Argentine yegukanye iki gikombe nyuma yo gutsinda u Bufaransa kuri penaliti 4-2 ubwo amakipe yombi yari yanganyije ibitego 3-3 mu minota 120 yakinwe.

Lionel Messi yatsinze ibitego bibiri muri uyu mukino, Ángel Di Maria atsinda kimwe, ni mu gihe umunyezamu Emiliano Martínez yitwaye neza muri za penaliti.

Nyuma yo kwegukana Igikombe cy’Isi batwaye ku nshuro ya gatatu ku Cyumweru, Argentine yakoze urugendo rw’amasaha 21 mu ndege, yageze i Buenos Aires kuri uyu wa Kabiri mu ijoro saa Munani n’iminota 20 z’iwabo.

Kizigenza Lionel Messi ni we wasohotse bwa mbere mu ndege ateruye Igikombe cy’Isi begukanye, akurikirwa n’umutoza Lionel Scaloni wapepeye abafana bari bategereje.

Hamwe n’abandi, bose bahise bafata imodoka yabatambagije mu Mujyi aho bakiriwe n’uruvunganzoka rw’abantu bari baje kwishimira intsinzi ikipe yabo yakuye muri Qatar.

Nubwo bakoze urugendo rurerure, abakinnyi ba Argentine nta kibazo cy’umunaniro bagaragazaga, ahubwo bishimanye n’abafana biratinda, ibishashi biraturitswa mu gihe kandi n’itsinda ry’umuziki ‘La Mosca’ ryacuranze.

Indege ebyiri zazanye abakinnyi, abatoza n’imiryango yabo, zabanje guca i Roma mu Butaliyani mbere yo kwerekeza muri Buenos Aires.

Muri Argentine, kuri uyu wa 20 Ukuboza hatanzwe ikiruhuko cy’amasaha 24 kugira ngo hishimirwe iki Gikombe cy’Isi begukanye nyuma y’imyaka 36 ikipe yarimo nyakwigendera Diego Maradona itwaye icyo mu 1986.

Ubwo Messi yari afite Igikombe cy'Isi mu ndege

Myugariro Enzo Fernandez asoma Igikombe cy'Isi begukanye

Umunyezamu Emiliano Martinez akikiye igikombe mu ndege

Di Maria yatsinze igitego ku mukino wa nyuma

Lionel Messi n'umutoza Scaloni ni bo basohotse mbere mu ndege

Abakinnyi bari bategejwe, bageze ku kibuga cy'indege basuhuza abafana

Batitaye ku munaniro, abakinnyi ba Argentine bishimanye n'abafana

Imodoka yari yateguwe, yatambagije abakinnyi mu Mujyi wa Buenos Aires bishimira igikombe

Abanya-Argentine benshi ntibaryamye

Uruvunganzoka rw'abantu bari babukereye ngo bakire Ikipe y'Igihugu cyabo yegukanye Igikombe cy'Isi

Hari hakozwe igisa n'igikombe begukanye

Amafoto ya Messi ateruye Igikombe cy'Isi yagaragazwaga mu Mujyi wa Buenos Aires