Rubavu: Abakozi bane b’akarere bafunzwe bazira sima yangirikiye mu bubiko

Yanditswe na Mukwaya Olivier
Kuya 22 Ukwakira 2019 saa 07:54
Yasuwe :
0 0

Abakozi b’akarere ka Rubavu bari mu maboko y’urwego rw’igihugu rushinzwe ubugenzacyaha (RIB) aho bakurikiranyweho kugira uruhare mu burangare bwatumye imifuka ya Sima yari igenewe abatishoboye n’abezweho n’ingaruka z’ibiza yangirikira mu bubiko.

Abafunzwe ni Kayitesi Marie Claire ushinzwe Ibiza mu Karere, Habimana Martin umujyanama wa Komite Nyobozi mu karere, Hagenimana Epimaque, Umuyobozi w’ishami rishinzwe imibereho myiza y’abaturage, na Dukundimana Espérence , Umuyobozi w’ishami ry’ubutegetsi n’imicungire y’abakozi.

Bakurikiranyweho gukoresha nabi umutungo ufitiye rubanda akamaro aho imifuka 5078 ya Sima yangirikiye mu bubiko.

Umuvugizi w’urwego rushinzwe ubugenzacyaha, Modeste Mbabazi yemeje aya makuru, ariko avuga ko akiyakurikirana neza.

Iyi sima nyangiritse yari yaratanzwe na Ministeri y’ingabo binyuze mu ishami ry’Inkeragutabara mu masezerano n’akarere ka Rubavu. Imaze umwaka mu bubiko kandi yari igenewe kubakira abatishoboye n’abandi baturage basenyewe n’ibiza.

Ingingo ya 12 mu itegeko ryo kurwanya Ruswa ivuga ko umuntu wese ufite ububasha bwo gucunga umutungo ufitiye rubanda akamaro, mu rwego rwa Leta cyangwa ikigo cyigenga, sosiyete, koperative, umuryango utari uwa Leta ufite ubuzima gatozi, uwukoresha mu byo utateganyirijwe, uwureka cyangwa utawitaho ukononekara cyangwa uwukoresha mu buryo bunyuranyije n’amategeko, aba akoze icyaha. Iyo abihamijwe n’urukiko, ahanishwa igifungo kirenze imyaka itanu ariko kitarenze imyaka irindwi n’ihazabu y’amafaranga y’u Rwanda atari munsi ya miliyoni ariko atarenze miliyoni eshanu.

Inkuru bijyanye: Rubavu: Imifuka isaga ibihumbi bitanu ya sima yari igenewe abatishoboye yangirikiye mu bubiko

Iyi sima nyangiritse yari yaratanzwe na Ministeri y’ingabo binyuze mu ishami ry’Inkeragutabara mu masezerano n’akarere ka Rubavu ngo izahabwe abasenyewe n'ibiza

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza