00:00:00 IGIHE NETWORK KN KINYARWANDA EN ENGLISH FR FRANCAIS

Umunya-Erythrée Natnael Tesfatsion yegukanye Tour du Rwanda 2020 (Amafoto na Video)

Yanditswe na Eric Tony Ukurikiyimfura, Israel Ishimwe
Kuya 1 March 2020 saa 10:20
Yasuwe :

Natnael Tesfatsion ukomoka muri Erythrée yegukanye Tour du Rwanda 2020, Mugisha Moïse ukinira Skol Adrien Cycling Academy asoza ku mwanya wa kabiri ku rutonde rusange.

Iri rushanwa rizenguruka igihugu ryasojwe kuri iki Cyumweru, tariki ya 1 Werurwe 2020, aho abakinnyi basiganwe ku ntera y’ibilometero 89.3.

Tour du Rwanda iri ku rwego rwa 2.1 guhera mu mwaka ushize mu gihe hagati ya 2009 na 2018 yari kuri 2.2.

Agace ka nyuma k’iri siganwa rizenguruka igihugu kahagurukiye i Gikondo ahasanzwe habera imurikagurisha (Expo Ground) saa 10:30, abasiganwa berekeza i Rebero, aho banyuze Norvège no kwa Mutwe.

Kegukanywe na José Manuel Diaz ukinira NIPPO DELKO One Provence wakoresheje 2h33’24’’ ku ntera y’ibilometero 89.3, yakurikiwe na Mugisha Moïse wa SACA, yasize amasegonda atatu.

Natnael Tesfatsion ni we wasoje isiganwa ryose ari imbere aho mu bilometero 889.2 yakoresheje 23h13’01”; asiga Umunyarwanda Mugisha Moïse (SACA) ho 54” mu gihe ku mwanya wa gatatu hasoje Umusuwisi Schelling Patrick ukinira Israel Start-up Nation wakoresheje 23h14’33’’.

Tesfatsion w’imyaka 20, yabonye izuba ku wa 23 Gicurasi 1999. Uyu musore akinira NTT Continental Cycling Team ariko yitabiriye isiganwa ku itike y’Ikipe y’Igihugu ya Erythrée.

Yambaye umwambaro w’umuhondo ubwo yegukanaga agace karekare ka Tour du Rwanda 2020 ka Rusizi-Rubavu kakinwe ku wa 26 Gashyantare 2020, akagasoza akoresheje amasaha atanu, iminota 34 n’amasegonda 46, ahita anafata umwanya wa mbere ku rutonde rusange.

Tesfatsion yabaye uwa kabiri ukomoka muri Erythrée wegukanye Tour du Rwanda nyuma yo kuzamurwa ku rwego rwa 2.1 mu 2019, kuko iy’umwaka ushize yatwawe na Merhawi Kudus Ghebremedhin [wavutse tariki 23 Mutarama 1994] ukinira Astana Pro Team.

UKO AGACE KA NYUMA KA TOUR DU RWANDA KAGENZE:

Video: Umunya-Erythrée Natnael Tesfatsion yegukanye Tour du Rwanda 2020

  • Indirimbo yubahiriza igihugu ya Erythrée yongeye kuririmbirwa mu Rwanda

Ku nshuro ya kabiri yikurikiranya, Umunya-Erythrée yegukanye Tour du Rwanda. Tesfatsion Natnael yageze ikirenge mu cya Merhawi Kudus wegukanye iri rushanwa mu mwaka ushize.

Abanya-Erythrée benshi bari ahasorejwe isiganwa, bafite akanyamuneza, banaririmba indirimbo ziri mu ndimi zikoreshwa mu mijyi irimo za Asmara.

Byari ibyishimo bidasanzwe kuri Natnael Tesfatsion na bagenzi be bo muri Erythrée
Abanya-Erythrée bari bafite akanyamuneza nyuma yuko Natnael Tesfatsion yegukanye Tour du Rwanda 2020

Uko abakinnyi bigabanyije imyambaro yatanzwe ku Gace ka Munani ka Tour du Rwanda 2020:

  • Umwenda utangwa na Skol uhabwa uwegukanye agace: Diaz Gallego (Nippo Delko)
  • Umwenda w’Umuhondo utangwa na Rwanda Tea uhabwa uri imbere ku rutonde rusange: Natnael Tesfatsion (Érythrée)
Umuyobozi Mukuru w’Ishyirahamwe ry’Umukino w’Amagare ku Isi (UCI), Amina Lanaya, mu ifoto y'urwibutso na Natnael Tesfatsion wegukanye Tour du Rwanda 2020; agaragiwe na Mugisha Moïse (uwa kane ibumoso) wabaye uwa kabiri na Schelling Patrick wasoje ku mwanya wa gatatu
Natnael Tesfatsion aririmba indirimbo yubahiriza igihugu cye
Umunya-Erythrée Natnael Tesfatsion; Mugisha Moïse na Schelling Patrick bafashe ifoto y'urwibutso hamwe n'abakobwa baherekeje Rwanda Tea muri Tour du Rwanda 2020
  • Umwenda utangwa na Cogebanque uhabwa urusha abandi guterera imisozi: Taaramäe Rein (Total Direct Energie)
Umuyobozi Mukuru wa Cogebanque, Cherno Gaye (uwa kabiri iburyo) na Perezida w'Ishyirahamwe Nyarwanda ry’Umukino w’Amagare (FERWACY), Murenzi Abdallah bahembye Taaramäe Rein ukinira Total Direct Energie wabaye umukinnyi mwiza uzamuka cyane
  • Umwenda w’urusha abandi Sprint utangwa na SP: Yemane Dawit (Érythrée)
Yemane Dawit wo muri Érythrée yahembwe n'abarimo Minisitiri w'Ikoranabuhanga na Inovasiyo, Ingabire Paula
  • Umwenda w’umukinnyi ukiri muto witwaye neza utangwa na Prime Insurance Ltd: Tesfatsion Natnael (Érythrée)
Prime Insurance Ltd yahembye Tesfatsion Natnael ukomoka muri Érythrée wasoje Tour du Rwanda ariwe mukinnyi ukiri muto witwaye neza
  • Umwenda w’urusha abandi guhangana utangwa na Visit Rwanda: Munyaneza Didier (Benediction Ignite)
Umunyamabanga wa Leta muri Minisiteri y'Urubyiruko, Bamporiki Edouard (uwa kabiri ibumoso) n'Umuyobozi Wungirije w'Ikigo cy'Igihugu cy'Iterambere (RDB), Niyonkuru Zephanie, bahembye Munyaneza Didier
  • Umwenda w’Umunyafurika uri imbere uhembwa na RwandAir: Tesfazion Natnael (Érythrée)
  • Umwenda w’Umunyarwanda mwiza utangwa na Gorilla Games: Mugisha Moïse (SACA)
  • Ikipe yahize izindi yahembwe umwenda w’Inyange Industries: Androni Giocatolli (yo mu Butaliyani).

Abakinnyi batanu mbere ku rutonde rusange (uko isiganwa ryarangiye)

1. Tesfatsion Natnael (Erythrée): 23h13’01”

2. Mugisha Moïse (SACA): 23h13’01”+ 54”

3. Schelling Patrick (Israel Start-up Nation): 23h13’01”+1’32”

4. Main Kent (Pro Touch): 23h13’01”+ 1’34”

5. Ravanelli Simone (Androni): 23h13’01”+ 02’03”

Abakinnyi ba mbere mu Gace ka Munani

1. José Manuel Diaz (Nippo Delko): 2h33’24’’

2. Mugisha Moïse (SACA): 2h33’24’’+ 3”

3. Main Kent (Pro Touch): 2h33’24’’ + 7”

4. Ravanelli Simone (Androni): 2h33’24’’+11”

5. Tesfatsion Natnael (Erythrée): 2h33’24’’+ 39”

6. Restrepo Jhonatan (Androni): 2h33’24’’+ 43”

Abayobozi bakuru muri Guverinoma barebye agace ka nyuma ka Tour du Rwanda 2020

Umunyamabanga wa Leta muri Minisiteri y'Urubyiruko, Bamporiki Edouard (iburyo) mu bitabiriye ibirori
Abayobozi batandukanye bagerageza gufata amafoto y'urwibutso mu birori
Minisitiri wa Siporo, Munyangaju Aurore Mimosa na Perezida w'Ishyirahamwe Nyarwanda ry’Umukino w’Amagare (FERWACY), Murenzi Abdallah
Umuyobozi Mukuru w’Ishyirahamwe ry’Umukino w’Amagare ku Isi, Amina Lanaya, yitabiriye ibirori byo gusoza Tour du Rwanda 2020
Inganzo Ngari ni zo zasusurukije ibi birori mu mbyino gakondo
Intore yo mu Itorero Inganzo Ngari isusurutsa abitabiriye ibirori byo guhemba abakinnyi bitwaye neza

MWAKOZE CYANE- IJAMBO RYA Natnael Tesfatsion nyuma yo kwegukana Tour du Rwanda

Natnael Tesfatsion usanzwe ukinira Dimension Data ariko akaba yaritabiriye Tour du Rwanda ari mu Ikipe y’Igihugu ya Erythrée, yavuze ko anezerewe cyane.

Yagize ati “Mwakoze cyane, abakinnyi bagenzi banjye ndabashimira. Abanyarwanda na bo ndabashimira. Murakoze.’’

  • Menya Tesfatsion wegukanye Tour du Rwanda 2020

Tesfatsion w’imyaka 20, yabonye izuba ku wa 23 Gicurasi 1999. Uyu musore akinira NTT Continental Cycling Team.

Mu mwaka wa 2018 yakinaga mu ikipe y’abatarabigize umwuga ya EriTel, ayivamo ajya muri Dimension Data for Qhubeka mu 2019.

Umwaka wa 2020 yawutangiye neza kuko yabaye uwa kabiri muri La Tropicale Amissa Bongo, isiganwa ry’amagare ribera muri Gabon, yasoje irushanwa ariwe mukinnyi mwiza mu bakiri bato ndetse yanegukanye agace karyo ka kabiri.

  TOUR DU RWANDA YEGUKANYWE NA NATNAEL TESFATSION WO MURI ERYTHRÉE

13:03: Díaz José Manuel (NIPPO DELKO One Provence) yegukanye Agace ka Karindwi ka Tour du Rwanda 2020. Mugisha Moïse yahageze ari ku mwanya wa kabiri.

José Manuel Diaz ni we wegukanye Agace ka Munani ka Tour du Rwanda 2020
Mugisha Moïse yasoje Agace ka Munani ku mwanya wa kabiri
Tesfatsion Natnael wo muri Erythrée yasoje Agace ka Munani ari ku mwanya wa gatanu
Munyaneza Didier yashimwe na benshi kuko yitabiriye isiganwa kandi umwana we aheruka kwibaruka arwaye

Ibyo wamenya kuri José Manuel Diaz wegukanye Agace ka Munani

José Manuel Díaz Gallego ni Umunya-Espagne waboneye izuba mu gace ka Andalousie ku wa 18 Mutarama 1995, akaba akinira Nippo Delko One Provence yo mu Bufaransa.

Hagati ya 2017 na 2018 yakiniraga Israel Cycling Academy mu gihe mu mwaka ushize yari muri Vararlberg Santic.

Amasiganwa yitwayemo neza ni Tour Palencia, Coupe d’Espagne Espoirs na Tour de Cantabrie, yose yabayemo uwa kabiri mu 2015.

Mu 2016, yasiganwe muri Memorial Valenciaga. Yabaye kandi uwa kabiri muri Coupe d’Espagne espoir n’uwa gatatu muri Subida a Gorla.

Abanyarwanda bongeye kubura amahirwe yo kwegukana agace muri Tour du Rwanda

Kuva Tour du Rwanda yashyirwa ku rwego rwa 2.1 nta Munyarwanda uregukana agace kamwe karyo. Mu isiganwa ry’uyu mwaka, Abanyarwanda bakunze kuyobora ariko mu bilometero bya nyuma bagasigwa, rigatwarwa n’abandi.

Mu gace ka nyuma Mugisha Moïse yari yasize abandi ariko begereje kugera ku murongo asigwa na Díaz José Manuel (NIPPO DELKO One Provence)

Kuva tariki ya 6 Kanama 2018, nta gace Abanyarwanda baratwara, kuko baheruka aka Mugisha Samuel wegukanyeaka Kigali- Huye muri Tour du Rwanda 2018. Hashize iminsi 573 ni ukuvuga umwaka umwe, amezi atandatu n’iminsi 24.

13:01: Hailu Ghirmay yacomotse mu gikundi ashaka uko yajya gutsinda akegukana agace ka Karindwi ka Tour du Rwanda 2020. Yahise afatwa n’igikundi. Mugisha Moïse yasize igikundi ho amasegonda 18. Bageze mu kilometero cya nyuma.

IBILOMETERO BITATU BYA NYUMA

12:59: Abakinnyi basigaje ibilometero bitatu bya nyuma ngo bagere ku murongo. Mugisha Moïse ari imbere y’igikundi ho amasegonda 20. Hategerejwe kureba niba Agace ka Karindwi ka Tour du Rwanda gatwarwa n’Umunyarwanda.

IBILOMETERO BITANU BYA NYUMA:

12:54: Abakinnyi basigaje ibilometero bitanu bya nyuma ngo bagere ku musozi wo ku i Rebero aho Tour du Rwanda yasorejwe. Mugisha Moïse aracyari imbere y’igikundi ho amasegonda 28.

Mugisha Moïse yari ashyigikiwe bifatika ndetse bamwe mu bafana bitwaje icyapa kigaragaza ko bamuri inyuma
  • Abakurikirana Tour du Rwanda boroherejwe kuzigama binyuze muri ‘AGUKA NA COGEBANQUE’

Mu gukomeza gutanga umusanzu muri gahunda ya guverinoma yo korohereza abantu bose kugera kuri serivisi z’imari, Banki Nyarwanda y’Ubucuruzi, Cogebanque, yegereje serivisi zo kuzigama abakurikiranye Tour du Rwanda 2020.

Bamwe bafunguje konti ya ‘ITEZIMBERE’ banyuze ku bahagarariye Cogebanque (agent) aho buri gace kasorejwe. Abanyamahirwe banahawe ibihembo bitandukanye.

Umwihariko wa Konti ya ‘ITEZIMBERE’, ni uko nta mufuragiro wa buri kwezi uyifunguye acibwa, kandi ashobora kuyikoresha mu kwaka serivisi zose za banki.

Benshi mu bafunguje iyi konti banasabye iyo kuzigama ya ‘TEGANYA’, ishobora gufungurwa n’umukiliya mushya cyangwa usanzwe, akungukirwa kugera kuri 5% by’amafaranga yabikijeho.

Cogebanque ni banki nyarwanda imaze imyaka irenga 20 itanga serivisi mpuzamahanga. Tubafitiye serivise nyinshi zitandukanye zabafasha kugera ku ndoto zanyu! Harimo inguzanyo zitandukanye, konti zo kwizigamira zunguka bishimishije, Konti itezimbere wagezwaho na ba agents bacu, idakatwa mafaranga yo kuyicunga ; uburyo butandukanye bwo gukoresha konti bw’ ikoranabuhanga, n’izindi zinshi zitandukanye

Umuyobozi ushinzwe Iyamamazabikorwa muri Cogebanque, Iyamuremye Antoine, yasobanuye ko bazakomeza kwegera Abanyarwanda no kubagezaho serivisi z'imari
Ubusanzwe abantu benshi bakenera kwizigamira kubera impamvu zirimo guteganyiriza izabukuru zabo n’ahazaza h’ababakomokaho. Uburyo bwizewe bwo kubigeraho ni ugukorana n’ibigo by’imari birimo na banki
Cogebanqe Plc ni umuterankunga w'imena wa Tour du Rwanda 2020
Abakunzi b'amagare aho yanyuze hose basobanuriwe serivisi zo kwizigamira
Abakunzi b'amagare basobanuriwe uko bakwizigamira binyuze kuri “Konti Iyubakire’’ bagahabwa amahirwe yo kugabanyirizwa ku nyungu icibwa ku nguzanyo yo gutunga inzu. Uko ubitsa amafaranga menshi biguha ubushobozi bwo kubona inyungu nyinshi

12:45: Mugisha Moïse yasize igikundi ho 26’’. Bageze mu bilometero 10 bya nyuma.

 Amanota y’agasozi ka Gatanu

1. Manizabayo Eric (Benediction Ignite)
2. Mugisha Moïse (SKOL Adrien Niyonshuti Academy)
3. Main Kent (Pro Touch)
4. Natnael Tesfatsion (Erythrée)
5. Quintero Noreña Carlos Julian (Terengganu Inc. Tsg Cyclin Col)

Andi mafoto y’abakinnyi mu muhanda

Abafana benshi baba bategereje kwihera ijisho umukino w'amagare
Abakinnyi 66 ni bo bakinnye agace ka nyuma ka Tour du Rwanda
Abakinnyi bagenda berekwa iminota iri hagati y'ab'imbere n'igikundi kugira ngo bibafashe kumenya ibyemezo bafata mu muhanda
Natnael Tesfatsion yagendeye mu gikundi ariko aza kugicomokamo isiganwa rigiye gusoza
Byukusenge Patrick (Benediction Ignite) anyonga igare mu mihanda ya Kigali
Mugisha Moïse yakunze kugendera mu gikundi mu bilometero bya mbere

  MUGISHA MOISE ACOMOTSE MU GIKUNDI AGERAGEZA KUJYA KUGABANYA AMASEGONDA

Abasiganwa bageze ku kilometero cya 72. Mugisha Moïse uri ku mwanya wa kabiri ku rutonde rusange yacomotse mu gikundi agerageza kujya gutsinda. Yasize igikundi ho 35’’.

Mugisha yazamutse kwa Mutwe ari wenyine mu gihe igikundi kirimo na Tesfastion wa mbere cyari kimukurikiye inyuma ye.

  NTIBYOROSHYE! ABAKINNYI BANE BAVUYE MU ISIGANWA

Abakinnyi bane barimo Hadj-Bouzid Abderrahmane Karim (Groupement Sportif des Pétroliers/GSP), Bengayou Abdelraouf (GSP), Araujo Bruno (Bai Sicasal Petro de Luanda na Batmunkh Maral-Erdene (Terengganu Inc. TSG Cycling Team) bavuye mu isiganwa.

Ubusanzwe ikintu gishobora gutuma umukinnyi ava mu irushanwa ni igihe yagize ikibazo cyo kugwa cyangwa agakorerwaho inshuro mu gihe agace kari gukinwa hari aho bazengurutse.

  UMUNYARWANDA YARI IMBERE

12:34: Abasiganwa bageze ku kilometero cya 70. Manizabayo yanyuze kuri Taaramae mbere yo kugera kwa Mutwe bahanyura ku nshuro ya kabiri.Yasize igikundi ho 50’’.

  IBILOMETERO 20 BYA NYUMA HARIMO GUKUBANA

12:32: Abakinnyi bageze mu bilometero 20 bya nyuma. Manizabayo yasize 45’’ Taaramae, Buru ari inyuma ho 1’29’’, mu gihe igikundi kiri inyuma ho 1’38’’.

12:29: Ikinyuranyo cyakomeje kugabanuka. Manizabayo yasigwaga 1’22’’ na Taaramae mu gihe igikundi kirimo Tesfatsion uhabwa amahirwe yo kwegukana Tour du Rwanda cyasizwe 1’55’’.

12:26: Ku kilometero cya 67, Manizabayo Eric yasohotse mu gikundi, ubu arasigwa 1’32’’ na Taaramae mu gihe igikundi cyo cyasizwe 1’54’’.

12:21: Abakinnyi bamaze kugenda ibilometero 62. Byukusenge wari inyuma y’umukinnyi uri imbere, igikundi cyamufashe, ubu bari kugendera hamwe. Ku kilometero cya 66 igikundi cyasizweho 2’34’’.

  Restrepo Valencia Jhonatan (Androni Giocattoli – Side) yacomotse mu gikundi

12:20: Restrepo Valencia Jhonatan (Androni Giocattoli – Side) umaze kwegukana uduce tune muri Tour du Rwanda 2020. Yacomotse mu gikundi yiruka ku mukinnyi uri imbere.

  MUGISHA MOISE YATOBOKESHEJE

12:18: Mugisha uri ku mwanya wa kabiri ku rutonde rusange yagize ikibazo cy’igare mu muhanda ariko nyuma yo guhabwa ubufasha ahita yongera kunyonga n’ingoga yongera gufata igikundi.

12:16: Abasiganwa bamaze kugenda ibilometero 60. Taaramae uri imbere yasize Byukusenge Patrick 3’27’’ mu gihe igikundi kiri inyuma ye ho 4’30’’.

12:15: Mugisha Moïse yinjiye mu gikundi, Restrepo agisohokamo

Mugisha Moïse wari wagize ikibazo cy’igare yasubiye mu gikundi ariko asanze Jhonatan Restrepo umaze kwegukana uduce tune, amaze kugisohokamo acika abandi. Abasiganwa bamaze gukora ibilometero 60. Taaramae yasize abandi iminota 3 n’amasegonda 27.

- Kwa Mutwe iminsi ibiri!

Umusozi wo kwa Mutwe umaze kumenyekana mu mukino w’amagare ku isi. Benshi bawita urukuta rwa Kigali, ’Wall of Kigali’. Abafana baryoherwa no kubona abakinnyi bahanyura bashinyiriza bamaze kuba benshi. N’uyu munsi ntabwo bahatanzwe. Umwihariko w’aka gace muri Tour du Rwanda y’uyu mwaka, kwa Mutwe amagare yahanyuze inshuro ebyiri zirimo n’umunsi wabanjirije uwa nyuma.

12:04: Taaramae yatwaye amanota y’agasozi ka kane

Andi manota yatangiwe ku Rebero, na yo yatwawe na:

1. Taaramäe Rein (Total Direct Energie)
2. Byukusenge Patrick (Benediction Ignite)
3. Yemane Dawit (Erythree)
4. Main Kent (Pro Touch)

Mugisha Moïse na Tesfatsion Natnael bari mu gikundi cyasizwe iminota itatu n’igice na Taaramae.

  Abasiganwa bamaze kugenda ibilometero 42. Taaramae yakomeje kuyobora yasize Byukusenge Patrick ho +3’21’’ mu gihe igikundi kiri inyuma ye ho 4’10’’.

Amanota ya sprint ya kabiri

1. Taaramäe Rein (Total Direct Energie)
2. Byukusenge Patrick (Benediction Ignite)
3. Tesfom Sirak (Erythrée)

  Abakinnyi baracyari gukubana. Taaramae yashyizemo ikinyuranyo cya 3’07’’. Ku kilometero cya 29 Byukusenge Patrick (Benediction Ignite) na Díaz José Manuel (Nippo) bacomotse mu gikundi, aho basizwe n’uri imbere ho 2’40’’ mu gihe igikundi cyasizwe 3’.

Taaramae yageze kwa Mutwe ari uwa mbere

Abasiganwa bamaze kugenda ibilometero 37. Byukusenge yasizwe iminota itatu mu gihe igikundi akirusha metero 50 gusa.

Amanota y’agasozi ko kwa Mutwe

1. Taaramäe Rein (Total Direct Energie)
2. Byukusenge Patrick (Benediction Ignite)
3. Lahav Omer (Israel Start-Up Nation)
4. Awet Gebremedhin Andemeskel (Israel Start-Up Nation)

- Amafoto yo mu muhanda

11:45: Taaramäe yakomeje kwanikira igikundi

Rein Taaramäe yasize igikundi iminota 4 n’amasegonda 10. Yasize Byukusenge Patrick iminota itatu n’amasegonda 20 mu bilometero 45 bimaze gukorwa.

- Taaramäe yatwaye amanota y’agasozi ka kabiri n’aka gatatu

Amanota yo kuzamuka Mont Kigali no kwa Mutwe, yose yatwatwe n’Umunya-Estonia ukinira Direct Energie, Taaramäe Rein. Yakurikiwe na Byukusenge Patrick na Quintero.

- Tour du Rwanda y’uyu mwaka yari iy’abantu bazamuka

Ku ruhande rw’umutoza wa Benediction Ignite, Sempoma Félix, avuga ko Tour du Rwanda y’uyu mwaka yari iy’abakinnyi bazamuka.

Ati “Amakipe yose yaje sinavuga ko yari akomeye kimwe. Muri iyi Tour du Rwanda harimo Nippo Delko, Eryhrée n’ikipe ya Israel zifite abakinnyi bakomeye kimwe na Direct Energie. Iri rushanwa ni ry’abakinnyi bazamuka.”

Taaramäe Rein, Hailu Ghirmay Biniam na Natnael Tesfazion bari mu bakinnyi bakomeye mu isiganwa ry’uyu mwaka, batunguwe n’Umunya-Colombia Jhonatan Restrepo watwaye uduce tune muri turindwi tumaze gukinwa nubwo nta mahirwe menshi afite yo kwegukana isiganwa.

Ku bwa Kayishema Thierry Tity, Umunyamakuru wa Televiziyo Rwanda, we asanga “uyu munsi ari uwa Restrepo cyangwa Biniam kuko nta byinshi baharanira.”

Amafoto menshi y’abakinnyi bahaguruka i Gikondo

  Rwanda Foam yaherekeje Tour du Rwanda yegereza Abanyarwanda ibicuruzwa bishya

Rwanda Foam yaboneye izuba inganda zikora matela mu Rwanda yashyize ku isoko ubwoko bushya bwa matela zirimo iyitwa ‘Inzozi’ na ‘Executif’ zizafasha Abanyarwanda kuba no kuryama aheza.

Mu myaka ine ishize nibwo iyi sosiyete y’ubukombe mu gutanga ibiryamirwa byizewe yanabiherewe icyemezo cy’ubuziranenge gitangwa n’Ikigo cy’Igihugu cy’Ubuziranenge (RSB), yatangiye gukorana na Tour du Rwanda kuva iri siganwa ryaba mpuzamahanga mu 2009.

Rwanda Foam yatangiye kunyuza ibicuruzwa byayo kuri internet aho wanyura kuri www.rwandafoam.com ugatumiza matela ishobora kukugeraho mu masaha ane muri Kigali n’umunsi umwe mu ntara.

Shaddy Boo afata ifoto y'urwibutso n'umwe mu basuye stand ya Rwanda Foam ahasorejwe Tour du Rwanda 2020
Mu ntara, abakozi ba Rwanda Foam muri Tour du Rwanda basuraga abacuruzi ba matela
Shaddy Boo yashyuhije buri gace kasorejwemo Tour du Rwanda 2020

I Rebero ahasorezwa Tour du Rwanda 2020, abafana ni benshi

Abakunzi b’umukino w’amagare benshi bageze ku musozi wo ku i Rebero ahasorejwe Tour du Rwanda 2020.

Biteganyijwe ko umukinnyi wa mbere ahasesekara saa 12h47’57’’ nakoresha umuvuduko wa 40km/h mu gihe yakoresha umuvuduko wa 38 km/h yahagera 12h55’00’’.

11:21: Hailu Biniam yafashwe n’abari imbere. Ubu bari kugendana mu gikundi mu gihe Taaramäe Rein akiri imbere, yabasizeho 2’33’’.

11:13: Abasiganwa bamaze kugenda ibilometero 25 bitegura kugera Norvege. Igikundi cyasizweho 2’30’’.

11:10: Nyuma y’ibilometero 24 abasiganwa bitegura kugera Norvege Hailu Biniam yakomeje gusatira Taaramäe Rein umurusha 1’20’’ mu gihe hagati y’uwa mbere n’igikundi harimo 1’54’’.

11:01: Abasiganwa bamaze kugenda ibilometero 18 bageze Nyabugogo. Hailu Biniam yacomotse mu gikundi akurikira Taaramäe umusiga ho 1’13’’. Igikundi cyasizwe 1’20’’.

10:54: Taaramäe Rein ari imbere ya Munyaneza ho amasegonda 42 mu gihe igikundi yagishyizemo umunota umwe.

  • Amanota ya mbere y’ahatambika yatangiwe kuri Station ya SP

1. Taaramäe Rein (Total Direct Energie)
2. Manizabayo Eric (Benediction Ignite)
3. Hailu Biniam (Nippo Delko Provence)

- TESFATSION NATNAEL NI WE BYITEZWE KO YEGUKANA ISIGANWA RY’UYU MWAKA

Umunya-Erythrée Natnael Tesfazion w’imyaka 20, ni we uhabwa amahirwe yo kwegukana Tour du Rwanda 2020 nyuma y’uko ejo hashize yongereye ibihe yarushaga Mugisha Moïse ku rutonde rusange, hakajyamo umunota umwe n’amasegonda 30.

Abakinnyi batanu mbere kugeza ubu:

  1. Tesfatsion Natnael (Erythrée) 20h38’58’’
  2. Mugisha Moïse (Skol Adrien Cycling Academy) 20h40’28’’ (01’30’’)
  3. Schelling Patrick (Israel Start - Up Nation) 20h40’47’’ (01’49’’)
  4. Quintero Noreña Carlos Julian (Terengganu Inc. Tsg Cyclin Col 20h40’53’’ (01’55’’)
  5. Main Kent (Protouch) 20h41’04’’ (02’06’’)

  Amanota y’agasozi ka mbere

Amanota y’agasozi ka mbere yatangiwe ku i Rebero

1. Taaramäe Rein (Total Direct Energie)
2. Munyaneza Didier (Benediction Ignite)
3. Quintero Carlos (Terengganu Inc. TSG Cycling Team)
4. Fedorov Yevgeniy (Vino - Astana Motors)

10:50: Abakinnyi bamaze kugenda ibilometero icyenda. Taaramäe Rein (Total Direct Energie) yasize abamukurikiye ho amasegonda 42.

Tour du Rwanda 2020: Umwihariko wa Prime Insurance Ltd mu kugeza serivisi z’ubwishingizi ku Banyarwanda

Ikigo kiri ku isonga mu bitanga serivisi z’ubwishingizi, Prime Insurance Ltd, cyaherekeje irushanwa ry’amagare rizenguruka igihugu “Tour du Rwanda 2020’’ riri kuba ku nshuro ya 12.

Prime Insurance Ltd ni yo yahembye umukinnyi ukiri muto witwaye neza kuri buri ntera ya Tour du Rwanda 2020, iri ku rwego rwa 2.1.

Gushyigikira iri rushanwa ni icyemezo kigamije gukangurira Abanyarwanda muri rusange ibyiza byo gushinganisha umutungo wabo ndetse n’ubuzima bwabo kuko impanuka zidateguza.

Prime Insurance ibumbiyemo ibigo bibiri bitanga ubwishingizi bw’igihe gito n’ubwishingizi bw’igihe kirekire. Ubwishingizi bw’igihe kirekire butangwa n’ikigo cyitwa Prime Life Insurance Ltd.

Ubwishingizi bw’igihe gito bukubiyemo ubwishingizi bw’ibinyabiziga by’ubwoko bwose; ubw’inkongi z’umuriro/ububungabunga umutungo, ubw’imizigo, ubw’impanuka zonona umubiri, ubw’imirimo ijyanye n’inyubako z’ingeri zose, ubw’ingendo zo mu kirere.

Ubwishingizi bw’igihe kirekire burimo ubw’amashuri y’abana, ubw’inguzanyo z’amabanki, ubw’izabukuru, ubw’impanuka zitewe n’akazi n’ubwishingizi bw’umuryango.

  Abakinnyi 66 ni bo basiganwe mu gace ka nyuma ka Tour du Rwanda

Agace ka Munani ka Tour du Rwanda kakinwe n’abakinnyi 66 bo mu makipe 16 yaturutse mu bihugu byo ku migabane itandukanye. Ni bo bahataniye kwegukana agace ka nyuma ndetse na Tour du Rwanda 2020 muri rusange.

10:46: Kruger Hendrik (Pro Touch) akurikiye umukinnyi uri imbere. Taaramäe Rein (Total Direct Energie) yagiye wenyine mu gihe Munyaneza yabakurikiye. Basize igikundi ho amasegonda 33.

10:41: Abasiganwa bamaze kugenda ibilometero bitanu bageze ku i Rebero. Taaramäe Rein na Kruger Hendrik banyonze cyane basatira Munyaneza uri imbere. Basizeho igikundi ho 25’’.

10:35: Abakinnyi batandukanye batangiye kuva mu gikundi. Nyuma yo kugenda ibilometero bine, bitegura kwinjira mu gahanda k’amabuye kinjira mu Mudugudu wa BNR, Munyaneza Didier ukinira Benediction Ignite ni we uri imbere, yasize igikundi ho amasegonda 11.

10:32: Nyuma yo kugenda ikilometero 1.5, abakinnyi batangiye kubarirwa ibihe bageze mu Kanogo.

10:30: Abakinnyi bahagurutse kuri Expo Ground i Gikondo. Agace ka nyuma ka Tour du Rwanda katangijwe na Minisitiri wa Siporo, Munyangaju Aurore Mimosa ari kumwe na Minisitiri w’Ikoranabuhanga na Inovasiyo, Ingabire Paula.

10:25 Abakinnyi bamaze kugera ahatangirira isiganwa. Mu minota itatu iri imbere isiganwa riraba ritangiye.

  Nta nyota yaranzwe muri Tour du Rwanda: Skol yafashije benshi kwica icyaka

Mu gufasha Abanyarwanda n’abanyamahanga bitabiriye Tour du Rwanda 2020 kuticwa n’inyota, Uruganda rwenga ibinyobwa bisembuye n’ibidasembuye rwa Skol Brewery Ltd Rwanda, rwabegereje inzoga ya Skol n’ibindi binyobwa bitandukanye.

Skol ifite ku isoko ibinyobwa bitarimo umusemburo nka Panache Lemon n’ibisembuye nka Skol Select, Skol Lager, Skol Malt, Skol 5, Virunga Mist, Virunga Gold na Skol Canette, byose biboneka hirya no hino mu gihugu ku giciro cyiza.

Nta cyaka cyaranzwe muri Tour du Rwanda 2020

  Abafana ba mbere bageze ku mihanda y’i Gikondo aho isiganwa ritangirira biteguye kureba uko abakinnyi bahatana.

10:00: Minisitiri wa Siporo, Munyangaju Aurore Mimosa n’Umuyobozi w’Umujyi wa Kigali, Rubingisa Pudence bageze i Gikondo kuri Expo Ground ahatangiriye agace ka nyuma ka Tour du Rwanda 2020.

09:50: Abakinnyi basigaye mu isiganwa bageze imbere ya Expo Ground i Gikondo ahatangiriye agace ka nyuma ka Tour du Rwanda 2020.

Batangiye kwishyushya banyonga mu mihanda iri hafi y’aho amagare yahagurukiye saa 10h30.

  UMUYOBOZI WA UCI YANYUZWE NA TOUR DU RWANDA 2020

Umuyobozi Mukuru w’Ishyirahamwe ry’Umukino w’Amagare ku Isi, Amina Lanaya, ari mu bitabiriye Agace ka Karindwi ka Tour du Rwanda 2020.

Abinyujije ku rukuta rwe rwa Twitter yavuze ko yanyuzwe nuko agace kakiniwe i Nyamirambo kagenze.

Yagize ati "Tour du Rwanda yagenze neza mu mihanda ya Kigali aho abantu bakinaga basiganwa n’ibihe (Individual Time Trial). Ni isiganwa ririmo umurava udasanzwe.’’

Lanaya yageze mu Rwanda ku wa Gatanu, mu ruzinduko rugamije kureba aho u Rwanda rugeze rwitegura kwakira Shampiyona y’Isi y’umukino w’amagare izaba mu 2025.

Muri Nzeri umwaka ushize nibwo u Rwanda rwatanze ibisabwa byose, rusaba ko rwazakira Shampiyona y’Isi y’Amagare izabera muri Afurika, rukaba ruhanganye na Maroc.

Uretse kureba aho u Rwanda rugeze imyiteguro mu rugendo rwo kwakira Shampiyona y’Isi, Amina Lanaya, yavuze ko yaje no guhagararira Ishyirahamwe ry’Umukino w’Amagare ku Isi muri Tour du Rwanda 2020.

Ku bijyanye n’aho yasanze u Rwanda rugeze imyiteguro, Amina Lanaya, yashimye aho bigeze, ashimangira ko u Rwanda ari igihugu gifite imihanda myiza kandi ko n’Abanyarwanda bakunda cyane umukino w’amagare.

Umuyobozi Mukuru w’Ishyirahamwe ry’Umukino w’Amagare ku Isi, Amina Lanaya, yarebye Agace ka Karindwi ka Tour du Rwanda 2020 kakiniwe i Nyamirambo

Techno Market yinjiye bwa mbere mu mikoranire na Tour du Rwanda 2020

Ikigo cya Techno Market Ltd cyishimiye kwegera abakiliya bacyo bari mu bice bitandukanye by’igihugu binyuramo isiganwa mpuzamahanga ry’amagare “Tour du Rwanda 2020” riri kuba ku nshuro ya 12.

Techno Market ni icapiro ritanga serivisi zo gusohora inyandiko ku mpapuro (printing), kwandika ku byapa n’imyenda, gushushanya ku bikoresho n’ibindi bintu (branding).

Techno Market ikora ibitabo, brochure n’ibikoresho byifashishwa mu gusakaza ubutumwa mu bikorwa bitandukanye, by’akarusho akaba ari nayo yakoze ibitabo, ibyapa, ingofero n’ibindi biri gukoreshwa muri Tour du Rwanda 2020.

Techno Market yinjiye ku nshuro ya mbere muri Tour du Rwanda mu kwegera no guhaza ibyifuzo by’abenegihugu bakenera serivisi zitandukanye
Abakunzi b'amagare bishimiye kuganirizwa kuri serivisi zitangwa na Techno Market
Nyuma yo kuganirizwa kuri serivisi, ubuzima bukomeza bamwenyura!
Abakozi ba Techno Market bafata umwanya wo gusabana no kwishimana n'Abanyarwanda babasanze mu bice bitandukanye
Techno Market yahisemo kwinjira mu bufatanye na Techno Market ngo igere ku bakunzi b'amagare mu Rwanda hose

Tour du Rwanda iri ku rwego rwa 2.1 guhera mu mwaka ushize mu gihe hagati ya 2009 na 2018 yari kuri 2.2.

Inzira y’agace ka nyuma;

Kigali Expo Ground-Rwandex-Rond Point Kanogo-Cercle Sportif-Mburabuturo-Gikondo-Montée Pavée-Rebero (Finish Line)-Nyamirambo-SP Nyamirambo-Tapis Rouge-Kimisagara- Nyabugogo-Giticyinyoni-Nouvelle route direction Mont Kigali -Norvège-Mont Kigali-Stade de Kigali-Tapis Rouge -Kimisagara-Mur de Kigali (Kwa Mutwe)-Prison 1930-Apacope-Carrefour Yamaha-Kinamba-Route des poids Lourds-Rond Point Kanogo-Cercle Sportif-Mburabuturo-Gikondo-Montée Pavée-Rebero (Finish Line)+ kuzenguruka rimwe.

  Umutekano wo mu muhanda wari udadiye

Polisi y’u Rwanda yabaye hafi iri siganwa kuva ku munsi wa mbere, nta mpanuka yatewe n’umutekano muke mu mihanda yabaye. Isiganwa ry’uyu mwaka muri buri gace hatangirwaga ubutumwa bwa ‘Gerayo Amahoro’ bugamije gushishikariza abakoresha umuhanda kuba ku isonga ryo gusigasira umutekano wawo.

Polisi y’u Rwanda n’Ishyirahamwe ry’Umukino w’Amagare mu Rwanda (Rwanda Cycling Federation -Ferwacy) bifatanyije muri gahunda ya Gerayo Amahoro mu rwego rwo kurushaho kongera ubu bukangurambaga ku bakoresha umuhanda.

Ubu bufatanye bwatangijwe ku mugaragaro ku wa 23 Gashyantare 2020. Aho isiganwa riri guhagurukira buri gutangwa.

Mu butumwa butangwa abantu bose bibutswa bareba isiganwa kujya bahagarara kure y’umuhanda cyane ko harimo abishima bakarenza urugero bakaba bakwitura mu muhanda bikaba byateza impanuka, abasaba kwishima mu rugero bibuka ko amagara aseseka ntayorwe.

Gerayo Amahoro ni ubukangurambaga bugamije gukangurira abakoresha umuhanda kwitwararika ku buryo yaba ugenda n’amaguru n’ugenda n’ikinyabiziga badashyira ubuzima bwabo mu kaga gaterwa n’impanuka zo mu muhanda.

Umujyi wa Kigali mu mateka ya Tour du Rwanda

Ni ku nshuro ya 40 Umujyi wa Kigali utangiriyemo agace ka Tour du Rwanda mu gihe kandi ari ku nshuro ya 35 ugiye gusorezwamo agace k’iri siganwa rizenguruka igihugu.

Imiterere y’agace ka munani ari nako ka nyuma muri Tour du Rwanda 2020

Aka gace karimo udusozi turindwi, akaba ari two twinshi tubaye mu gace kamwe mu isiganwa ry’uyu mwaka.

Harimo agasozi ka Rebero, Mont Kigali, Kwa Mutwe tuza gukorwa inshuro ebyiri. Aka Rebero kazamo inshuro eshatu kuko ari naho hasorezwa isiganwa.

Amanota yo kuvuduka (sprint) aratangwa inshuro ebyiri gusa ku kilometero cya 13.1 no ku cya 42.9.

  Kigali isukuye kandi itekanye niyo yakiriye agace ka nyuma ka Tour du Rwanda 2020

Muri iki gihe, u Rwanda rwateye intambwe irenze iyo gukurura ba mukerarugendo kubera ko babengutse imisozi igihumbi irutatse cyangwa inyamaswa zo muri pariki zirimo ingagi, bigera ku kuratwa muri raporo n’ibyegeranyo bikorwa n’abahanga birugaragaza ku ruhembe rw’ibihugu bikungahaye ku isuku muri Afurika.

Umujyi wa Kigali utangaza ko bikwiye kuba umuco wa buri muturage wo gusukura iwe ndetse akamenya ko ari inshingano ze kubigiramo uruhare akanatanga umusanzu usabwa aharanira kurushaho kwigira.

Umujyi wa Kigali wirahirwa n’amahanga, abawutemberamo bakawuvuga imyato bitewe n’ubwiza ntagereranywa n’isuku ihebuje ituma ukurirwa ingofero ndetse benshi bakawufata nk’ icyitegererezo cyo kwigiraho binyuze mu ngendoshuri.

Umujyi wa Kigali ni wo wasorejwemo Tour du Rwanda 2020
Isura y'Umujyi wa Kigali mu masaha y'ijoro

Amafoto: Niyonzima Moïse

Video: Mugwiza Olivier


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .