U Bubiligi bwashyikirije u Rwanda amakuru ku mabuye y’agaciro bwari bubitse kuva mu gihe cy’ubukoloni

Yanditswe na Twarabanye Venuste
Kuya 29 Gashyantare 2020 saa 08:31
Yasuwe :
0 0

Leta y’u Bubiligi yashyikirije iy’u Rwanda amakuru akubiye mu bushakashatsi yakoze mu gihe cy’ubukoloni, ku byerekeye amabuye y’agaciro ari mu Rwanda.

Ayo makuru ari mu bitabo, amakarita n’izindi nyandiko byamaze kwinjizwa mu ikoranabuhanga (scanned) afite gigabytes (GB) ibihumbi 16.

U Rwanda rwayakiriye ku mugoroba wo ku wa Gatanu tariki 28 Gashyantare 2020 ruhagarariwe n’umuyobozi Ikigo cy’Igihugu gishinzwe Mine, Peteroli na Gaz (RMB), Francis Gatare, ruyashyikirizwa na Ambasaderi w’u Bubiligi mu Rwanda, Benoît Ryelandt.

Mu 2008 nibwo u Rwanda rwasinyanye amasezerano n’u Bubiligi yo guhererekanya amakuru bufite ku mabuye y’agaciro mu Rwanda. Akurikirwa n’intambwe zitandukanye zo kuyageraho zirimo, ingendo z’abanyarwanda zigamije kumenya ayo makuru, uko angana n’uko abitse.

Abanyarwanda bakoze izo ngendo basanze amenshi ari muri raporo zitandukanye, amakarita n’ibitabo, hemezwa ko atazatangwa mu mpapuro ahubwo ko agomba gushyirwa mu ikoranabuhanga.

Hari hashize igihe kirenga umwaka yinjizwa mu ikoranabuhanga (scanning), aho yari ashyinguye mu nzu ndangamurage ibitse amateka yo muri Afurika yo hagati, Musée Royal de l’Afrique Centrale iherereye i Tervuren mu Bubiligi

Aya makuru agejejwe mu Rwanda mu gihe n’ubundi hari abashoramari muri urwo rwego bajyaga kuyashaka mu Bubiligi. Umuyobozi wa RMB, Francis Gatare yavuze ko icyo gikemutse kandi azafasha gukora ubucukuzi bw’amabuye y’agaciro kinyamwuga. Ikigiye gukurikiraho ngo ni ukuyashyira aho uyakeneye ayabona.

Ati “Bizadufasha mu guteza imbere igihugu cyacu cy’u Rwanda nk’iguhugu gifite ubucukuzi bw’amabuye y’agaciro bwa kinyamwuga kuko nta gihugu gifite ubucukuzi bw’amabuye y’agaciro kitagira amakuru ari kuri internet abantu bashobora kubona bakamenya uburyo igihugu giteye bakamenya amahirwe arimo.”

Leta y’u Rwanda yemeje ko hakorwa ubushakashatsi bw’ibanze bugamije kumenya aho amabuye y’agaciro aherereye ingano yayo n’akamaro yagirira abanyarwanda. Mbere yo gutangira uwo mushinga nibwo habayeho kubanza kumenya niba hari amakuru ahari kugira ngo hatazabaho gutakaza igihe hashakwa amakuru n’ubundi yashatswe mbere.

Mu gusubira mu nyandiko n’ahandi hose haboneka amakuru yerekeye iby’amabuye y’agaciro mu Rwanda, nibwo hemejwe ko u Rwanda rugomba kujya gushaka amakuru u Bubiligi bwafashe kugira ngo icyo kigo kiyahereho gikora ubushakashatsi bw’inyongera.

Ambasaderi w’u Bubiligi mu Rwanda, Benoît Ryelandt, yavuze ko ayo makuru bayakusanyije mu gihe bari mu Rwanda bagamije kumenya umutungo wo mu nda y’Isi u Rwanda, rufite kugira ngo ugire uruhare mu bukungu bw’igihugu.

Impamvu byafashe igihe kinini kugira ngo ashyikrizwe u Rwanda, avuga ko byatewe n’ubwinshi bw’amakuru yakusanyijwe mu buryo butandukanye, ariko ko icyo bishimira ari uko bahaye u Rwanda amakuru atunganyije azarufasha.

Ati “Ntabwo ari ibintu wakora mu byumweru cyangwa amezi make, ni urugendo runini, ni ukubera ubwinshi bw’amakuru twafashe mu buryo butandukanye yafashwe igihe kirekire. Igikomeye si ukuyatanga mu minsi mike ahubwo icy’ingenzi ni uko birangiye dutanze amakuru azagirira uruhare mu iterambere ry’urwego rw’ubucukuzi bw’amabuye y’agaciro mu Rwanda.”

U Bubiligi bwakolonije u Rwanda kuva mu 1916 busimbuye u Budage kugeza rubonye ubwigenge mu 1962.

Ubucukuzi bw’amabuye y’agaciro bwatangiye mu 1934 ubu bwinjiriza u Rwanda arenga miliyoni 300 z’amadolari ya Amerika, ni arenga miliyari 280.5 z’amafaranga y’u Rwanda ku mwaka, intego ni uko buzinjiza miliyoni 800$ mu 2020 na miliyari 1.5$ mu 2024.

Inkuru bifitanye isano: U Bubiligi bugiye gushyikiriza u Rwanda amakuru bubitse ku mabuye y’agaciro yarwo

Abashoramari mu rwego rw'ubucukuzi bw'amabuye y'agaciro berekwa ikarita y'aho amabuye aherereye
Abayobozi n'abashoramari mu rwego rw'ubucukuzi bw'amabuye y'agaciro bitabiriye uyu muhango
Amakuru agaragaza ahari amabuye y'agaciro n'ubwoko buhari
Ambasaderi w’u Bubiligi mu Rwanda, Benoît Ryelandt n’Umuyobozi Ikigo cy’Igihugu gishinzwe Mine, Peteroli na Gaz (RMB), Francis Gatare
Ambasaderi w’u Bubiligi mu Rwanda, Benoît Ryelandt yavuze ko bishimira ko bahaye u Rwanda amakuru atunganyije azafasha urwego rw'ubucukuzi bw'amabuye y'agaciro
Ayo makuru arimo ibitabo, amakarita n’izindi nyandiko byamaze kwinjizwa mu ikoranabuhanga
Umuyobozi w'Ikigo cy’Igihugu gishinzwe Mine, Peteroli na Gaz (RMB), Francis Gatare yavuze ko kumenya amakuru ari ikintu cy'ingenzi mu rwego rw'ubucukuzi bw'amabuye y'agaciro

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .