Babyl yahawe uburenganzira bwo kohereza abarwayi ku bitaro by’uturere

Yanditswe na Twarabanye Venuste
Kuya 27 Mata 2020 saa 03:53
Yasuwe :
0 0

Ikigo gitanga ubuvuzi binyuze kuri telefoni, Babyl, kiratangaza ko uretse ubuvuzi gisanzwe gitanga, ubu gifite uburenganzira bwo kohereza umurwayi ku bitaro by’Akarere (transfer) nyuma y’amasezerano y’ubufatanye giherutse gusinyana na Guverinoma y’u Rwanda.

Muri Nzeri 2016 nibwo Babyl yatangiye gukorera mu Rwanda igirana amasezerano y’igerageza na Guverinoma, kubera ko uburyo bw’ubuvuzi butangiwe kuri telefoni bwari bushya. Iryo gerageza ryagombaga kwerekana niba u Rwanda rukeneye ubwo buvuzi.

Mu kiganiro na IGIHE, Dr. Patrick Singa ushinzwe ubuvuzi muri Babyl yavuze ko igerageza bakoze ryerekanye ko 80% y’abarwayi bagana Babyl baturuka hanze ya Kigali, 50% muri bo ari abagore. Ni mu gihe hatekerezwaga ko bishobora kuzaba iby’abatuye i Kigali gusa.

Babyl yerekanye kandi uburyo iryo koranabuhanga rizahuzwa n’imikorere isanzwe y’Ubwishingizi mu Kwivuza bukoreshwa mu Rwanda.

Mu kureba uko abantu bishimira Serivisi iyo bagiye ku Kigo nderabuzima cyangwa bakoresheje Babyl, yavuze ko abagera kuri 90% mu bakoreweho ubushakashatsi bashimye Serivisi za Babyl.

Ni mu gihe nanone abaturage bagaragaje ko gukoresha Babyl byatumye badatakaza umwanya n’amafaranga bitari ngombwa. Nyuma y’ubwo bushakashatsi Babyl yongeye kuganira na Guverinoma maze ku wa 02 Werurwe 2020 basinyana amasezerano y’ubufatanye y’imyaka 10.

Ayo masezerano yabemereye kuvura indwara zimwe na zimwe batari bemerewe mbere, harimo kuvura abana bari munsi y’imyaka 18. Ubu bemerewe kuva ku myaka 12 kuzamura.

Bongerewe kandi gufasha abafite indwara zidakira, nka Kanseri, Serivisi zo kuboneza urubyaro n’ubuzima bw’imyororokere guhera ku bana bafite imyaka 12 kuzamura.

Babyl yari isanzwe ikorana n’ibigo nderabuzima yanemerewe gukorana n’ibitaro by’uturere kuburyo bashobora kohereza umurwayi ku bitaro (transfer) bakurikije ibimenyetso yababwiye.

Ubuvuzi, ubujyanama, ubufasha na transfer

Kugira ngo umuntu avurwe na Babyl asabwa kuba afite telefoni irimo Sim Card imwanditseho, iriho amafaranga ajyanye n’igiciro gisanzwe cyo kwivuza kijyanye n’ubwishingizi akoresha. Yishyura akoresheje Mobile Money na Airtel Money.

Dr. Patrick Singa, ati “Niba akoresha mituweli aba akeneye kugira nibura 200 frw, kuri Mobile Money ye kandi ni nayo asanzwe atanga iyo agiye ku kigo nderabuzima. Ku murwayi wa RSSB agomba kuba afite 600 frw kuri telefone ye. Umurwayi udakoresha ubwishingizi bwa mituweli cyangwa RSSB birumvikana ko yishyura 100% kugeza ubu yishyura 4900 frw.”

Umurwayi afata telefoni ye agakanda *811#. Iyo ari ubwa mbere bimusaba kwiyandikisha akoresheje nimero y’Indangamuntu agakurikiza amabwiriza. Mu kwiyandikisha agira aho yuzuza ubwishingizi akoresha kugira ngo mu kwivuza cya kiguzi kimenyekane.

Iyo uwivuza amaze kwishyura ahabwa ubutumwa bugufi bumubwira gahunda ye yo kuvugana na muganga. Ntibimusaba kugiramo amafaranga muri telefoni ye cyangwa ngo bimusabe internet.

Iyo gahunda yahawe mu butumwa bugufi igeze ahamagarwa n’umuforomo, ushinzwe kumva uburemere bw’uburwayi afite kugira ngo bamenye niba, ashobora kuvurwa kuri telefoni cyangwa akeneye ubuvuzi burenzeho.

Dr. Singa avuga ko iyo basanze batamuvura bamwohereza aho bashobora kumufasha. Ati “Tuvuge niba ari umubyeyi utwite uri ku bise cyangwa uri kuva ntabwo twamuvura kuri telefoni. Dushobora kumugira inama yuko yakwitwara mu gihe ari kujya aho bamuvura. Dushobora kumubwira iby’ibanze ashobora kwitwaza mu gihe ari kujyayo. Dushobora guhamagara aho twamwohereje kugira ngo bamufashe.”

Iyo umurwayi amaze kuvugana n’umuforomo akumva uburwayi bwe buri mu bwo Minisiteri y’Ubuzima yabemereye kuvura, bamuhuza na muganga mu gihe kirarenze iminota 15.

Kugeza ubu Babyl ifite abaforomo 120 n’abaganga 80 uwo mubare utanga ubushobozi bwo kuvura abagera ku 4500 ku munsi. Ubu bari kwakira abari hagati ya 3000 na 3500 ku munsi.

Iyo umurwayi amaze kuvurwa muganga ashobora kumwandikira imiti, ikizamini cyangwa akamuha transfert. Umurwayi yakira ubutumwa bugufi burimo imiti cyangwa ikizamini akeneye gukorerwa mu buryo atabasha gusoma.

Dr. Patrick Singa avuga ko atari ukubimuhisha ahubwo ari ku bw’umutekano w’amakuru y’umurwayi nkuko bisanzwe kwa muganga.

Ati “Niba uwo murwayi akoresha mituweli arayijyana ku kigo nderabuzima, hari ikoranabuhanga ryacu riri muri mudasobwa yabo bayishyira muri mudasobwa iyo miti y’umurwayi ikagaragara umurwayi agahabwa imiti. Niba hari ibizamini barabibona bakabikora […] niba ari transfert nabwo ni uko bikora iragaragara muri mudasobwa umurwayi agahabwa ubufasha.”

Iyo umurwayi amaze kuvurwa, Babyl imenya ko niba ashaka gufatira imiti kuri icyo kigo nderabuzima cyangwa ashaka kuyifatira ahandi bagakomeza kumufasha kandi aho ku Kigo Nderabuzima ntabwo bongera kumwishyuza ay’isuzumiro nk’uko bisanzwe.

Muri ibi bihe bya Covid-19, Babyl ivuga ko abanyarwanda bashobora kwivuza nayo hanyuma bakagera ku Kigo Nderabuzima bakoresha ibizamini cyangwa bafata imiti ariko batagiye gutonda umurongo.

Babyl Health yo mu Rwanda ni ishami rya ry’ikigo Babylon gikorera mu Bwongereza, Canada, u Bushinwa, no mu Majyepfo y’Uburasirazuba bwa Aziya.

Kuva mu 2016, Babyl Rwanda imaze guhanga imirimo irenga 300 muri serivisi z’ubuzima zitangwa hifashishijwe ikoranabuhanga. Iki kigo kandi kimaze guhabwa ibihembo mpuzamahanga ndetse gishimwa uburyo gikomeje gukoresha ikoranabuhanga muri serivisi zacyo, ari nako gikomeza kuzana ibishya mu iterambere ry’urwego rw’ubuzima.

Babyl yasinye amasezerano y'ubufatanye y'imyaka 10 na Guverinoma y u Rwanda kuwa 02 Werurwe 2020
Dr Patrick Singa ushinzwe ubuvuzi muri Babyl
Babyl yari isanzwe ikorana n’ibigo nderabuzima yanemerewe gukorana n’ibitaro by’uturere kuburyo bashobora kohereza umurwayi ku bitaro (transfer) bakurikije ibimenyetso yababwiye

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .