaka tutarongera kubona umurwayi biba bibaye imfabusa ni nk’aho tuba dukoreye ubusa kuko n’ubundi aza ari ugutangirra kuri zeru.”

Yakomeje avuga ko iyo umurwayi adakurikiranywe ngo ahabwe ubuvuzi mu gihe cyagenwe bituma asubira inyuma, ibyo bakoze byose bigahinduka imfabusa.

Ati “Tuvuge niba ari umwana wahinamiranye amaguru cyangwa amaboko, twari tugeze ku rwego rwo kuyarambura neza agahagarara, iyo agiye akamara umwaka atagarutse ahita yongera akihina akongera akicara, akagaruka yaricaye kandi yari ageze ku rwego rwo guhagarara. Ubwo urumva ko tuba dusa n’abakoze ubusa.”

Dr Ndahayo Alphonse ukuriye serivisi y’ubuvuzi mu Bitaro bya Gatagara, yavuze ko muri rusange bishimira ko Leta yabafashije batangira gukorana na mituweli, kuko mbere bataratangira gukorana byari ibibazo bikomeye cyane.

Gusa yavuze ko harimo ibibazo bindi bikwiye kwitabwaho kuko ababazwa no kubona umuntu yaje abagana akeneye ubuvuzi ariko ntabuhabwe ku buryo bwuzuye kubera inziitizi y’ubwishingizi bwa mituweli.

Ati “Ntabwo numva nishimye kuko kuba umuntu aje agushakaho serivisi, unabona hari ibindi warenza ku byo umukoreye ariko akagenda utabimukoreye, birumvikana ko utishima.”

Abatanga serivisi z’ubuzima ku Bitaro bya Gatagara baganiriye na IGIHE bifuza ko Leta ikwiye kugira icyo ikora kugira ngo abafite ubumuga bivuza bakoresheje ubwishingizi bwa mituweli, bivuze neza hakurikijwe uko muganga yabigennye.

Umuyobozi Mukuru w’Ikigo cyita ku bafite Ubumuga (HVP Gatagara), Frère Kizito Misago, yavuze ko batangiye gukorana na mituweli mu 2018 ariko kugeza ubu hari serivisi zimwe na zimwe itishyura zirimo insimburangingo n’inyunganirangingo.

Yavuze ko icyo kibazo cyagiye kiganirwaho ndetse no mu Nteko Ishinga Amategeko cyigeze kuvugwaho.

Frère Kizito Misago yavuze ko no muri serivisi ivura inkomere n’abamaze kubagwa naho badakorana na mituweli ku buryo ari imbogamizi ikomeye ku bitaro ubwabyo no ku babigana baje kwivuza.

Yavuze ko icyo bakora nk’ubuyobozi bwa HVP Gatagara ari ugukomeza kumenyesha inzego zibishinzwe ikibazo gihari kugira ngo zibafashe kugikemura kandi hari icyizere ko ibyifuzo byabo bizitabwaho.

-  Hari intambwe yatewe bishimira

Ubuyobozi bwa HVP Gatagara n’abakozi batanga serivisi z’ubuvuzi mu Bitaro by’icyo kigo bishimira ko mu myaka mike ishize hari intambwe yatewe bityo bibaha icyizere ko n’ibindi bibazo bihagaragara bizakemuka.

Bimwe mu byo bishimira harimo ko mu 2017 Leta yemereye Centre ya Gatagara kuba Ibitaro byihariye by’indwara z’amagufwa n’ubugororangingo; aho abana bavurirwa hatandukanyijwe n’ahavurirwa abantu bakuru; habonetse abafatanyabikorwa batanga ubufasha butandukanye; naho mu 2018 byemerewe gukorana na mituweli n’ubwo atari ku buvuzi bwose.

Imbogamizi ikomeye ku bivuriza ubumuga i Gatagara bahabwa ubuvuzi bucagase kubera imiterere ya mituweli
Mu Bitaro bya Gatagara haboneka insimburangingo zitandukanye
Mu Bitaro bya Gatagara hakorerwa insimburangingo n'inyunganirangingo
Zimwe mu nyunganirangingo ziboneka mu Bitaro bya Gatagara
Bimwe mu byuma byifashishwa mu bugororangingo mu Bitaro bya Gatagara
Ibitaro bya Gatagara biganwa na benshi bakenera kwivuza indwara zitandukanye
Icyumba cyagenewe kuvuriramo abana bakeneye ubugororangingo mu Bitaro bya Gatagara

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .