Musanze: Urukiko rwategetse ko uwari Visi Meya uregwa gukubita umugore we akomeza kuburana afunzwe

Yanditswe na N.Kubwimana Janvière
Kuya 21 Mutarama 2020 saa 04:09
Yasuwe :
0 0

Urukiko rwisumbuye rwa Musanze rwategetse ko uwari Visi Meya w’Akarere ka Musanze ushinzwe Ubukungu n’Iterambere, Ndabereye Augustin, akomeza kuburana afunzwe, nyuma yo gusesengura ingingo yatanze asaba kuburana ari hanze rugasanga nta shingiro zifite.

Umwanzuro ku bujurire bwa Ndabereye wari wasabye gukurikiranwa ari hanze watangajwe kuri uyu wa Kabiri, tariki ya 21 Mutarama 2020.

Ndabereye afunze aregwa gukubita, gukomeretsa no guhoza ku nkeke Kamariza Olive bashakanye.

Perezida w’Iburanisha Me. Munyawera Sophanie, yasomye zimwe mu ngingo zatanzwe n’uregwa n’umwunganizi we Me. Habimana Donath, basaba ko Ndaberewe yafungurwa akajya yitaba urukiko ari hanze, agaragaza ko nta shingiro zifite.

Nyuma yo kubona ko kuba yaratanze abamwishingira n’ingwate ku buryo aramutse afunguwe atatoroka, byose byateshejwe agaciro kuko basanze abakabaye abishingizi be nta byemezo by’ubunyangamugayo bitangwa n’inzego z’ibanze bagaragaje.

Uyu mwanzuro wagombaga gutangazwa ku wa 14 Mutarama 2020 ariko iburanisha riza gusubikwa kuko Perezida w’Iburanisha mu Rukiko Rwisumbuye rwa Musanze, umucamanza Munyawera Sophanie, atabashije kuboneka kuko yari mu mahugurwa mu Karere ka Nyanza.

Uru rubanza rwakomeje mu gihe mu minsi ishize, umugore wa Ndabereye yandikiye Perezida Paul Kagame agaragaza ihohoterwa rikomeye yagiye akorerwa mu bihe bitandukanye n’umugabo we, atakambira inzego z’umutekano ngo zimube hafi ngo umutekano we utazahungabanywa.

Ndaberewe Augustin yatawe muri yombi mu gitondo cyo ku wa 30 Kanama 2019, agezwa imbere y’ubucamanza ku wa 10 Nzeri 2019.

Biteganyijwe ko urubanza rwa Ndaberewe ruzatangira kuburanishwa mu mizi ku wa 29 Mutarama 2020 muri Stade Ubworoherane aho ruzabera mu ruhame.

-  Indi nkuru wasoma: Urubanza rw’uwari Visi Meya wa Musanze uregwa guhohotera umugore we ruzabera mu ruhame

Urukiko Rwisumbuye rwa Musanze rwategetse ko uwari Visi Meya w’Akarere ka Musanze ushinzwe Ubukungu n’Iterambere, Ndabereye Augustin, akomeza kuburana afunzwe
Kamariza Olive bivugwa ko yakubiswe n'umugabo we akanamupfura umusatsi

Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Kwamamaza