Turarirangiza cyangwa turarivaho: Perezida Kagame avuga ku isoko rya Nyamagabe ryadindiye

Yanditswe na Prudence Kwizera
Kuya 26 Gashyantare 2019 saa 02:30
Yasuwe :
0 0

Perezida wa Repubulika, Kagame Paul, yavuze ko bitumvikana ukuntu isoko rya kijyambere rya Nyamagabe, ryadindiye rikamara imyaka igera kuri itanu ritaruzura, asaba ko ryihutishwa cyangwa bakarireka bagakora ibindi.

Yabivugiye mu Karere ka Nyamagabe mu ruzinduko yahagiriye kuri uyu wa kabiri muri gahunda yo gusura abaturage no kuganira na bo.

Umukuru w’Igihugu yagarutse ku bibazo biri mu Karere ka Nyamagabe no mu Ntara y’Amajyepfo birimo n’isoko rya kijyambere ryatangiye kubakwa mu mwaka wa 2014 ariko na nubu rikaba ritaruzura ndetse n’imirimo ikaba isa n’iyahagaze.

Yasabye ko gikurikiranwa kigakemuka bwangu cyangwa bakarireka bagakora ibindi.

Yagize ati “Ntabwo nigeze numva ikibazo cy’isoko cyajyaho kikamara imyaka kikabura ugikemura; ntabwo ari uko habuze uburyo bugikemura, habuze abantu barimo abayobozi batabikurikiranye neza.”

“Ntabwo isoko ryajyaho ngo rihagarare ari igice rijyeho amafaranga nibirangiza rikwamire ahongaho. Iryo soko na ryo riraza kurangira cyangwa rifungwe; nta kiri hagati aho kuri njyewe. Turarirangiza cyangwa turarivaho turyihorere tumenye ko ryatunaniye tujye mu bindi bikorwa. Ariko ndibwira ko gukemura ibibazo bijyanye naryo bishoboka”.

Iryo soko ryatangiye kubakwa mu mwaka wa 2014 rigenda ridindira bitewe n’impamvu zavuzwe zirimo ubwumvikane bucye hagati y’ubuyobozi bw’akarere, urugaga rw’abikorera ndetse n’abacuruzi.

Umucuruzi witwa Emmanuel Mureramanzi uhagarariye abikorera muri Nyamagabe na Sosiyete yubakishaga iryo soko aherutse kubwira IGIHE ko hari ibyo bahinduye kugira ngo barebe ko ryakuzura.

Yavuze ko bahisemo kugabanya umubare w’inyubako zirigize ndetse no gukorana n’indi banki kuko iya mbere basanze ibananiza kuko yashakaga kubaka inyungu mbere yo kubaha inguzanyo.

Ati “Iyo banki y’indi turi kumwe ubu nta mabwiriza azatuma tugira ibibazo bikomeye ikoresha. Byabaye ngombwa ko tugabanya umubare w’inyubako ziva kuri enye ziba eshatu kuko n’ubundi twabonye ko nta bantu bo kuzijyamo tuzabona.”

Mureramanzi avuga ko bazubaka ku buryo nyuma nibashaka kongera inyubako ya kane hejuru bizashoboka.

Yavuze ko mbere inyubako zikiri enye byari biteganyijwe ko zizatwara amafaranga miliyari imwe na miliyoni 600. Kuri ubu yagabanutseho amafaranga agera kuri miliyoni 500.

Bamwe mu bacuruzi bacururizaga ahari kubakwa iryo soko mbere y’uko iryari rihari sisenywa ngo rivugururwe, bavuga ko aho bashyizwe habateza igihombo kuko banyagirwa n’imvura.

Bifuza ko hakomeza gushyirwamo ingufu rikubakwa rikuzura kuko barinyotewe.

Isoko rya Nyamagabe ryatangiye kubakwa mu 2014, kugeza n'ubu ntiriruzura

[email protected]


Kwamamaza

Kwamamaza

Kwamamaza

TANGA IGITEKEREZO

AMATEGEKO AGENGA IYANDIKA RY'IGITEKEREZO CYAWE

Kwamamaza

Special pages
. . . . . .