Abakunzi b’umuziki batangiye kugera ahabereye igitaramo mu masaha ya nyuma ya saa cyenda z’amanywa, buhoro buhoro aho hantu huzura abantu bari bategereje kubona uyu muhanzi uzwi nka Simba.

Igitaramo cyatangijwe n’abashyushyarugamba Rocky Try na Michael Sengazi, bakurikirwa na DJ Khizzbeats watangiye gususurutsa imbaga mu ndirimbo zitandukanye.

Ish Kevin wabimburiye abandi ku rubyiniro yaririmbye zimwe mu ndirimbo zamwubatseho izina zirimo ‘Amakosi’ na ‘VIP’, ndetse anasangira urubyiniro na Og2Tone na Ririmba mu ndirimbo ‘Brocode’.

Uyu muraperi yatunguranye ageze hagati ahamagara Timi na Kid From Kigali baririmbana indirimbo ’Soldier’ baherutse gukorana.

Nel Ngabo ni we wakurikiyeho, asusurutsa abitabiriye ibirori mu ndirimbo zirimo ‘Zoli’, ‘A La Vie’, ‘Bella’ na ‘Nywe’.

Nyuma haje DJ Marnaud, watunguranye azamura Bushali ku rubyiniro bakorana indirimbo bise ‘Bahabe’.

DJ Marnaud yavuye ku rubyiniro ahamagaye Bruce Melodie nawe wageze ku rubyiniro aherekejwe n’itsinda ry’abacuranzi n’ababyinnyi bagera kuri 25 bamufashije gususurutsa abakunzi be.

Bruce Melodie yaririmbye indirimbo ze nyinshi zirimo ‘Bado’, ‘Ikinya’, ‘Katapilla’, ‘Ikinyafu’, ‘Turaberanye’, ‘Complete Me’ n’izindi nyinshi.

Mbere yo guhamagara Diamond, habanje guhamagarwa Etania wo muri Uganda asusurutsa abari bitabiriye iki gitaramo ari benshi.

Diamond Platnumz winjiriye ku rubyiniro mu ndirimbo ‘Pom Pom’ yakoranye na Bruce Melodie na Joel Brown, akomereza kuri ‘Komasava’ n’izindi nyinshi zirimo ‘Marry You’ yakoranye na Ne-Yo na ‘Why’ yakoranye na The Ben.

Ubwo yari ageze kuri ‘Why’ yaririmbanye na The Ben yavuze ko bakabaye bayiririmbanye ariko uyu muhanzi yamubwiye ko agiye mu gitaramo muri Uganda.

Uyu muhanzi yamaze umwanya munini aririmbana n’abakunzi be banyuzagamo bakanabyinana nawe ari nako abasaba gucana amatara ya telefone zabo bakagendana kugeza ubwo igitaramo cyarangiraga.

Inkuru bifitanye isano:Diamond yahaye ibyishimo Abanya-Kigali mu gitaramo cyamwitiriwe (Amafoto)

Rock Try na Michael Sengazi nibo bayoboye iki gitaramo

DJ Khizzbeat niwe watangiye ashyushya abantu ku rubyiniro

Ish Kevin niwe wabanje ku rubyiniro muri iki gitaramo

Kid From Kigali yagiye gufasha Ish Kevin ku rubyiniro

Timi wo muri Nigeria umaze iminsi i Kigali yafashije Ish Kevin baririmbana indirimbo 'Soldier' bahuriyemo na Kid From Kigali

DJ Marnaud yongeye gushimangira ubuhanga bwe mu kuvanga imiziki, ashyushya n'abafana ari nako anyuzamo akabyinana nabo

Bushali yatunguranye ajya gufasha DJ Marnaud mu ndirimbo 'Bahabe'

Nel Ngabo ari mu bahanzi bagaragaje ko bafite indirimbo zizwi n'abafana b'umuziki

Bruce Melodie yataramiye abakunzi be mu gitaramo ‘Diamond Platnumz Experience’

Bruce Melodie yari yatumiwe mu gitaramo cya ‘Diamond Platnumz Experience’

Diamond yongeye gutaramira i Kigali asiga ashimishije abakunzi be

Diamond yatanze ibyishimo i Kigali