March’ Generation yahagaritswe muri Fan Club za Rayon Sports, bamwe mu bari bayigize bashinga indi

Yanditswe na Kabera Haruna
Kuya 12 Nyakanga 2020 saa 07:24
Yasuwe :
0 0

Itsinda ry’abafana ba Rayon Sports ‘March’ Generation’ ryari mu akomeye muri iyi kipe, ryamaze guhagarikwa ndetse ricikamo ibice bibiri, bamwe mu bari barigize bashinga irindi rishya ryiswe “Dream Unity”.

Ku wa Gatandatu nibwo Ihuriro ry’Amatsinda y’Abafana ba Rayon Sports “Fan Base” ryatangaje Fan Club 32 zemewe kandi zujuje ibisabwa.

Kuri urwo rutonde ntihagaragayeho Fan Club ya March’ Generation ifatwa nk’imwe mu zari zikomeye kurusha izindi ndetse akaba ariyo yatangaga umusanzu uri hejuru kurusha izindi, ugera ku bihumbi 500 Frw buri kwezi.

Kugira ngo itsinda ry’abafana rikurwe mu yemewe muri Rayon Sports ni uko riba rimaze amezi atatu ridatanga umusanzu nk’uko Umuvugizi wa Rayon Sports, Nkurunziza Jean Paul yabitangarije IGIHE.

Ati "Iyo Fan Club imaze amezi atatu idatanga umusanzu irahagarikwa by’agateganyo, ikaba itemerewe no gutanga igitekerezo. Kugira ngo yongere kwemererwa ni uko isubira mu murongo umwe nk’izindi."

Uretse March’ Generation imaze imyaka irindwi ishinzwe, andi matsinda yahagaritswe arimo Les Bleus du Sud, Lucky Jersey na Rocket.

Runigababisha Mike uyobora March’ Generation yabwiye IGIHE ko impamvu bahagaritswe ari uko batubahirije gutanga umusanzu mu gihe cy’amezi atatu cyangwa gushyigikira gahunda “Ubururu bwacu, Agaciro kacu” yo kugura abakinnyi, ahubwo ari uko batavuga rumwe n’ubuyobozi bwa Munyakazi Sadate.

Ati “Muri Fan Club batangaje ntayo irusha March’ Generation gutanga umusanzu. Bayikuyemo kubera njyewe, hari n’izindi bakuyemo kubera ko zitabashyigikiye.”

March’ Generation yari isanzwe ifatanya n’Uruganda rwa SKOL mu gutegura igihembo cy’Umukinnyi w’Ukwezi wa Rayon Sports ndetse ubwo iyi kipe yafashaga abakinnyi mu bihe bya Coronavirus, muri Mata, yafashije abakinnyi bane.

Bamwe mu bahoze ari abanyamuryango ndetse n’abayobozi ba March’ Generation bashinze indi Fan club yitwa Dream Unity tariki 10 Nyakanga.

Kuri iki Cyumweru, nibwo yabonye ubuyobozi bwayo bukuriwe na Dr Karera Claudine nka Perezida ndetse na Nziza Yvan Kayumba nka Visi Perezida wa Mbere. Uwimana Jeannine wari usanzwe ari Umunyamabanga wa March’ Generation azakomeza kuri uyu mwanya mu gihe Nshimyumukiza Sam ari Umubitsi wa Dream Unity.

Uwimana Jeannine yavuze ko impamvu yatumye biyemeza kuva muri March’ Generation ari uko batari bagihuza na Perezida wayo, Runigababisha Mike ndetse ngo basanze batari kubasha gukomeza gushyigikira Rayon Sports yabahuje.

Ati "Ubundi icyo dukorera twese ni Rayon Sports, si umuntu. Ikipe niyo yaduhuje. Ubu byari bigeze aho dusanga icyaduhuje atari cyo tugisihyikiye ahubwo umuntu umwe cyangwa abantu babiri bashaka ko tugendera ku myumvire yabo yo kudashyigikira ubuyobozi. Niba batemera ubuyobozi, urumva ko byari bisigaye bigorana gushyigikira ikipe kandi ariyo dukorera."

Dream Unity irimo abanyamuryango 80 banamaze gutanga umusanzu wabo muri ’Ubururu bwacu’.

March' Generation yaherukaga kwizihiza isabukuru y'imyaka irindwi muri Werurwe, yahagaritswe muri Fan Club za Rayon Sports
Bamwe mu bari bagize March'Generation bashinze indi Fan Club yitwa 'Dream Unity'

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .