Mu minsi 10 iyi Mikino imaze iba, hari byinshi byayiranze birimo n’ubuhanga budasanzwe bwa bamwe mu bakinnyi bashyizeho ibihe bitigeze bibaho muri siporo bakina.

Iyi Mikino ya Paris izasozwa ku wa 11, izatangwamo imidali 329.

Ese ni utuhe duhigo tumaze gukorwa kugeza ubu?

1. Katie Ledecky mu gukura umusomyo muri metero 1500

Nubwo ari gukina Imikino Olempike ku nshuro ya kane, Katie Ledecky wa Leta Zunze Ubumwe za Amerika ni umwe mu bakinnyi bikigoye gutsinda.

Muri iyi Mikino ya Paris, yegukanye umudali wa Zahabu mu koga metero 1500 mu bizwi nko gukura umusomyo, akoresheje iminota 15, amasegonda 30 n’ibice bibiri.

Ibi bivuze ko yagize ibihe byiza ugereranyije n’ibyo yari yakoze mu Mikino Olempike ya 2020.

Katie yabaye umugore wa mbere wegukanye imidali myinshi ya zahabu (icyenda) aho yatambutse kuri Larisa Latynina wakiniraga Leta y’Aba-Soviete kugeza mu 1966, wegukanye imidali umunani.

2. Pan Zhanle mu gukura umusomyo muri metero 100

Umushinwa Pan Zhanle yaciye agahigo ko koga metero 100 mu bizwi nko gukura umusomyo mu masegonda 46,92 mu isibo. Yahise akuraho agahigo kakozwe n’Umunyamerika Caeleb Dressel mu Mikino ya Toyko 2020 k’amasegonda 47,02.

Mu irushanwa rya nyuma ryatangiweho umudali, Zhanle yongeye gukora amateka kuko yashyizeho umuhigo wo ku rwego rw’Isi akoresheje amasegonda 46,40.

3. Léon Marchand mu marushanwa ane yo koga

Umufaransa Léon Marchand yakuyeho agahigo kari karakozwe na Michael Phelps mu 2008, akoresha iminota ine, amasegonda abiri n’ibice 95 mu koga metero 400 Rukomatanyo.

Marchand yaciye kandi agahigo ko koga metero 200 Bunyugunyugu akoresheje umunota, amasegonda 51 n’amasegonda 25, ibihe byiza ugereranyije n’ibyari byakozwe mu Mikino ya 2020.

Amasaha abiri nyuma yo koga bunyugunyugu, Marchand yahise aca agahigo mu koga metero 200 Makeri akoresheje iminota ibiri, amasegonda atanu n’ibice 85.

Ku mudali we wa kane wa Zahabu i Paris, Marchand yaciye akandi gahigo ubwo yogaga metero 200 Rukomatanyo akoresheje umunota, amasegonda 54 n’ibice bitandatu, akuraho agahigo k’umunota, amasegonda 54 n’ibice 23 kashyizweho na Phelps mu Mikino ya Beijing mu 2008.

Kugeza ubu, Umufaransa Léon Marchand ni we umaze kwegukana imidali myinshi ya Zahabu (ine) mu Mikino ya Paris

4. Gabriel Medina muri ‘Surfing’ y’abagabo

Umunya-Brésil Gabriel Medina yerekanye uburyo ari umwe mu bakinnyi b’abahanga mu kugendera hejuru y’amazi akoresheje ‘surfboard’ aho yagize amanota 9,90 mu isibo, amanota menshi yatanzwe mu Mikino Olempike.

Ifoto ya Gabriel Medina yasize benshi bibaza niba ibyo babona byarabayeho

5. Lim Si-hyen mu marushanwa atatu yo kumasha

Mu kumasha hifashishijwe umuheto wa kizungu, Umunya-Koreya y’Epfo Lim Si-hyeaon yaciye agahigo ko ku rwego rw’isi mu bagore aho yagize amanota 694, ahigika mwenewabo Kang Chae-young wabikoze mu 2019.

Lim yakoze kandi uduhigo tubiri mu Mikino Olempike, kamwe agakorana na Kim Woo-jin mu irushanwa rikinwa n’abakinnyi babiri, umugabo n’umugore, akandi na Jeon Hun-young na Nam Su-hyeon mu ikipe y’abagore.

Lim Si-hyeon, Nam Su-hyeon na Jeon Hun-young mu ikipe y'abagore yo kumasha

6. Sarah Sjöström mu gukura umusomyo muri metero 500

Umunya-Suède Sarah Sjöström yegukanye umudali wa Zahabu mu koga metero 50 mu bizwi nko gukura umusomyo, akuraho agahigo yari yarashyizeho mu Mikino ya Tokyo. Kuri iyi nshuro yakoresheje amasegonda 23,66.

7. Gretchen Walsh muri metero 100 Bunyugunyugu

Umunyamerika Gretchen Walsh yoze metero 100 mu bizwi nka bunyugunyugu akoresheje amasegonda 55 n’ibice 37, agabanya amasegonda 11 ku bihe byakozwe n’Umnya-Suède Sarah Sjöström mu Mikino ya Rio 2016.

8. Summer McIntoch mu koga metero 200 Bunyugunyugu

Mu nzira imuganisha ku mikino itatu ya Zahabu i Paris, Umunya-Canada McIntosh yaciye agahigo ko koga metero 200 bunyugunyugu akoresheje iminota ibiri, amasegonda atatu n’ibice bitatu, atambuka ku bihe byakozwe na Zhang Yufei wo mu Bushinwa mu Mikino ya Tokyo kuko we yakoresheje iminota ibiri, amasegonda atatu n’ibice 86.

9. Kaylee McKeown mu marushanwa abiri yo koga

Umunya-Australia Kaylee MacKeown yakoze agahigo mu Mikino Olempike mu koga metero 100 Ngarama akoresheje amasegonda 57,33 aho yatambutse ku bihe yari yakoze mu Mikino ya Tokyo.

Mu koga metero 200 Ngarama, McKeown yakuyeho agahigo kari kamaze imyaka 12 karashyizweho na Missy Franklin mu Mikino ya Londres aho yakoresheje iminota ibiri, amasegonda atatu n’ibice 73.

10. Daniel Wiffen muri metero 100 Bunyugunyugu

Umunya-Irlande Daniel Wiffen yoze metero 800 bunyugunyugu mu minota irindwi, amasegonda 38 n’ibice 19, ahigika Umunya-Ukraine Mykhailo Romanchuk wari wakoresheje iminota irindwi, amasegonda 41 n’ibice 28 mu 2020.

11. Bobby Finke muri metero 1500 bunyugunyugu

Umunyamerika Bobby Finke yashyizeho umuhigo wo ku rwego rw’Isi mu bagabo boga metero 1500 bunyugunyugu akoresheje iminota 14, amasegonda 30 n’ibice 67, atambuka ku bihe by’iminota 14, amasegonda 31 n’ibice bibiri byakoreshejwe n’Umushinwa Sun Yang mu Mikino ya 2012.

12. Ikipe ya Australia mu marushanwa abiri yo koga

Mollie O’Callaghan, Shayna Jack, Emma McKeon na Meg Harris bigaragaje mu koga metero 4x100 bunyugunyugu nk’ikipe, bakoresha iminota itatu, amasegonda 28 n’ibice 92 ndetse bakuraho agahigo kari karashyizweho mu Mikino Olempike ya 2020 k’iminota itatu, amasegonda 29 n’ibice 69.

Nyuma yaho, O’Callaghan yagarukanye na Lani Pallister, Brianna Throssell na Ariarne Titmus muri metero 4x200, ikipe yabo ikoresha iminota irindwi, amasegonda 38 n’ibice umunani ndetse ikuraho agahigo k’Ikipe y’u Bushinwa mu Mikino ya 2020.

13. Ikipe ya Leta Zunze Ubumwe za Amerika mu marushanwa abiri yo koga

Regan Smith, Lilly King, Gretchen Walsh na Torri Huske begukanye undi mudali wa Zahabu ku ruhande rwa Leta Zunze Ubumwe za Amerika baciye agahigo ko ku rwego rw’Isi aho bakoresheje iminota itatu, amasegonda 49 n’ibice 63 mu koga metero 4x100 Rukomatanyo.

Umunsi mbere yaho, Walsh na Huske baciye akandi gahigo ko ku rwego rw’Isi bari kumwe na Ryan Murphy na Nic Fink mu ikipe ivanzemo abagabo yoze metero 4x100 mu minota itatu, amasegonda 37 n’ibice 43.

14. Julien Alfred muri metero 100

Julien Alfred yahigitse Sha’Carri Richardson muri metero 100, ahesha igihugu cya Sainte-Lucie umudali wa mbere wa Zahabu mu mateka yacyo.

15. Joshua Cheptegei muri metero 10000

Umunya-Uganda usiganwa intera ndende, Joshua Cheptegei yegukanye umudali we wa kabiri wa Zahabu, uwa mbere mu gusiganwa metero ibihumbi 10 ku maguru, akoresheje ibihe byiza byabayeho bwa mbere mu Mikino Olempike aho yabikoze mu minota 26, amasegonda 43 n’ibice 14.

16. Armand Duplantis mu gusimbuka intera ijya hejuru

Umunya-Suède Armand Duplantis yaciye agahigo yari yarashyizeho aho yegukanye umudali wa kabiri wa zahabu mu gusimbuka intera ijya hejuru ku burebure bwa metero 6,25.

17. Thea LaFond mu ‘Triple Saut’

Thea LaFond yahesheje igihugu cya Dominique umudali wa mbere wa Zahabu muri ‘Triple Saut’ ku ntera ya metero 15,02.

18. Ikipe ya Nouvelle-Zélande muri Rugby

Ikipe y’Abagore ya Nouvelle-Zélande muri Rugby, yatsinze amanota 55 mu mukino wa ¼ yahuyemo n’iy’u Bushinwa. Ni yo manota menshi yabonetse mu mukino Olempike kuva Australia itsinze 53 mu 2016.

19. Maddison Levi muri Rugby y’Abakina ari barindwi

Umunya-Australia Maddison Levi ukina Rugby, yatsinze ‘tries’ [penaliti] 11 mu mu mukino wa ½ w’Imikino Olempike, akuraho agahigo ka penaliti 10 zatsinzwe n’umukinnyi umwe mu mateka y’iyi Mikino.

20. Simone Biles muri ‘Gymnastique y’Abagore

Mu midali itatu ya Zahabu n’umwe wa Feza amaze kwegukana i Paris, Umunyamerika Simone Biles yabaye umukinnyi wa mbere wa ‘Gymnastique’ w’icyo gihugu wegukanye imidali myinshi mu mateka y’Imikino Olempike, ahigitse Shannon Miller.

21. Sheng Lihao mu kurashisha ‘pistol’ metero 10

Umunya-Koreya y’Epfo Oh Ye-jin yegukanye umudali wa Zahabu ashyizeho agahigo k’amanota 243,2 mu kurashisha imbunda ntO ya ‘pistol’ muri metero 10. Yahigitse Umurusiya Vitalina Batsarashkina wagize amanota 240,3 mu Mikino ya Tokyo 2020.

22. Ikipe ya Leta Zunze Ubumwe za Amerika

Ku wa 30 Nyakanga, Leta Zunze Ubumwe za Amerika yabaye igihugu cya mbere mu mateka y’Imikino Olempike cyabashije kurenza imidali 3000 mu Mikino yo mu Mpeshyi n’iba mu ntangiro z’umwaka.

Ikipe ya Leta Zunze Ubumwe za Amerika yitabiriye Imikino ya Paris

Indi nkuru wasoma: Umusaruro w’Abanyarwanda mu Mikino Olempike ya Paris