00:00:00 IGIHE NETWORK KN KINYARWANDA EN ENGLISH FR FRANCAIS

Akon yikomye abakomeje gufata Kanye West nk’ufite ibibazo byo mu mutwe

Yanditswe na Mahoro Vainqueur
Kuya 4 Ukuboza 2022 saa 04:02
Yasuwe :

Umuhanzi akaba na rwiyemezamirimo Aliaune Damala Badara Akon Thiam wamamaye nka Akon, yasabye abantu kujya bareka abandi bagatanga ibitekerezo uko babyumva, aho kwihutira kubacyaha batabanje kumva neza ibyo bavuga.

Aha yagaragaje ko ashyigikiye uburyo umuraperi Kanye West w’imyaka 45 agaragazamo ibitekerezo bye, n’ubwo aherutse kwamaganwa na benshi ubwo yavugaga ko akunda umudage Adolphe Hitler n’Aba-Nazi.

Mu kiganiro Akon yagiranye na Sky News, yavuze ko ashyigikiye uburenganzira bwo kuvuga bwa Kanye West (Ye), akavuga icyo atekereza mu gihe ashakiye, hatitawe ku wo bishibora guhungabanya.

Yagize ati “Mu byukuri sinemeranya n’ibyo Kanye West yavuze kuri Hitler, icyo mvuga ni uko buri wese afite uburenganzira ku bitekerezo bye, ntabwo twese tugomba kugira ibitekerezo bimwe ku bintu runaka.”

Akon avuga ko “Kudasangira ibitekerezo bituma tutamenyana neza.” Ati “Ndatekereza ko rimwe na rimwe tugomba gufungura ibitekerezo byacu tukumva neza uko ibintu bimeze n’aho bigana.”

Yakomeje agira ati “Njyewe nshyigikiye uburenganzira bwo kwizera ibyo ushaka kwizera, iyo nza kuba ndi uvugana na Kanye nari kumubwira icyo ntemeranya na we n’impamvu ntabyemera, aho guhita mucyaha.”

Uyu muhanzi akaba n’umuyobozi wa Konvict Kulture, avuga ko we yari kubanza kumenya igituma Kanye West yizera ibyo avuga, bakaganira aho guhita amucyaha kuko gusangira ibitekerezo arirwo rufunguzo.

Akon w’imyaka 49 avuga ko ibitekerezo bya Kanye West ntacyo bimuhungabanyaho ku giti cye.

Avuga ko biba byiza iyo abantu basangiye ibitekerezo kuko bituma barushaho kumenyana byimbitse, bakareka gucirana imanza ahubwo bakarebera hamwe uko bafata umwanzuro ku bintu bimwe na bimwe.

Kanye West aherutse guhomba bikomeye ubwo yatakazaga amasezerano y’ubucuruzi yari afitanye n’ibigo bikomeye bitewe n’imvugo ze zafashwe nk’izihembera urwango muri rubanda no gupfobya Jenoside yakorewe Abayahudi.

Akon yikomye abakomeje gufata Kanye West nk’ufite ibibazo byo mu mutwe

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .