00:00:00 IGIHE NETWORK KN KINYARWANDA EN ENGLISH FR FRANCAIS

Abanyafurika batanu barimo Mukansanga bazasifura umukino wa ¼ mu Mikino Olempike

Yanditswe na Ntabareshya Jean de Dieu
Kuya 29 Nyakanga 2021 saa 09:36
Yasuwe :

Abagore batanu b’Abanyafurika bari gusifura mu Mikino Olempike iri kubera i Tokyo mu Buyapani ni bo bitabajwe ku mukino wa ¼ uzahuza Ubwami bw’u Bwongereza na Australie.

Aba basifuzi barimo n’Umunyarwandakazi Mukasanga Salma Rhadia, Mary Njoroge wo muri Kenya, Bernadettar Kwimbira wo muri Malawi, Patience Madu wo muri Nigeria na Maria Cynquela wo mu Birwa bya Maurice, ni bo bahawe gusifura umukino uzaba ku wa 30 Nyakanga 2021 aho u Bwongereza na Australie bizaba byisobanura.

Ni umukino uzaba utoroshye kuko uzasobanura ugomba kugera muri ½ cy’Imikino Olempike iri kubera mu Buyapani. Uzayoborwa na Mukansanga Salma uza ari mu kibuga hagati.

Uyu Munyarwandakazi akomeje kwandika amateka mu mwuga w’ubusifuzi ku ruhando Mpuzamahanga ndetse akomeje kugirirwa icyizere mu marushanwa akomeye.

Mu mukino w’Ubwami bw’u Bwongereza na Australie, Mukansanga azaba yungirijwe n’abasifuzi bo ku ruhande barimo Mary Njoroge na Bernadettar Kwimbira mu gihe abandi babiri bazaba babunganira mu gihe umwe muri abo yagira ikibazo gitunguranye yasimbuzwa.

Ni andi mateka akomeye aba basifuzi banditse ku rwego Mpuzamahanga kuko ari bwo bwa mbere umugore w’Umunyafurika asifuye umukino wa ¼ muri Olempike.

Uyu mukino uzabera kuri Ibaraki Kashima Stadium [ubusanzwe yakira abafana 40.728 mu bihe bisanzwe] ni wo uzasobanura ugomba gukomeza. Amaso ahanzwe kuri aba basifuzi b’Abanyafurika bagiye gusifurira u Bwongereza ku nshuro ya kabiri dore ko n’umukino ufungura irushanwa wabuhuje na Chile ari bo bawusifuye.

Mukansanga Salma ni umwe mu basifuzi Mpuzamahanga u Rwanda rufite ukomeje kwandika amateka kuko amaze gusifura mu marushanwa Mpuzamahanga atandukanye, arimo Igikombe cy’Isi cy’Abagore cyabereye mu Bufaransa mu 2019 n’icya Afurika cy’Abatarengeje imyaka 23 cyabereye mu Misiri muri uwo mwaka.

Inkuru bijyanye: Mukansanga yabaye Umunyarwandakazi wa mbere usifuye Imikino Olempike (Amafoto)

Abanyafurika batanu barimo Mukansanga (hagati) bagiye kwandika amateka yo gusifura umukino wa ¼ mu Mikino Olempike iri kubera i Tokyo mu Buyapani
Mukansanga ni umwe mu basifuzi b'abagore banditse amateka akomeye mu mikino olempike
Ubwo Mukasanga Salma Rhadia yasifuraga umukino wahuje u Bwongereza na Chile mu Mikino Olempike

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .