Cogebanque yasabye abakiliya bayo kuyigaragariza serivisi zinoze bayifuzaho

Yanditswe na Evariste Nsengimana
Kuya 5 Ukwakira 2018 saa 04:11
Yasuwe :
0 0

Abayobozi n’abakozi ba Banki Nyarwanda y’Ubucuruzi, Cogebanque, bifatanyije n’abakiliya bayo mu gusoza icyumweru mpuzamahanga cyabahariwe, babasaba kuyigaragariza icyabafasha kwishimira serivisi zayo, ngo ikibakorere.

Iki gikorwa cyabereye ku ishami ryayo riri mu nyubako ya CHIC i Kigali, Kuri uyu wa 5 Ukwakira 2018, cyitabirwa na Miss Liliane Iradukunda, usanzwe uyamamariza ibikorwa.

Umuyobozi ushinzwe ibikorwa muri Cogebanque, Mujyambere Louis de Montfort, yavuze ko ari umwanya wo gushimira abakiliya no kubumva.

Ati “Ni umunsi wo gushimira abakiliya ariko ni umwanya wo kubumva kugira ngo batubwire icyo gukora cyiza cyatuma turushaho kubaha serivisi nziza. Ni n’uburyo bwo kubamenyesha byinshi tugenda tubakorera.”

Muri serivisi nshya za Cogebanque harimo uburyo bw’ikoranabuhanga mu itangwa rya serivisi z’imari bwitwa ‘SIRIMUKA’ bufasha abakiliya kubona serivisi bitabasabye kugera ku mashami ya banki.

Miss Liliane Iradukunda, yashimiye abafunguje konti muri Cogebanque, ashishikariza n’abandi kuzifunguzamo kuko ari banki y’icyerekezo kandi igira serivisi zinoze.

Itangayemye Vincent, umaze imyaka 10 akorana na Cogebanque, yabwiye IGIHE ko serivisi zayo ari nta makemwa ariko asaba kongera ikoranabuhanga.

Ati “Bagira serivisi yihuse kandi inoze. Iyo uhagaze ibisubizo wifuza urabibona […] Turi gukorana n’igihe kiducika kuko turi mu ikoranabuhanga rishya hari imikorere ikwiye guhinduka.”

Yavuzemo nk’uburyo bwo kubona ubutumwa kuri telefoni bw’ibyabereye kuri konti, ngo nubwo butangwa ariko butinda kumugeraho.

Buri cyumweru cya Mbere cya Ukwakira hagati ya tariki 1- 5, Isi yizihiza icyumweru cyahariwe umukiliya, cyashyizweho n’ishyirahamwe mpuzamahanga ryabo mu 1984.

Cyatangiye kubahirizwa mu 1892 muri Leta Zunze Ubumwe za Amerika.

Kuva mu 1999, Cogebanque yemewe mu Rwanda nka Banki y’Ubucuruzi na Banki Nkuru y’u Rwanda (BNR). Mu myaka itanu ishize umutungo wayo n’inyungu byagiye byiyongera nibura 20% buri mwaka.

Cogebanque yifatanyije n'abakiliya kwizihiza icyumweru cyabahariwe
Umuyobozi ushinzwe ibikorwa muri Cogebanque, Mujyambere Louis de Montfort (iburyo) hamwe n'abandi bakase umutsima bawusangira n'abakiliya
Miss Iradukunda Liliane yasabye abatarafunguza konti muri iyi banki kuzifunguza
Umuyobozi ushinzwe ibikorwa muri Cogebanque, Mujyambere Louis de Montfort (ibumoso) na Miss Iradukunda Liliane (iburyo) basangiye n'abakiliya mu rwego rwo kubashimira ku munsi wabahariwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza