00:00:00 IGIHE NETWORK KN KINYARWANDA EN ENGLISH FR FRANCAIS

Abahanzi Nyarwanda bishimiwe muri ‘ChopLife Kigali’; Tekno, Nasty C na Kaligraph bitwara neza (Amafoto)

Yanditswe na Mukahirwa Diane, Nsengiyumva Emmy, Uwiduhaye Theos
Kuya 25 June 2022 saa 07:47
Yasuwe :

Mu myaka yashize wasangaga umubare munini w’Abanyakigali bavuga ko batumva indirimbo z’Abanyarwanda ariko abahanzi ntibahwemye gushyiramo imbaraga mu byo bakora kugeza ubwo bigaruriye imitima yabo.

Kuba abahanzi Nyarwanda bamaze kwigarurira imitima ya benshi byongeye kugaragarira mu Gitaramo "Choplife Kigali" cyabereye muri BK Arena, ku mugoroba wo ku wa Gatandatu, tariki ya 25 Kamena 2022.

Iki gitaramo cyari cyatumiwemo abahanzi bafite amazina akomeye muri Afurika n’abo mu Rwanda. Buri wese mu bakiririmbyemo yagerageje kwigaragaza uko ashoboye gusa Abanyarwanda bakoze iyo bwabaga ndetse n’abitabiriye igitaramo babereka urukundo rudasanzwe byatumye na Bruce Melody abibashimira.

Uwabanjirije abahanzi ku rubyiniro ni Chris Eazy. Uyu yishimiwe cyane ubwo yaririmbaga indirimbo ye "Inana" iri mu zikunzwe cyane mu Rwanda.

Abandi bahanzi bagaragarijwe urukundo kandi na bo bashimisha abafana ni Bruce Melodie, Bushali wongeye kwerekana ko inkuta za Arena zimuzi na Kenny Sol wishimiwe bidasanzwe n’abitabiriye iki gitaramo.

Kuba indirimbo z’Abanyarwanda zikunzwe kandi byagaragariye no mu miziki aba Djs bakinnye yari yiganjemo iyo mu Rwanda ndetse n’abafana bakayishimira cyane kugeza n’aho DJ Neptune, Umunya-Nigeria wayoboye igitaramo yafashe umwanya wo gucuranga izi ndirimbo zirimo “Amashu” ya Chris Eazy, “Ndarura” ya Juno Kizigenza na “Mali” ya Confy.

Usibye abahanzi bo mu Rwanda, abanyamahanga batumiwe muri iki gitaramo na bo baserukanye umucyo.

Abarimo abaraperi Nasty C wo muri Afurika y’Epfo na Kaligraph Jones wo muri Kenya ndetse na Tekno bataramye, abitabiriye igitaramo baranyurwa.

UKO IGITARAMO CYAGENZE UMUNOTA KU WUNDI:

23:56: Umurishyo wa nyuma wakomwe. DJ Neptune yashimiye abitabiriye Igitaramo "ChopLife Kigali". Yashimiye kandi Visit Rwanda ndetse na Mr Eazi wagize uruhare kugira ngo iki gitaramo gitegurwe. Abari bitabiriye baherekejwe n’indirimbo ya Rema yitwa “Calm Down” n’izindi zitandukanye zacurangwaga ari ko abantu bataha.

Tekno yaryohereje abakunzi ba muzika i Kigali

Mu ndirimbo uyu muhanzi yaririmbye harimo “Enjoy” ndetse na “Buga cyangwa se Lo Lo Lo” yakoranye na Kizz Daniel. Buga by’akarusho abantu bagaragaje ko ari indirimbo igezweho. Iyi ndirimbo iri mu njyana y’Amapiano ni imwe mu zigezweho muri Afurika yose.

Igikundiro cya “Buga” kigaragazwa n’uburyo amashusho yayo aheruka kujya hanze yarebwe na miliyoni eshatu z’abantu kuri Youtube mu gihe cy’amasaha 48 gusa. Iyi ndirimbo yaciye agahigo ko kuba indirimbo yashakishijwe cyane kuri Shazam mu 2022 ku Isi yose.

Kizz Daniel aheruka kugaragaza ko yifuza kuzaririmba ‘Buga’, mu Gikombe cy’isi kizabera muri Qatar mu mpera z’uyu mwaka. Kimwe n’abandi bahanzi bose banyuze ku rubyiniro Tekno nawe yaririmbye mu buryo bwa Playback.

Tekno yakoresheje imbaraga nyinshi ku rubyiniro, ashaka gushimisha abakunzi be
Tekno yavuze ko yanyuzwe n'urugwiro yeretswe n'abakunzi be i Kigali
Tekno yageze ku rubyiniro yambaye ikiremba gitukura mu mutwe
Tekno yaririmbye indirimbo zitandukanye zigezweho mu rubyiruko rw'i Kigali
Uyu muhanzi ukomoka muri Nigeria yari yishimiye gutaramira i Kigali
Tekno yeretswe urukundo mu gitaramo yaririmbyemo i Kigali
Tekno yaririmbye indirimbo zitandukanye zirimo “Enjoy” na “Buga cyangwa se Lo Lo Lo” yakoranye na Kizz Daniel yasorejeho

23:40: Umuhanzi Tekno Miles yinjiye ku rubyiniro. Agihamagarwa abantu induru bayihaye umunwa bamwakira bamwereka ko bamwishimiye.

Tekno yinjiriye mu ndirimbo yise “Pana” yakunzwe cyane mu bihe byashize. Yaserutse yambaye amadarubindi n’agatambaro mu mutwe k’umutuku n’ipantalo n’umupira by’umukara.

Uyu muhanzi yanyuzagamo akavuga imyato u Rwanda. Ati “Ni ukubera Kigali isa neza. Mufite igihugu cyiza cyane.”

Uyu muhanzi yaririmbye izindi ndirimbo ze zirimo “Go”, “Diana”, “Skeletum” na “Rara”.

Yaririmbye Sherrie Silver ari kunyuzamo akamubyinira. Higa Sharon usanzwe ari umubyinnyi na we ari mu bageze ku rubyiniro uyu muhanzi ari gutaramira abari bitabiriye iki gitaramo.

Ibyo wamenya kuri Tekno Miles

Umunya-Nigeria Augustine Miles Kelechi wamamaye nka Tekno niwe muhanzi w’imena muri iki gitaramo. Uyu musore w’imyaka 29 yavukiye muri Leta ya Bauchi muri Nigeria tariki 17 Ukuboza 1992.

Ni umuririmbyi, umwanditsi w’indirimbo akaba na Producer wazo.

Avuka mu muryango w’abana batandatu barimo umukobwa n’abahungu batanu. Yakuriye mu bice bitandukanye muri Nigeria birimo Nassarawa, Kaduna na Abuja kubera ko se yari umusirikare.

Tekno Miles yatangiye kumenyekana cyane mu 2015 ubwo yashyiraga hanze indirimbo yise “Duro”. Iyi ndirimbo yakurikiwe n’izindi z’uyu musore zakunzwe zirimo “Wash”, “Green Light” yakoranye na Cuppy, “Diana” n’izindi.

Ubu uyu musore agezweho mu ndirimbo yitwa “Buga” yahuriyemo na mugenzi we Kizz Daniel wo muri Nigeria.

Ubwo aheruka mu Rwanda yasize umugani!

Tekno ni nshuro ya kabiri agiye kuririmbira mu Rwanda. Yaherukaga gutaramira i Kigali ku wa 10 Nzeri 2017, mu gitaramo cyabereye muri Camp Kigali ahari hakubise huzuye abafana b’umuziki w’uyu muhanzi nubwo cyarimo n’abandi barimo Lilian Mbabazi na Bruce Melodie.

Ni igitaramo cyacuranzemo aba DJs batandukanye barimo Dream Team DJs barimo na Nyakwigendera DJ Miller, DJ Infinity n’abandi banyuranye.

N’ubwo bari bakubise buzuye muri Camp Kigali, byageze mbere gato ya saa moya z’ijoro z’ijoro bamwe batangiye kwiheba batekereza ko Tekno Miles atacyiitabiriye cyane ko uyu muhanzi yari ataragera mu gihugu.

Icyizere gike cyaterwaga no guhinduranya gahunda z’ingendo z’uyu muhanzi kwa hato na hato. Uyu muhanzi wari utegerejwe i Kigali saa kumi n’byiri z’igitondo cyo ku wa 10 Nzeri 2017, yatumye abamutumiye n’itangazamakuru bazinduka iya rubika babyukira ku Kibuga cy’Indege cya Kigali i Kanombe ariko baramutegereza baramuheba.

Uyu wari waraye akoreye igitaramo i Nairobi muri Kenya yaje kumenyesha abamutumiye ko indege yamusize kubera gutwarwa n’agatotsi, bituma bashyashyana bashakisha indi ndege ishobora kumugeza i Kigali hakiri kare.

Nyuma yo kuzenguruka babaririza itike ya vuba cyane babonye iyagombaga kumugeza i Kigali saa cyenda z’amanywa, ariko nabwo isaha zageze amakuru yo kuza kwe aratangazwa.

Icyo gihe amakuru nabwo yavuze ko indege yongeye gusiga uyu muhanzi icyakora aza guhita ahindurirwa itike ishyirwa saa moya n’igice z’ijoro.

Saa mbiri zirengaho iminota mike nibwo Tekno Miles yari asohotse mu kibuga cy’indege cya Kigali i Kanombe, iki gihe abahanzi bagombaga kumubimburira ku rubyiniro bari bageze kure igitaramo.

Ibi byatumye avanwa ku kibuga cy’indege yerekezwa kuri Park Inn Hotel aho yakoreye ikiganiro n’abanyamakuru, icyakora bitewe n’uko umwanya wari muto yagikoze ashushubikanywa ngo agere Camp Kigali ataramire ibihumbi byari byuzuye aho yagombaga gutaramira.

Tekno akigera muri Camp Kigali ahari hari kubera igitaramo ntabwo yagize umwanya wo kuruhuka kuko yasanze abari kumubanziriza ku rubyiniro barangije akazi kabo ndetse abafana bakomejwe kurangazwa n’aba DJs mu gihe yari atarahagera.

Ibi byatumye agera ahabereye igitaramo ahita yurizwa urubyiniro, icyakora nubwo yari yabanje kujujubya abamutumiye n’itangazamakuru ryari rimutegereje, abafana bo yatashye abamaze ipfa kuko bataramanye bigatinda.

Iki gihe amakuru yakurikiye igitaramo yavugaga ko amafaranga abamutumiye batakaje mu guhinduza amatike bayamukase mu yo bamusigayemo binateza umwuka mubi kuko abashinzwe kureberera inyungu ze bagerageje kumwishyuriza ariko bibutswa ko byahuriyemo bitewe n’amakosa yabakoreye.

LadiPoe yatunguranye mu gitaramo

Umuhanzi w’Umunya-Nigeria Ladipo Eso wamenyekanye nka LadiPoe yatunguranye mu gitaramo i Kigali. Uyu muhanzi yaririmbye indirimbo ze zirimo “Overdose” yahuriyemo n’abandi bahanzi babana muri Mavin Records ya Don Jazzy barimo Mavins, Crayon, Ayra Starr, Magixx na Boy Spyce “Know You” yakoranye na Simi “Feeling” yakoranye na Buju n’izindi.

Ari kuririmba yagezemo hagati abwira abari bitabiriye iki gitaramo ko aheruka gushyira hanze indirimbo agiye kubasaba kuyiririmbana, ati “Nashyize hanze indirimbo mu cyumweru gishize ndashaka ko tuyiririmbana.” Yahise aririmba iyo yise “Big Energy” aheruka gushyira hanze abafana baririmbana nawe nkaho imaze igihe kinini igiye hanze.

LadiPoe ni umwe mu bahanzi bahagaze neza muri iki gihe. Yatangiye kumenyekana cyane kuva mu 2017 ubwo yakoraga indirimbo yise Adore Her Official Video yakoranye na Funbi. Uyu muhanzi izina rye ryazamutse ubwo yasinyaga amasezerani muri Mavin Records icyo gihe ni nabwo yakoze indirimbo yise “Know You” yamenyekanye yahuriyemo na Simi.

LadiPoe yize muri University of North Carolina aho yize Ubumenyamuntu n’Ibinyabutabire.

Umuhanzi w’Umunya-Nigeria Ladipo Eso wamenyekanye nka LadiPoe yatunguranye mu gitaramo i Kigali
LadiPoe yageze aho akuramo ikote yari yambaye, asigarana isengeri
LadiPoe yashimishije Abanyakigali mu gihe yamaze ku rubyiniro

  DJ Neptune yacuranze indirimbo Nyarwanda

23:15: DJ Neptune yafashe umwanya wo gucuranga indirimbo zimwe z’abahanzi Nyarwanda; mu zo yacuranze harimo “Amashu” ya Chris Eazy, “Ndarura” ya Juno Kizigenza na “Mali” ya Confy.

Yahise yanzika n’izindi ndirimbo z’abahanzi bo hanze y’u Rwanda zirimo “Cold Outside” ya Timaya na Buju, “Dior” ya Ruger, “Alcohol” ya Joeboy, “Big Energy” ya LadiPoe n’izindi.

DJ Neptune wo muri Nigeria ni we wayoboye iki gitaramo. Yanyuzagamo agacuranga n'indirimbo z'Abanyarwanda
Mu ndirimbo DJ Neptune yacuranze harimo “Amashu” ya Chris Eazy

22:55: Bruce Melodie yageze ku rubyiniro. Uyu musore yasanze mugenzi Khaligraph ku rubyiniro baririmbana indirimbo bise “Sawa Sawa”.

Yahise yanzika n’indirimbo ze zirimo “Kungola” yakoranye na Sunny, “Saa Moya”, “Katapila”, “Bado”, “Henzapu” n’izindi. Uyu muhanzi kuva ku ndirimbo ye ya mbere kugeza ku ya nyuma zose yaririmbanaga n’abakunzi b’umuziki.

Uyu muhanzi ari ku rubyiniro byamurenze ashimira abanyarwanda urukundo beretse abahanzi nyarwanda, ati “Ndashaka kubashimira urukundo mweretse abahanzi b’abanyarwanda uyu munsi.”

Itahiwacu Bruce [Bruce Melodie] ni umuririmbyi w’umunyempano, afite ubuhanga bwihariye mu guhanga no kwerekana ko ibyo akora biri mu maraso binyuze mu kuririmba.

Nta gushidikanya ko muri iyi minsi ari mu bahanzi ba mbere bakunzwe cyane mu ndirimbo z’urukundo mu Rwanda.

Bruce Melodie yatangiye kuririmba mu 2012, icyo gihe yafashwaga na Producer Fazzo; yibandaga cyane ku ndirimbo zo mu njyana ituje nyuma agenda avangamo na Afrobeat. Mu Ugushyingo umwaka ushize uyu muhanzi yizihije imyaka 10 amaze atangiye umuziki.

Mu 2017 yabaye umuhanzi wo mu Rwanda wa mbere watumiwe muri Coke Studio Africa. Mu 2018 ni we wegukanye igihembo cya Primus Guma Guma Super Star cyanahise gihagarara.

Bruce Melodie ni mwene Ntibihangana Gervais na Verène Muteteri. Yavutse mu 1992. Ni ubuheta mu muryango w’abana bane barimo abahungu babiri n’abakobwa babiri. Avuka mu Kagari ka Kamashahi, Umurenge wa Nyarugunga, Akarere ka Kicukiro.

Iyo muganira umubaza ibyerekeye amashuri akubwira ko ‘yize bimugoye atari uko ari umuswa’ ahubwo ari ibibazo by’umuryango n’ubushobozi buke bwamwitambitse, gusa yarahanyanyaje nyuma yo gucikiriza amashuri akora ikizamini cy’abakandida bigenga [candidat libre] aza kubona impamyabumenyi.

Amashuri abanza yayize ku bigo bibiri harimo Ecole Primaire Busanza na Groupe Scolaire Camp Kanombe. Amashuri yisumbuye yayatangiriye i Kanombe kuri EFOTEC ayarangiriza kuri Lycée Islamique de Rwamagana.

Bruce Melodie yamamaye mu ndirimbo zirimo “Tubivemo”, ‘‘Ndumiwe’’, ‘‘Ntundize’’, ‘‘Umuhungu wa muzika’’ yahuriyemo na Fireman, “Kungola” yakoranye na Sunny, “Blocka”, “Ndumiwe”, “Bado” n’izindi.

Ni umuhanga mu kuririmba akaba umwe mu bahanzi bamaze kuba ikirangirire mu Rwanda no hanze yarwo ndetse ni n’umwe mu birahirwa na benshi bakurikirana umuziki cyane cyane uwo mu Rwanda.

Bruce Melodie ni umwe mu bahanzi bakoze cyane ndetse bibageza ku kubaka izina rikomeye mu muziki w'u Rwanda
Abakunzi b'umuziki mu Mujyi wa Kigali bitabiriye iki gitaramo ari benshi
Bruce Melodie ni umwe mu bahanzi bamaze kwandika izina mu muziki w'u Rwanda
Bruce Melodie yaririmbye indirimbo ze zakunzwe cyane, zirishimirwa

  Yasoje abafasha kuririmba indirimbo ihimbaza Imana

Mbere yo kuva ku rubyiniro, Khaligraph Jones yabwiye abari muri BK Arena gufatanya kuririmba indirimbo.

Amagambo yayo yagiraga ati “Moyo wangu sifu Mungu daima”, bishatse gusobanura ngo “Mutima wanjye uhore ushima Imana.’’

Yavuze ko uyu munsi ari wo yaboneyeho izuba, asaba abari muri BK Arena kumwifuriza umunsi mwiza.

22:45: Umuraperi Khaligraph Jones wo muri Kenya yinjiye ku rubyiniro yinjiye yungikanya amagambo abari muri BK Arena bose bamwakirana urusaku rwinshi.

Yahise yanzika n’indirimbo ye yamenyekanye cyane yise “Yego”, “Champagne”, “Sifu bwana” yakoranye na Nyashinski, “Sawa Sawa” yakoranye na Bruce Melodie wanahise amusanga ku rubyiniro n’izindi.

Ku rubyiniro yanyuzagamo akaganiriza abari bitabiriye, hari nk’aho yagize ati “Ni ku nshuro ya mbere nje mu Rwanda ariko ndabakunda.”

Uyu mugabo w’imyaka 32 amazina yiswe n’ababyeyi ni Brian Ouko Omollo, yavutse ku wa 12 Kamena 1990. Uyu murapri w’Umunya-Kenya azwi nka Khaligraph Jones cyangwa se Papa Jones. Yamenyekanye mu ndirimbo zirimo "Mazishi" na "Yego".

Umubyeyi we yamwise Ouko Robert mu rwego rwo guha icyubahiro Umunyapolitiki Dr. Ouko Robert wishwe ku wa 13 Gshyantare 1990.

Yatangiye umuziki mu 2008 aza kumenyekana cyane mu 2018 ubwo yashyiraga hanze album yise “Testimony 1990”. Mu 2020 yari umwe mu bahatanye muri BET Awards mu cyiciro cya “Best International Flow” yari ahanganye na Nasty C wo muri Afurika y’Epfo, DJonga wo muri Bresil , Kaaris wo muri Côte d’Ivoire na Stormzy wo mu Bwongereza wegukanye igihembo.

Mu 2021 yatowe na MTN Uganda nk’umuraperi w’uwo mwaka muri Afurika y’Iburasirazuba.

Khaligraph Jones yashimishijwe no kuririmbira mu Rwanda ku nshuro ya mbere
Uburyo asukiranya amagambo arapa, byishimiwe na benshi mu bitabiriye igitaramo

Bushali yongeye kwerekwa urukundo

Umuraperi Bushali yinjiriye ku ndirimbo yise “Nakumena Amaso”. Yahise yanzika n’indirimbo yahuriyemo n’abandi bahanzi bakomeye bise “Kamwe”, akurikizaho “Agasima”, “Kurura” iyi yahamagaye Juno Kizigenza baheruka kuyikorana bafatanya kuyiririmba, “Umwana w’umwirabura” yasoje aririmba agace gato iyo yise “Ni Tuebue”.

Uyu musore yagaragarijwe urukundo n’imbaga y’abantu yari yakubise yuzuye muri BK Arena.

Umuraperi Hagenimana Jean Paul uzwi nka Bushali yatangiye umuziki mu mpera za 2013.

Uyu musore ni umuhanga mu gushushanya ndetse mu mabyiruka ye yatangazaga benshi, uretse ibyo yanabaye umuririmbyi mu korali muri ADEPR ariko aza kubivamo akomereza umuziki muri Hip hop aho azwi cyane nk’umwe mu batangije icyiswe ‘Kinyatrap’ ishushanywa nka Trap nyarwanda.

Izina rya Bushali The Trigger ryazamuwe cyane n’indirimbo yise ‘Nituebue’ yahuriyemo na B-Threy ndetse n’uwitwa Slum Drip.

Umuraperi Bushali ari mu bakunzwe bihambaye mu kiragano cy'abahanzi bashya
Bushali yongeye gushimangira ko ari inkingi ikomeye muri Hip hop Nyarwanda. Aha yari kumwe na Juno Kizigenza

Imyambaro ya Bushali yatangariwe

Bushali yageze ku rubyiniro yambaye nk’abami ba kera. Yaserutse mu mwambaro utukura ndetse yambaye ikamba ryerekana ko ingoma ya Hip hop akiyiyoboye.

22:43: Bushali yinjiriye ku ndirimbo yise “Nakumena Amaso”. Yahise yanzika n’indirimbo yahuriyemo n’abandi bahanzi bakomeye bise “Kamwe”, akurikizaho “Agasima”, “Kurura” iyi yahamagaye Juno Kizigenza baheruka kuyikorana bafatanya kuyiririmba, “Umwana w’umwirabura” yasoje aririmba agace gato iyo yise “Ni Tuebue”.

Uyu musore yagaragarijwe urukundo n’imbaga y’abantu yari yakubise yuzuye muri BK Arena.

Umuraperi Hagenimana Jean Paul uzwi nka Bushali yatangiye umuziki mu mpera za 2013.

Uyu musore ni umuhanga mu gushushanya ndetse mu mabyiruka ye yatangazaga benshi, uretse ibyo yanabaye umuririmbyi mu korali muri ADEPR ariko aza kubivamo akomereza umuziki muri Hip hop aho azwi cyane nk’umwe mu batangije icyiswe ‘Kinyatrap’ ishushanywa nka Trap nyarwanda.

Izina rya Bushali The Trigger ryazamuwe cyane n’indirimbo yise ‘Nituebue’ yahuriyemo na B-Threy ndetse n’uwitwa Slum Drip.

Imyambaro ya Bushali yatangariwe

Bushali yageze ku rubyiniro yambaye nk’abami ba kera. Yaserutse mu mwambaro utukura ndetse yambaye ikamba ryerekana ko ingoma ya Hip hop akiyiyoboye.

22:32: Umuraperi Bushali aracyakomeje kwandika amateka muri Kigali Arena. Kuva yatangira kuririmbiramo, urukundo agaragarizwa n’abakunzi b’umuziki ntirugereranywa.

22:27: Nasty C yavuye ku rubyiniro. Kuva ku ndirimbo ya mbere yaririmbye kugeza ku ya nyuma zose yaririmbanaga n’abakunzi b’umuziki we.

Akigera ku rubyiniro uyu musore yakiriwe n’induru y’abakunzi b’umuziki we. Mu ndirimbo yaririmbye zikishimirwa harimo “Said” yakoranye na Runtown, “Particula” yahuriyemo n’abarimo Major Lazer, DJ Maphorisa, Ice Prince, Patoranking na Jidenna. Indirimbo enye yaririmbye zose yishimiwe ku rwego rwo hejuru.

Umwanya wa Hip hop

22:16: Umuraperi Nasty C yageze ku rubyiniro, yerekwa urukundo. Ni umwe mu bazi gukoresha neza urubyiniro no gufasha abamukirikiye gususuruka.

Ubusanzwe yitwa Nsikayesizwe David Junior Ngcobo. Ni umwe mu baraperi bakomeye bakomoka muri Afurika y’Epfo. Uyu musore w’imyaka 25 yavutse tariki 11 Gashyantare 1997.

Yamenyekanye cyane mu 2016 ubwo yakoraga album yise “Bad hair” aza kwigarurira imitima ya benshi ubwo yashyiraga hanze indi yise “Strings and Bling”.

Mu 2020 yasinye amasezerano na Def Jam Records ishamikiye kuri The Universal Music Group yo muri Leta Zunze Ubumwe za Amerika.

Nasty C w'imyaka 25 yagaragaje ubuhanga mu gusukiranya amagambo
Nsikayesizwe David Junior Ngcobo [Nasty C] ni umwe mu baraperi bakomeye bakomoka muri Afurika y’Epfo
Nasty C yaririmbye indirimbo nka “Said” yakoranye na Runtown na “Particula” yahuriyemo n’abarimo Major Lazer, DJ Maphorisa, Ice Prince, Patoranking na Jidenna

  Kenny Sol yahagurukije n’abaminisitiri!

Indirimbo ‘Haso’ ya Kenny Sol yishimiwe cyane kugeza n’aho Minisitiri wa Siporo, Munyangaju Aurore Mimosa, uri mu banyacyubahiro bitabiriye iki gitaramo yahagurutse na we afatanya n’ibihumbi by’abari muri BK Arena kuririmba.

Mbere yo kuva ku rubyiniro yaririmbye indirimbo ye yitwa “Joli”, ndetse kimwe na bagenzi be asaba abafana gucana amatoroshi ngo bafate ifoto y’urwibutso.

Minisitiri wa Siporo, Munyangaju Aurore Mimosa, yanyuzwe n'umuziki w'abahanzi b'Abanyarwanda
Dj Toxxyk yafatanyaga na DJ Neptune mu kuvanga imiziki
Abakunzi b'umuziki baba babukereye

22:07: Kenny Sol yakiriwe ku rubyiniro. Yatangiye aririmba indirimbo ye “Haso”. Uyu muhanzi mu bamaze kunyura ku rubyiniro ni we weretswe urukundo kurusha abandi. Yahagurukije n’iyonka mu bitabiriye iki gitaramo.

Uyu musore yahoze mu itsinda rya Yemba Voice ryasenyutse. Kenny sol , ni umusore wimyaka 25 avuka mu muryango w’abana batatu akaba uwa kabiri.

Afite umubyeyi umwe ariwe se. Yize amashuri abanza ahitwa Kagasunzu, ayisumbuye muri Ecose Musambira. Yakuze akunda gukina umupira w’amaguru kuko yanakinnye muri academy ya Esperance nyuma akajya muri Kiyovu ariko aza guhagarika umupira yiyegurira umuziki.

Yize umuziki mu ishuri ry’umuziki ku Nyundo. Indirimbo ze zakunzwe harimo ‘Haso’, ‘Umurego’, ‘Say my name’, ‘Joli’ igezweho mu rubyiruko ‘Forget’ n’izindi.

Kenny Sol ni umwe mu bahanzi b'abahanga, yize umuziki ku Ishuri ryawo ryahoze ku Nyundo, ubu riri i Muhanga
Kenny Sol yashimishije benshi

21:54: Ariel Wayz yageze ku rubyiniro, yinjiriye ku ndirimbo ye “Good Luck”.
Mbere yo gutangira kuririmba yasabye abateraniye muri BK Arena kuzamura urumuri rw’amatoroshi ya telefoni zabo.

Uyu mukobwa yaririmbye indirimbo zirimo “La Vida Loca” na “Chamber’’. Yasoje kuririmba ashimira abakunzi be babanye na we mu gihe yamaze ku rubyiniro.

Uwayezu Ariel[Ariel Wayz] yavukiye mu Karere ka Nyarugenge mu Mujyi wa Kigali mu 2000. Ni uwa Gatandatu mu bana barindwi bavukana nawe.

Yasoje amasomo y’umuziki ku Nyundo mu 2018. Mu buhanzi bwe afatira urugero harimo Bruno Mars ndetse n’umwongerezakazi Ella Mai Howell.

Uyu mukobwa yize umuziki ku Nyundo yatangiye kumenyekana ubwo yabarizwaga mu itsinda rya Symphony Band. Iri tsinda yabarizwagamo yarivuyemo muri Kanama 2020.

Icyo gihe, uyu mukobwa yabwiye IGIHE ko ari igitekerezo yagize mu gihe gito gishize, agahitamo gutangira kwikorera umuziki nk’umuhanzi ku giti cye.

Ati “Ni igitekerezo nagize mu minsi ishize. Mbona nkomeje kwikorera umuziki nk’umuhanzi ku giti cyanjye aribyo byaba byiza kurushaho.”

Yavuye muri Symphony Band nyuma yo gukorana nayo indirimbo ebyiri, zirimo ‘Igitabo’ ndetse na ‘Hey’. Uyu mukobwa yanitabiriye irushanwa rya The Voice Afrique Francophone, muri Afurika y’Epfo.

Nyuma yo kwiyomora kuri bagenzi be yakoze ibihangano bitandukanye birimo “Away” yakoranye na Juno, “Chamber”, “Depanage” yakoranye na Riderman n’izindi.

Ariel Wayz yageze ahirengeye akoresha imbaraga nyinshi

21:47: Nyuma ya buri muhanzi, DJ Neptune ari gufata akanya gato akabanza agashyushya abari muri BK Arena binyuze mu kuvanga imiziki itandukanye. Yibanze cyane no ku ndirimbo ziri mu Njyana y’Amapiano iri mu zigezweho muri Afurika.

DJ Neptune ni umwe mu bagaragarijwe urukundo

  DJ Neptune yambaye umupira wanditseho u Rwanda

21:39: DJ Neptune ni we uri kuvanga imiziki y’abahanzi bari kugera ku rubyiniro. Nyuma ya FAVE, yasubiye ku rubyiniro akuramo agapira yari yampaye yambara umupira wa Visit Rwanda. Inyuma yawo mu mugongo yandikishijeho izina rye ndetse uriho na nimero zirindwi.

21:33: FAVE ukomoka muri Nigeria yageze ku rubyiniro. Mu maso ya bamwe yabonekaga nk’aho ari mushya ariko hari abandi bagendanaga na we mu kuririmba indirimbo ze zitandukanye zirimo “Mr Man”, “Beautiful’’ na "My baby."

FAVE yatangiye umuziki by’umwuga ubwo yari afite imyaka 19

Ubusanzwe uyu muhanzikazi wo muri Nigeria yitwa Chidozie Godsfavour Ugochinyere, yavutse ku wa 13 werurwe 2000. Yamenyekanye ku mazina ya Fave Szn cyangwa se Fave.

Ni umwe mu bahanzi bo mu gisekuru gishya muri Nigeria kuko abarizwa mu cyiciro kimwe n’icy’abarimo Tems na we uri mu bakobwa bamaze kubaka izina bakomoka muri Nigeria.

Yamenyekanye mu ndirimbo zirimo N.B.U [Nobody But U], M.O.M.M.S [Me or Mask My Sins], Mr Man, Beautiful Baby na Riddim Dal. Uyu mukobwa yivuga ko yatangiye kwiyumvamo umuziki ubwo yari afite imyaka itandatu. Afatira urugero ku bahanzi barimo Adele, Sia, Aisha Badru n’abandi.

Uyu mukobwa yatangiye umuziki by’umwuga ubwo yari afite imyaka 19. Yamenyekanye biturutse ku ndirimbo ye yise “Baby Riddim” yagiye hanze mu 2021 yakunzwe biturutse ku rubuga rwa Tik Tok.

Yakoranye n’abahanzi barimo Olamide bakoranye indirimbo ebyiri zirimo Want na Ponpon ziri kuri album yise “UY Scuti”. Yanakoranye n’abahaniz bakizamuka muri Nigeria barimo BOJ, Olutimi na Skeellz.

21:26: Afrique yageze ku rubyiniro. Yatangiriye ku ndirimbo ye yise “Rompe’’. Nyuma y’iminota itandatu ku rubyiniro ahita aririmba "Agatunda", indirimbo ye yishimiwe cyane.

Afrique ni umusore w’imyaka 20, amazina ye ni Kayigire Josué akaba yaravukiye i Gikondo mu Mujyi wa Kigali.

Mu kiganiro yagiranye na IGIHE mu minsi ishize, uyu musore yavuze ko yatangiye gukora umuziki mu buryo bw’umwuga mu bihe Isi yari yugarijwe n’icyorezo cya Covid-19 mu 2020.

Ati "Natangiye umuziki mu buryo bw’umwuga mu 2020 mu bihe bya COVID-19. Natangiye umuziki kuko nibwo nari ndi gusoza amashuri yisumbuye, ntangira kugenda nkora indirimbo abantu bazumva bakambwira ko mfite impano nintacika intege bizagera aho bigakunda."

Uyu musore wize Ubwubatsi, avuga ko umuziki n’ubwubatsi nta hantu bihuriye, ariko agashimangira ko amashuri yize yamufunguye mu mutwe kandi ibi bikaba ari ingenzi mu rugendo rw’umuziki.

Afrique mu gihe amaze akora umuziki, avuga ko amaze kubona ko hari byinshi ashoboye ku buryo yihaye intego yo kongera imbaraga, akazaba amaze kubaka izina muri Afurika mu myaka itanu iri imbere.

Afrique afite indirimbo zirimo ‘Agatunda’ yatumye amenyekana cyane, ’Spy’, ’Don’t’, ‘Rompe’, ’Robine’ n’izindi.

Umunyempano Afirque na we yanyuze benshi

  DJ Neptune yabyinishije inkumi y’i Kigali

DJ Neptune yahamagaye umukobwa n’umuhungu ku rubyiniro, ashyiramo indirimbo bafatanya kuyibyina mu buryo bwashimishije benshi.

Na we yanyuzagamo akabyinana na bo.

  DJ Neptune yaririmbanye n’Abanyakigali

21:20: DJ Neptune afatanyije n’abakunzi b’umuziki we bafatanyije kuririmba indirimbo zitandukanye zirimo “Nobody” yakoranye na Joeboy na Mr Eazi.

Yanacuranze indirimbo zitandukanye nka "Confession" ya AV yishimiwe cyane.

  Yageze ku rubyiniro ikirere kirahinduka

Dj Neptune akigera ku rubyiniro na mbere yo gutangira gucuranga yishimiwe cyane. Yahise yanzika n’indirimbo zitandukanye ziganjemo izo muri Nigeria n’izindi njyana Nyafurika zicuranze mu Njyana y’Amapiano.

Indirimbo yacuranze zirimo "Yaba Buluku (Remix)" ya Dj Tarico na Burna Boy na “Monalisa”.

  Dj Neptune yashimye urugwiro yeretswe n’Abanyarwanda

21:10: Imohiosen Patrick uzwi nka DJ Neptune ni Umunya-Nigeria ufite izina mu kuvanga imiziki no gutunganya indirimbo [producer].

Uyu mugabo w’imyaka 31 yishimiye uko yakiriwe mu Rwanda. Ati “Ni ubwa mbere ngeze mu gihugu cyanyu ariko nishimiye imbaraga mufite.’’

Ubusanzwe yitwa Imohiosen Patrick ariko amaze kwamamara nka DJ Neptune. Azwi nk’umwe mu bavanga imiziki bakomeye muri Nigeria akaba na producer w’indirimbo. Avuka mu muryango w’abana bane akaba ari bucura avukana n’abandi bakobwa batatu.

Yamenyekanye mu ndirimbo zitandukanye zirimo "1,2,3" yakoranye na M.I, Naeto C na Da Grin, "Skoobi Doo" yahuriyemo na General Pype, Lynxxx na Jesse Jagz , "So Nice" yakoranye na Davido na Del B.

Hari kandi "Baddest" yakoranye na Olamide, BOJ na Stonebwoy, "Marry" yakoranye na Mr Eazi, "Wait" yahuriyemo na Kizz Daniel n’izindi.

Uyu musore yagiye atwara ibihembo bitandukanye yaba iwabo cyangwa hanze yaho ku rwego mpuzamahanga.

  Playback yubahwe

Muri BK Arena ahari kubera iki gitaramo nta byuma bicometse byo gucuranga mu buryo bwa ‘live’. Abahanzi bose bamaze kunyura ku rubyiniro baririmbye mu buryo bwa Playback.

Aba bahanzi bari kuririmba bacurangiwe na Dj Toxxyk uri kubavangira imiziki.

Dj Toxxyk ari mu bafite izina ntayegayezwa mu kuvanga imiziki mu Rwanda

20:53: Okkama yavuye ku rubyiniro nyuma yo kuririmba indirimbo zirimo "Puculi" yatangiriyeho. Yayikurikije izindi zirimo “No’’, asoreza ku yakunzwe mu ze yitwa “Iyallah”.

Igihe kinini yakimaze asaba abafana be gucana amatoroshi ya telefoni zabo kugira ngo afate agafoto k’urwibutso. Yavuye ku rubyiniro asa n’utari kwerekwa urukundo cyane.

Osama Massoud Khaled mu muziki akoresha izina rya Okkama. Uyu musore w’imyaka 21 yize amasomo y’umuziki, mu Ishuri rya Muzika rya Nyundo. Ni imfura mu muryango w’abana batanu. Se ni umwarabu ukomoka muri Oman nubwo hari imirimo akorera mu Rwanda, naho nyina ni Umunyarwandakazi.

Amaze kumenyekana mu ndirimbo zirimo ‘Iyallah’ yazamuye izina rye, "Puculi", "Weekend" yahuriyemo na Mistaek na Yuhi Mic "No" aheruka gushyira hanze n’izindi.

20:42: Okkama yageze ku rubyiniro. Yakiriwe neza n’abakunzi b’umuziki bateraniye muri BK Arena.

Osama Massoud Khaled akoresha izina rya Okkama mu muziki
Abafana bamaze kuba benshi muri BK Arena
Ari mu bahanzi bahagaze neza mu muziki w'Abanyarwanda

20:28: Dj Neptune uri mu bagezweho muri Nigeria yageze ku rubyiniro. Ni we uri buyobore iki gitaramo cyabereye muri BK Arena.

Yabanje gusaba abakunzi b’umuziki kumwereka ko bari kumwe binyuze mu gucana amatoroshi ya telefoni zabo.

Dj Neptune yahise aha umwanya Dj Toxxyk abanza kuvanga imiziki imwe n’imwe irimo nka "Man Down" ya Rihanna n’izindi.

20:20: Dj Toxxyk yongeye guhabwa umwanya atangira kuvanga imiziki. Yifashishije indirimbo zitandukanye ziganjemo izicuranze mu Njyana ya Drill nka "Dior" ya Pope Smoke na "No Cap" ya Ish Kevin.

  Inana yakuye abantu mu byicaro byabo

20:16: Chris Eazy yageze ku ndirimbo ye “Inana” irishimirwa cyane. Iyi ndirimbo iri mu ze zigezweho cyane ndetse uwavuga ko iri mu ziyoboye umuziki mu Rwanda nta nka yaba aciye amabere.

Yayigezeho abari muri BK Arena biterera hejuru, bafatanya kuyiririmba.

Iyi ndirimbo yashyize kuri YouTube ye ku wa 26 Gicurasi 2022, kuri ubu imaze kurebwa n’abarenga miliyoni n’igice.

Yaririmbye izi ndirimbo ahita aririmbana n’abafana agace gato k’indirimbo ye "Fasta’’ mbere yo gusezera ku bakunzi be.

Uyu musore yaserutse afite imbaraga nubwo ari we wabanje ku rubyiniro
Chriss Eazy yanyuze abitabiriye iki gitaramo

20:13: Chris Eazy ni we muhanzi wabimburiye abandi ku rubyiniro. Uyu musore uri mu bagezweho mu muziki wa none. Yinjiye aririmba indirimbo ye “Amashu.’’

Umuhanzi Nsengimana Rukundo Christian uzwi nka Chriss Eazy amaze igihe gito atangiye kuba icyamamare. Kuva mu 2020 yatangiye gukorana na Junior Giti akimara gusoza amashuri yisumbuye.

Amaze gukora indirimbo zakunzwe zirimo iyitwa "Fasta", "Amashu", "Inana" igezweho cyane mu rubyiruko muri iki gihe n’izindi. Anyuzamo agakorera ibihangano bye muri studio ya Junior Giti yitwa Giti Music ikorwamo na AoBeats wahoze akorana na Chriss Eazy mu Itsinda rya Octagons.

Uyu musore uretse kuba ari umuririmbyi aheruka kwinjira mu byo guhanga imyambaro ahereye kuri ‘collection’ yise ‘Ewuana Collection’. Chriss Eazy anatunganya amashusho y’indirimbo ndetse inyinshi mu ze ni we uba wazikoreye.

  Dj Toxxyk na we yageze ku rubyiniro

20:05: Dj Toxxyk uri mu bagezweho mu Rwanda na we yageze ku rubyiniro atangira kuvanga imiziki itandukanye.

Uyu musore w’imyaka 28 ubusanzwe yitwa Arnold Ishimwe. Ni umwe mu bakora umwuga wo kuvanga umuziki bagezweho mu Mujyi wa Kigali, abasohokera mu bitaramo bikomeye byitabirwa n’abahanzi baba baturutse hanze y’iguhugu baramuzi cyane.

Nyina ni Umunyarwandakazi, Se akaba Umushinwa. Mbere yo kwinjira mu byo kuvanga umuziki yabanje kuba umubyinnyi mu bwana ariko ntibyamuhira nyuma aza kwinjira mu byo kuvanga umuziki kuko yawukundaga cyane.

Nta shuri ryihariye yabyizemo usibye gukurikira uko abandi bakomeye ku Isi babikora byatumye asobanukirwa neza uwo mwuga kuri ubu akaba ari umwe mu bakomeye.

Yatangiye kumenyekana cyane ubwo yacurangaga mu kabyiniro ka Ogopogo Nightclub ku Kimihurura kakanyujijeho. Kuri ubu azwi mu bitaramo ngarukacyumweru bya Sunday Churche bibera ahitwa Pégase Resort Inn in Kigali.

  Dj Ira yatangiye gushyushya BK Arena

Dj Ira yatangiye kuvanga umuziki ndetse bamwe mu bageze muri BK Arena bahagurutse batangira kunyeganyega buhoro, ari na ko ab’inkwakuzi batangira kuwunyuka kakahava.

Uyu mukobwa ari gucuranga indirimbo zitandukanye zirimo izigezweho muri Nigeria nka "Soundgasm’’ ya Rema, "Baby’’ ya Joeboy, "Confession" ya AV, "Buga (Lo Lo Lo)" ya Kizz Daniel na Tekno, "Ameno Amapiano Remix (You Wanna Bamba)’’ ya Goya Menor na Nektunez, "Yaba Buluku (Remix)" ya Dj Tarico na Burna Boy, "Kamwe" ya Julien Bmjizzo & Babalao n’abahanzi b’Abanyarwanda, "Amakosi" ya Ish Kevin, "Nywe" ya Nel Ngabo, "Cinema" ya Bulldogg n’izindi.

Dj Ira yatangiye gususurutsa abitabiriye iki gitaramo hakiri kare

Menya Dj Ira

Ubusanzwe yitwa Iradukunda Divine mu mwuga wo kuvanga imiziki azwi cyane nka ‘DJ Ira’. Afitanye isano na DJ Bisosso umaze kubaka ibigwi muri uyu mwuga.

Ira yageze i Kigali aturutse mu Burundi, yarugezemo muri Kanama 2015 ubwo yari arangije amashuri yisumbuye ndetse ni bwo yatangiye kubyiga abifashijwemo na DJ Bisosso.

Yatangiye kwifuza gukora nk’ibya DJ Bisosso akiri muto gusa abo mu muryango baramwangira bamusaba ko yazabyinjiramo arangije kwiga. Ni umwe mu bacuranga mu birori bitandukanye bikomeye bibera mu Mujyi wa Kigali.

Yacuranze mu bitaramo bitandukanye bya Silent Disco muri White Club, yacuranze mu bitaramo byinshi bya Miss Rwanda, Primus Guma Guma, Iwacu Muzika Festival n’ahandi. Uyu mukobwa ni nawe wagiye avanga umuziki ashimisha abitabiriye ibirori bitandukanye byo gutora Nyampinga w’u Rwanda.

Aba mbere bageze imbere muri BK Arena

Abafana binjiraga ari bake mu masaha ya mbere

18:46: Darius Kapello ni bwo yageze ku rubyiniro atangira gusuhuza abakunzi ba muzika bateraniye muri BK Arena. Yabajije abitabiriye iki gitaramo niba biteguye kwakira abahanzi batandukanye bagiye kubataramira.

Bawubyinnye karahava
Yari yambariye ibirori byo gutarama

18:03: Iradukunda Grace Divine uzwi ku izina rya Dj Ira mu ruhando rw’abavanga imiziki yatangiye gususurutsa abageze muri BK Arena. Uyu mukobwa yacuranze indirimbo zitandukanye ziganjemo iz’abahanzi b’abanyamahanga ariko akananyuzamo agashyiramo iz’Abanyarwanda zishyushye muri iki gihe.

Mu mafoto: Ahagana saa Kumi n’Imwe, ubwo aba mbere bari batangiye kwinjira

Mbere yo kwinjira muri BK Arena, buri wese abanza kwerekana itike ye hanyuma agahita akomereza ahasuzumirwa niba yarafashe inkingo zose za COVID-19 nk’uko biteganywa n’amabwiriza ya Minisiteri y’Ubuzima. Nyuma y’aho ni bwo agera aho asakirwa, akabona kwinjira mu cyumba cyabereyemo igitaramo.

BK Arena imaze kwandika izina mu kwakira ibikorwa bitandukanye birimo ibitaramo bikomeye
Abafana batangiye kugera ahabereye igitaramo ahagana saa Kumi n'Imwe, ni na yo saha yari yagenwe igitaramo kigomba gutangiriraho
Uwageraga kuri BK Arena mbere yo kwinjira yerekana ko yaguze itike hanyuma akerekwa umuryango agomba kunyuramo
Buri wese hagenzurwaga ko yafashe inkingo za COVID-19 mu buryo bwuzuye
Abanyabirori bo babyambariye! Ibyo simbigarukaho...
Inkumi zishinguye ntizicikwa n'ibitaramo nk'ibi bihuza abahanzi b'ibyamamare

  Abanyakigali bagowe no kugera kuri BK Arena

Bitewe no kuba imwe mu mihanda yo mu Mujyi wa Kigali yafunzwe kubera Inama ya CHOGM, abantu benshi bitabiriye igitaramo batinze kugera aho igitaramo cyabereye.

Nibura ahagana saa Kumi n’Imwe ubwo abanyamakuru ba IGIHE bageraga kuri BK Arena ni bwo abantu benshi batangiye kuhagera ku bwinshi.

Kugera kuri iyi nyubako yakira ibikorwa by’imikino n’imyidagaduro byasabaga kunyura inzira za kure kugira ngo uyigereho. Kugira ngo ubyumve neza, niba wavaga mu Mujyi rwagati washoboraga kunyura inzira ya Kinamba-Kacyiru-Faisal-Nyarutarama-RDB-Remera ugahinguka mu Migina mbere yo gushyika.

  Abo kuri Twitter batangiye guteguza igitaramo cy’uburyohe hakiri kare

Mu masaha ya mbere y’uko igitaramo gitangira, Ikigo cy’Igihugu gishinzwe guteza imbere Ubukerarugendo bushingiye ku Nama, RCB, cyasabye Abanyarwanda kwihutira kugura amatike kugira ngo bataza gucikanwa n’iki gitaramo.

Akamanzi uyobora RDB na we ariteguye gutarama

Umuyobozi w’Urwego rw’Igihugu rw’Iterambere, RDB, Clare Akamanzi na we yavuze ko yiteguye ndetse ari bwitabire iki gitaramo gikomeye i Kigali.

Abahanzi b’ibyamamare mu muziki wa Afurika ndetse n’abagezweho mu Rwanda bahuriye mu gitaramo cy’imbaturamugabo cyateguwe mu gusoza Inama y’Abakuru b’Ibihugu na za Guverinoma bihuriye mu Muryango w’Ibikoresha Ururimi rw’Icyongereza, CHOGM.

Iyi nama yabereye mu Mujyi wa Kigali ku wa 20-26 Kamena 2022. Yitabiriwe n’abanyacyubahiro baturutse mu bihugu byose 54 by’ibinyamuryango bya Commonwealth.

Mu gihe yaganaga ku musozo, mu Mujyi wa Kigali hateguwe igitaramo gikomeye cyiswe “ChopLife Kigali’’ cyahurijwemo abahanzi b’amazina akomeye mu muziki w’u Rwanda, Akarere ka Afurika y’Iburasirazuba na Afurika muri rusange.

Iki gitaramo cyateguwe muri gahunda ya Visit Rwanda, kiri mu rwego rwo gususurutsa abitabiriye Inama ya CHOGM iri kubera i Kigali. Cyateguwe na Sosiyete y’Ubucuruzi ya Empawa Africa ya Mr Eazi na Visit Rwanda.

‘ChopLife Kigali’ irayoborwa na DJ Neptune. Abahanzi bayitumiwemo barimo Tekno Miles, Fave, Nasty C, Khaligraph Jones n’abandi barimo abakunzwe mu Rwanda bayobowe na Bruce Melodie, Bushali, Kenny Sol, Ariel Wayz, Afrique na Okkama. Usibye abahanzi kandi hari n’aba-Djs bakunzwe mu Rwanda DJ Ira na DJ Toxxyk.

U Rwanda rumaze kubigira umuco ko mu gihe rwakiriye inama n’ibindi bikorwa bikomeye, ababyitabiriye basezerwaho binyuze mu gitaramo gituma barushaho no kwizihirwa n’ibihe byiza barugiriyemo.

Amafoto: Nezerwa Salomon na Shumbusho Djasiri


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .