U Rwanda rusabwa iki ngo 2024 izasige buri muturarwanda agerwaho n’amashanyarazi?

Yanditswe na Evariste Nsengimana
Kuya 30 Ukwakira 2019 saa 02:55
Yasuwe :
0 0

Guverinoma y’u Rwanda yihaye intego ko muri gahunda y’ibikorwa byayo by’imyaka irindwi uhereye mu 2017, umwaka wa 2024 uzasiga Abanyarwanda 100% bagerwaho n’umuriro w’amashanyarazi mu gihe ubu agera kuri 53%. Bivuze ko mu myaka itanu isabwa kuyageza kuri 47% basigaye.

Ni umuhigo utoroshye iyo urebye abagerwagaho n’amashanyarazi icyo gihe (2017) ariko na none ushoboka ugereranyije n’imbaraga Leta ikomeje gushyira mu bikorwa byo kubaka ingomero nshya no gukwirakwiza amashanyarazi mu baturage ugereranyije n’uko byakorwaga mu myaka yashize.

U Rwanda rwavuye he mu gukwirakwiza amashanyarazi mu myaka 25 ishize?

Nyuma ya Jenoside yakorewe Abatutsi mu 1994, abaturage bagerwagaho n’amashanyarazi bari 1%. Imibare ya Sosiyete y’u Rwanda Ishinzwe Ingufu (REG) igaragaza ko hakomeje gushyirwa imbaraga mu kongera umubare w’abafite amashanyarazi, umwaka wa 2010 urangira abayafite ari 10%.

Ubwo hamurikwaga ibyakozwe muri Gahunda ya Guverinoma y’imyaka irindwi uhereye mu 2010 kugera mu 2017, REG yagaragaje ko Abanyarwanda bagerwaho n’amashanyarazi bikubye inshuro zirenga enye kuko mu Ukwakira 2017 bari bamaze kugera kuri 41%.

Muri abo 41% bagerwagaho n’amashanyarazi, 30% bari bafatiye ku muyoboro mugari naho 11% bakoresha akomoka ku mirasire y’izuba. Icyo gihe mu Mujyi wa Kigali abari bayafite bari 82%, Intara y’Iburasirazuba ari 39%, Uburengerazuba ari 38%, Amajyaruguru ari 34% naho Amajyepfo ari 30%. Icyo gihe u Rwanda rwatunganyaga Megawatt 210.9.

Mu ntangiriro z’uku Kwezi, Umuyobozi Mukuru wa REG, Eng. Ron Weiss, yabwiye IGIHE ko ingano y’amashanyarazi mu Rwanda imaze kugera kuri MW 224.6 ndetse intego ari ugukomeza kuyongera kugira ngo 2024 izasige buri muturarwanda agerwaho n’amashanyarazi.

Yagize ati “Nk’uko mubizi dufite intego yo gucanira abaturarwanda bose mu 2024. Ibyo bivuze ukwiyongera kw’abashaka amashanyarazi, ukwiyongera k’umuriro dutunganya. Turanashaka kandi kugira uruhare mu iterambere ry’ubukungu, inganda, ubuhinzi, ibikorwa by’ubucuruzi n’ikindi cyose gikorwa mu Rwanda kigira uruhare mu iterambere ry’igihugu.”

Uretse kugeza amashanyarazi ku baturarwanda ku gipimo cya 100%, Guverinoma yiyemeje ko mu 2024 ingano y’amashanyarazi atunganywa izaba ari MW 556.

Harasabwa iki?

Umuyobozi wa REG, Eng. Ron yavuze ko kwesa umuhigo u Rwanda rwihaye wo kugera mu 2024 buri muturarwanda afite amashanyarazi bitoroshye ariko bitewe n’uko ingengo y’imari izaboneka bizagerwaho.

Ati “Dutekereza ko bizagerwaho nubwo bigoye. Ntabwo ari umukoro woroshye, ntabwo ari umuhigo woroshye. Kugeza ubu turi kuri 53%. Kuwugeza kuri 47% basigaye ni umukoro ukomeye cyane ariko dutekereza ko bizagerwaho bitewe n’uko ibikoresho bizaboneka.”

Yavuze ko REG iri gukorana na Guverinoma y’u Rwanda binyuze muri Minisiteri y’Imari n’Igenamigambi n’iy’Ibikorwa Remezo mu gushaka amafaranga akenewe kugira ngo bigerweho.

Eng. Ron aheruka kubwira CNBC ko muri rusange kugira ngo u Rwanda rubashe kwesa uwo muhigo hakenewe miliyari y’amadolari (asaga miliyari 900 Frw).

Ati “Iyo Turebye ingengo y’imari urwego rw’ingufu rukeneye kugera mu 2024, dukeneye arenga miliyari y’amadolari kugira ngo dushyire mu bikorwa imishinga yose, amenshi azifashishwa mu kugeza amashanyarazi mu ngo z’abaturage.”

Imwe mu mishinga itanga icyizere

Eng. Ron Weiss avuga ko REG yateguye imishinga myinshi izafasha kugera kuri izo ntego u Rwanda rufite irimo uwa “Shema Power Lake Kivu Limited” wo gutunganya Gaz Methane yo mu Kiyaga cya Kivu, ufite ubushobozi bwo gutanga MW 56, muri zo 50 akaba arizo zizashyirwa mu muyoboro mugari w’amashanyarazi.

Hari kandi uw’amashanyarazi akomoka kuri Nyiramugengeri ‘Hakan Peat to Power’ uzatanga MW 70, uzatangira gutanga umusaruro mu mpera za 2020, uwa Nyabarongo II uzatanga MW 43.5.

Hari kandi uwa Rusumo uhuriweho n’u Rwanda, Tanzania n’u Burundi uzatanga MW 80 zirimo MW27 z’u Rwanda, Rusizi III uzatanga MW 148 uhuriweho n’ibihugu bitatu, aribyo u Rwanda, U Burundi na Repubulika Iharanira Demokarasi ya Congo.

Eng. Ron yabwiye IGIHE ko “uretse iyi mishinga minini navuze, dufite kandi indi mishinga myinshi mito nayo izatanga amashanyarazi mu gihe kizaza.”

REG igaragaza ko Abanyarwanda bagerwaho n’amashanyarazi bamaze kurenga ku kigero cya 53%.

Inyigo yakozwe yerekanye ko mu Kivu harimo km3 hagati ya 250 na 300 za Carbon na Gaz Methane igera kuri km3 hagati ya 55 na 60 bikomeza no kwiyongera. Gaz Méthane irimo ishobora gutanga umuriro ungana na Megawatt (MW) 700 mu myaka 55
Urugomero rwa Rusumo ruri mu mishinga ihanzwe amaso
Guverinoma igenda yubaka sitasiyo nto z'amashanyarazi zifasha kuyageza ku baturage
Icya kabiri cy’amashanyarazi u Rwanda rutunganya yabonetse mu myaka itandatu hagati ya 2009 na 2016. Ibi bitanga icyizere ko n'intego ya Guverinoma yo kugeza amashanyarazi kuri bose mu 2024 izagerwaho

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza