APR FC, Amavubi na AS Kigali zizakina imikino ya gicuti hagati yazo

Yanditswe na Eric Tony Ukurikiyimfura
Kuya 20 Ukwakira 2020 saa 11:38
Yasuwe :
0 0

APR FC, AS Kigali n’ikipe y’Igihugu ‘Amavubi, zizakina imikino ya gicuti hagati yazo mu rwego rwo kwitegura imikino Nyafurika zifite mu marushanwa atandukanye.

APR FC na AS Kigali zizahagarira u Rwanda mu mikino Nyafurika ihuza amakipe mu gihe Amavubi azakina n’ikipe y’Igihugu ya Cap-Vert mu mikino ibiri yo gushaka itike ya CAN 2022, mu Ugushyingo.

Aya makipe yose amaze iminsi yaratangiye imyitozo, ariko nta n’imwe irakina umukino wa gicuti nyuma y’uko imikino yo mu Rwanda yakomorewe mu mpera z’ukwezi gushize nyuma yo guhagarikwa muri Werurwe kubera icyorezo cya COVID-19.

Umunyamabanga Mukuru wa AS Kigali, Gasana Francis, yabwiye IGIHE ko bateganya gukina imikino ya gicuti hamwe na APR FC n’Amavubi kugira ngo barusheho kwitegura.

Ati “Imikino ya gicuti turayiteganya hamwe na APR FC n’Amavubi, buri kipe yakwifuza gukina n’indi kuko ni amakipe dufite icyo duhuriyeho kuko bizadufasha kwitegura.”

Amakuru IGIHE yamenye ni uko umukino wa mbere ushobora guhuza APR FC na AS Kigali ku wa Kane.

Visi Perezida wa APR FC, Maj Gen Mubaraka Muganga, avuga ko bateganya gukina imikino irindwi ya gicuti mbere yo kwitabira irushanwa rya CAF Champions League mu Ugushyingo, aho ine muri iyo izaba ari iy’imbere mu gihugu.

Ati “Imyiteguro iragenda neza, dufite akazi katatworoheye ko guhagararira u Rwanda no gutanga abakinnyi mu Amavubi. COVID-19 sindibuyivugeho kuko twese yatugezeho ku Isi yose, ariko twe mu Rwanda yadukozeho kurusha abandi kuko nk’ibi bihugu duturanye, igifite imikino mike kiri ku mukino wa gatandatu muri shampiyona, twe nta n’umwe turabona.”

“Mu myiteguro dukora, turasabwa gukora cyane, nitugira Imana COVID-19 ikagenda bukeya, duteganya ko tuzashaka imikino ya gicuti ari hano mu Rwanda byibura nk’imikino ine, no mu mahanga byibura imikino nk’itatu, ku buryo tubaye dufite imikino irindwi mu maguru hari ubwo byadufasha.”

APR FC na AS Kigali zizakina ijonjora rya mbere ry’imikino Nyafurika ya CAF Champions League na Confederation Cup hagati ya tariki ya 20 n’iya 29 Ugushyingo 2020.

Amavubi atarabonye umukino mpuzamahanga wa gicuti, azabanza kwakirwa n’ikipe y’Igihugu ya Cap-Vert tariki ya 11 Ugushyingo mu gihe umukino wo kwishyura uteganyijwe ku wa 17 Ugushyingo 2020.

Ikipe y’Igihugu yabaye ifashe ikiruhuko cy’icyumweru, izasubukura imyitozo ku Cyumweru tariki ya 25 Ukwakira.

Amavubi yitegura Cap-Vert ntiyigeze abona umukino wa gicuti mpuzamahanga
AS Kigali iteganya gukina na APR FC n'Amavubi mu mikino ya gicuti
APR FC ikomeje imyitozo i Shyorongi, ishobora gukina na AS Kigali ku wa Kane
Visi Perezida wa APR FC, Maj Gen Mubaraka Muganga, avuga ko bateganya gukina imikino irindwi ya gicuti mbere yo kwitabira CAF Champions League

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE
Kwamamaza

Special pages
. . . . . .