Hugo Maradona yaguye mu gace ka Monte di Procida, mu Ntara ya Naples mu Butaliyani nk’uko byatangajwe n’ikinyamakuru Fanpage.

Uyu mugabo wabaye umukinnyi w’umupira w’amaguru n’umutoza, yitabye Imana nyuma y’umwaka umwe mukuru we, Diego Armando Maradona, apfuye kubera guhagarara k’umutima.

Hugo wari warahawe akabyiniriro ka Turco, yakiniye Napoli guhera ubwo yari afite imyaka 18 mu 1987, umwaka wa mbere awukina nk’intizanyo muri Ascoli Calcio.

Mu mwaka wakurikiyeho, yagiye muri Rayo Vallecano muri Espagne, agaragara mu mikino ibiri iyi kipe yahuyemo na Racing de Santander.

Kubera kutabona umwanya uhagije wo gukina, mu 1990 yahise ajya muri Rapid Vienna yo muri Autriche, ariko naho ahakina imikino ibarirwa ku ntoki, ahitamo gusubira muri Amerika y’Epfo aho yakiniye Deportivo Italia yo muri Venezuela, atsinda ibitego 11 mu mikino 34.

Yanyuze gato muri Club Progreso y’i Montevideo mbere yo kujya gukina mu Buyapani hagati ya 1991 na 1198 akinira amakipe atatu yo muri J1 League arimo PJM Future (yatsindiye ibitego 31), Avispa Fukuoka (yatsindiye ibitego 35 ) na Consadole Sapporo yatsindiye ibitego 15.

Mu 1999 ni bwo Hugo Maradona yasubiye muri Argentine, asinyira Brown de Arrecifes, ayikinira imikino 20 mbere yo gusezera gukina umupira w’amaguru.

Ntiyigeze akinira Argentine ariko yari umwe mu batarengeje imyaka 16 batwaye Shampiyona ya Amerika y’Epfo muri Mata 1985, atsinda ibitego bibiri ku mukino wa nyuma.

Mu butoza, yatangiriye muri Puerto Rico Islanders mu 2004 mbere yo gusubira mu Butaliyani aho yamaze imyaka itandatu muri Boys Quarto.

Yatoje Mariano Keller kugeza mu 2017 mbere yo kujya muri Real Parete yamazemo amezi make iri mu cyiciro cya cyenda mu Butaliyani.

Hugo Maradona uvukana na Diego Maradona yitabye Imana ku wa Kabiri

Hugo yitabye Imana afite imyaka 52

Ubwo Diego Maradona yari kumwe na murumuna we ndetse n'umufasha we