00:00:00 IGIHE NETWORK KN KINYARWANDA EN ENGLISH FR FRANCAIS

Ibyishimo bya Argentine byaguyemo umufana, abakinnyi bashyirwa muri kajugujugu

Yanditswe na Eric Tony Ukurikiyimfura
Kuya 21 Ukuboza 2022 saa 08:05
Yasuwe :

Ibyishimo by’Abanya-Argentine begukanye Igikombe cy’Isi cya 2022 byaguyemo umufana umwe, undi muhungu w’imyaka itanu ajya muri ‘coma’, byatumye Lionel Messi na bagenzi be bashyirwa muri kajugujugu kuko gukomeza n’imodoka byari bigoye.

Ku wa 20 Ukuboza mu rukerera, ni bwo Ikipe y’Igihugu ya Argentine yasesekaye i Buenos Aires ifite Igikombe cy’Isi yegukanye ku Cyumweru nyuma yo gutsinda u Bufaransa.

Lionel Messi na bagenzi be, basanze uruvunganzoka rw’Abanya-Argentine rubategereje ku mihanda y’i Buenos Aires, bajya mu modoka bagenda babasuhuza, bishimira iki gikombe begukanye nyuma y’imyaka 36.

Ibi birori byitabiriwe n’ababariwa muri miliyoni 4, byajemo akavuyo ubwo bamwe mu bafana bashakaga kujya basimbukira ku modoka itwaye abakinnyi ngo bishimane na bo.

Muri uku kwishimira Igikombe cy’Isi begukanye ni ho havuye urupfu rw’umufana w’imyaka 24 wahanutse ku gisenge, mu gihe Minisiteri y’Ubuzima na yo yatangaje ko hari undi wapfuye ku wa Mbere nyuma yo gukomereka umutwe yishimira intsinzi.

Ikinyamakuru La Nacíon cyatangaje ko polisi yo muri Buenos Aires yavuze ko umugabo wapfuye ku wa Kabiri ‘yabyiniraga ku gisenge ubwo yishimiraga intsinzi y’Ikipe y’Igihugu kugeza kiridutse akagwa’, byaje gutera urupfu.

Umuryango w’uyu witabye Imana wavuze ko uyu mugabo yitiranyije aho yari ahagaze kuko cyari igisenge cya parasitike cyari cyarashyizweho by’agateganyo.

Yaguye mu bitaro bya Fernández i Buenos Aires nyuma yo gukomereka cyane.

Muri Argentine, hari ubwoba kandi ku buzima bw’umuhungu w’imyaka itanu wagiye muri ‘coma’ nyuma yo gukomereka umutwe ubwo yari mu gace ka Plaza San Martin yishimira intsinzi hamwe n’ababyeyi be.

La Nacion yatangaje ko uyu mwana yagwiriwe n’igice cy’itafari riri mu yubatse ikibumbano cy’aho bari bari, byatumye ajyanwa mu bitaro by’indembe.

Nyuma yo kubona ko bishobora guteza impanuka nyinshi, Ikipe y’Igihugu ya Argentine yakuwe mu modoka yarimo, ishyirwa muri kajugujugu, abakinnyi bazenguruka hejuru y’abatari bake bari baje kwishimira intsinzi mu muhanda.

Indi nkuru wasoma: Messi na bagenzi be bakiriwe gitwari n’uruvunganzoka rw’Abanya-Argentine (Amafoto)

Abagera kuri miliyoni 4 bitabiriye ibirori byo kwishimira Igikombe cy'Isi Argentine yegukanye ku Cyumweru
Lionel Messi na bagenzi be babanje kugenda mu modoka bishimana n'abafana
Lionel Messi apepera abafana ubwo yari mu modoka na bagenzi be
Umufana agerageza kumanuka mu modoka y'abakinnyi ubwo yari ku kiraro
Nyuma yo kubona ko kugenda n'imodoka bishobora guteza ibyago, abakinnyi bashyizwe muri kajugujugu
Myugariro Enzo Fernandez ari muri kajugujugu ubwo bishimiraga igikombe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .