Isoko rya Nyamagabe ryari ryaradindiye rigeze he ryubakwa?

Yanditswe na Prudence Kwizera
Kuya 20 Werurwe 2020 saa 01:28
Yasuwe :
0 0

Isoko rya Kijyambere rya Nyamagabe ryatangiye kubakwa mu mwaka wa 2014 rigenda ridindira bitewe n’impamvu zavuzwe zirimo ubwumvikane bucye hagati y’Ubuyobozi bw’Akarere, urugaga rw’abikorera ndetse n’abacuruzi.

Byageze mu 2019 imirimo yo kuryubaka yarahagaze burundu bitewe n’ibyo bibazo.

Kudindira kwaryo kwateye ingaruka zitandukanye kuko aho abacuruzi bashyizwe ngo babe bakorera hatameza neza; iyo imvura iguye baranyagirwa naho mu gihe cy’izuba bagatumukirwa n’ivumbi.

Ubwo Perezida wa Repubulika, Kagame Paul, yasuraga abaturage bo mu Karere ka Nyamagabe muri Gashyantare 2019; yasabye ko ibibazo bindindiza imyubakire y’iryo soko bikemurwa bwangu rikubakwa rikuzura.

Icyo gihe Umukuru w’Igihugu yagize ati “Ntabwo isoko ryajyaho ngo rihagarare ari igice rijyeho amafaranga nibirangiza rikwamire ahongaho. Iryo soko na ryo riraza kurangira cyangwa rifungwe; nta kiri hagati aho kuri njyewe. Turarirangiza cyangwa turarivaho turyihorere tumenye ko ryatunaniye tujye mu bindi bikorwa. Ariko ndibwira ko gukemura ibibazo bijyanye naryo bishoboka.”

Nyuma y’igihe gito imirimo yo kuryubaka yahise isubukurwa ku buryo aho bigeze kuri ubu bitanga icyizere ko rishobora kuzubakwa rikuzura. Ryamaze gushyirwaho isakaro kandi abafundi bakomeje akazi umunsi ku wundi.

Umuyobozi w’Akarere ka Nyamagabe, Uwamahoro Bonaventure, avuga ko nyuma yo gusurwa n’Umukuru w’Igihugu bicaye bacoca ibibazo bitera iryo soko kudindira barabikemura.

Ati “Nyuma yaho dusuriwe na Nyakubahwa Perezida wa Repubulika umwaka ushize yatanze umurongo twese twagendeyeho, bwaba ubuyobozi bw’Akarere, Intara n’Abikorera ku giti cyabo turicara tureba impamvu ituma isoko ridindira.”

Uwamahoro yavuze ko bimwe mu bibazo bakemuye byaridindizaga harimo icy’amikoro ashingiye ku kubona inguzanyo muri banki, ubwumvikane buke hagati y’abashinzwe ibijyanye n’iryo soko n’ibindi.

Mu bindi avuga bakoze harimo gushishikariza abaturage gufatamo imigabane no kuyongera ndetse n’Akarere ubwako gashyiramo amafaranga.

Kugeza ubu Akarere ka Nyamagabe kashyizemo Miliyoni 100 Frw abandi byanyamigabane bashya bamaze gushyiramo Miliyoni zigera kuri 50 Frw.

Uwamahoro avuga ko agendeye ku bushake buhari n’uko imirimo yo kubaka isoko rya Nyamagabe iri gukorwa, rizaba ryuzuye muri Mata 2020.

Ati “Turateganya ko bitarenze ukwezi kwa kane ririya soko rizaba ryuzuye rikorerwamo kandi icyizere kirahari, amafaranga yarabonetse, ubushake n’imirimo biri kwihuta kuko impanuro Nyakubahwa Perezida wa Repubulika yaduhaye n’icyerekezo yaduhaye ni inkunga ikomeye kubera ko byatumye n’ibyari ibibazo byari byaraburiwe umuti uboneka.”

Mbere rigitangira kubakwa ryari rigizwe n’inzu enye zigerekeranye ariko bitewe n’ubushobozi bwabonetse bahisemo kuzigira eshatu, gusa bubaka ku buryo nyuma nibashaka kongera inyubako ya kane hejuru bizashoboka.

Biteganyijwe ko rizuzura ritwaya Miliyari imwe na Miliyoni 500 Frw.

Inkuru wasoma: Turarirangiza cyangwa turarivaho: Perezida Kagame avuga ku isoko rya Nyamagabe ryadindiye

Biteganyijwe ko rizuzura muri Mata 2020 ritwaye Miliyari imwe na Miliyoni 500 Frw
Isoko rya Kijyambere rya Nyamagabe riri kubakwa mu Mujyi wa Nyamagabe mu Murenge wa Gasaka
Kubaka iri soko byari byaradindiye bitewe n'ubwumvikana buke hagati y'ubuyobozi bw'akarere n'abikorera
Rigitangira kubakwa ryari rigizwe n'inzu enye zigerekeranye ariko bitewe n'ubushobozi zagizwe eshatu
Nyuma y'uko Perezida Kagame asuye Akarere ka Nyamagabe imirimo yo kubaka iri soko yahise isubukurwa ku buryo aho bigeze kuri ubu bitanga icyizere ko rishobora kuzubakwa rikuzura
Meya wa Nyamagabe, Uwamahoro avuga ko imirimo yo kubaka iri soko iri kugenda neza cyane

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .